ໃນຕອນເຊົ້າ ວັນທີ 29 ມີນາ 2021 ທີ່ຜ່ານມາ ຢູ່ທີ່ ຫ້ອງປະຊຸມໃຫຍ່ ອົງການໄອຍະການປະຊາຊົນສູງສຸດ ໄດ້ຈັດຕັ້ງການ ປາຖະກະຖາ ເນື່ອງໃນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ ແລະ ວັນນັກຮົມເສຍອົງຄະ ແລະ ເສຍຊີວິດເພື່ອປະເທດຊາດ ຄົບຮອບ 75 ປີ. ໃຫ້ກຽດເປັນປະທານ ປາຖະກະຖາ ໂດຍ ສະຫາຍ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ, ມີບັນດາ ສະຫາຍ ຄະນະບໍລິຫານງານພັກ, ເລຂາໜ່ວຍພັກ, ຫ້ອງການ, ບັນດາກົມ, ສະຖາບັນຄົ້ນຄວ້າ ແລະ ຝຶກອົບຮົມໄອຍະການ ອົງການໄອຍະການປະຊາຊົນສູງສຸດ ພ້ອມດ້ວຍສະມາຊິກພັກ-ພະນັກງານ ພາຍໃນອົງການໄອຍະການປະຊາຊົນສູງສຸດ ເຂົ້າຮ່ວມຢ່າງພ້ອມພຽງ.

ການປາຖະກະຖາເລົ່າມູນເຊື້ອວັນສຳຄັນຂອງພັກຂອງຊາດ ໃນຄັ້ງນີ້ ເພື່ອສຶກສາອົບຮົມສະມາຊິກພັກ-ພະນັກງານ ໄດ້ຮັບຮູ້, ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງຕໍ່ກັບປະຫວັດສາດ ແລະ ຄວາມເປັນມາຂອງພັກປະຊາຊົນປະຕິວັດລາວ, ຮູ້ໄດ້ເຖິງຄວາມຈຳເປັນໃນການສ້າງຕັ້ງພັກ, ຮຽນຮູ້ບັນດາໂຄງການ ການເມືອງຂອງພັກໃນແຕ່ລະໄລຍະ,  ຜົນງານແຫ່ງການຊີ້ນຳ-ນຳພາຂອງພັກ ແລະ ມູນເຊື້ອທາດແທ້ປະຕິວັດຂອງພັກ. ເຂົ້າໃຈຕໍ່ສະພາບການ ແລະ ການນຳພາຕໍ່ສູ້ຕ້ານພວກລ່າເມືອງຂຶ້ນ ທັງແບບເກົ່າ ແລະ ໃໝ່ ຢ່າງພິລະອາດຫານພັກປະຊາຊົນປະຕິວັດລາວ. ການນຳພາບັ້ນຮົບປ້ອງກັນຕົວເມືອງທ່າແຂກ ແຂວງຄຳມ່ວນ ໃນວັນທີ 21 ມີນາ 1946 ຊຶ່ງແມ່ນວັນຄຽດແຄ້ນຂອງປະຊາຊົນລາວໃນທົ່ວປະເທດເວົ້າລວມ, ປະຊາຊົນຊາວເມືອງທ່າແຂກເວົ້າສະເພາະ ເຊິ່ງການເຜີຍແຜ່ເຊື່ອມຊຶມມູນເຊື້ອຄືດັ່ງກ່າວນີ້ ເຮັດໃຫ້ພວກເຮົາໄດ້ຮຽນຮູ້ປະຫວັດສາດເພື່ອເປັນບົດຮຽນກ້າວເດີນໄປ ຂ້າງໜ້າຢ່າງຖືກຕ້ອງ ແລະ ເໝາະສົມ.

EnglishLao