ໃນຕອນເຊົ້າຂອງວັນທີ 17 ມິ​ຖຸ​ນາ 2021 ທີ່ຫ້ອງຮັບແຂກອົງການໄອຍະການປະຊາຊົນສູງສຸດ ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ໄດ້ຕ້ອນຮັບ ທ່ານ ຟາບ​ວະ​ໂລ ໂຣດ​ຕະ​ລີ​ເກັດ ວີ​ດານ (Pablo Antonio Rodriguez Vidal), ເອກອັກຄະລັດຖະທູດ ແຫ່ງ ສາທາລະນະລັດ ກຸຍບາ ປະຈໍາ ສປປ ລາວ ເຂົ້າຢ້ຽມຄຳນັບ ໂດຍມີພະນັກງານສອງຝ່າຍເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາ ຊົນສູງສຸດ ໄດ້ສະແດງຄວາມຕ້ອນຮັບອັນອົບອຸ່ນ ແລະ ຄວາມຊົມເຊີຍ ທີ່ ທ່ານ ຟາບ​ວະ​ໂລ ໂຣດ​ຕະ​ລີ​ເກັດ ວີ​ດານ, ເອກອັກຄະ ລັດຖະທູດ ແຫ່ງ ສາທາລະນະລັດ ກຸຍບາ ປະຈໍາ ສປປ ລາວ ໄດ້ຮັບການແຕ່ງຕັ້ງໃຫ້ດໍາລົງຕຳແໜ່ງ ເປັນເອກອັກຄະລັດ​ຖະ​ທູດກຸຍ​ບາ ປະຈຳ ສປປ ລາວ ແລະ ເຊື່ອໝັ້ນຢ່າງຍິ່ງວ່າ ໃນວາລະທີ່ທ່ານດຳລົງຕຳແໜ່ງເປັນທ່ານ ເອກອັກຄະ​ລັດ​ຖະ​ທູດ ປະ ຈຳ ສປປ ລາວ ນີ້ ການພົວພັນຮ່ວມມື ລະຫວ່າງ ສປປ ລາວ ກັບ ສາ​ທາ​ລະ​ນະ​ລັດ​ກຸຍ​ບາ ເວົ້າລວມ, ລະຫວ່າງ ອົງການ ໄອຍະການປະຊາຊົນ ແຫ່ງ ສປປ ລາວ ກັບ ອົງການໄອຍະການ ແຫ່ງ ສາທາລະນະລັດ ກຸຍບາ ເວົ້າສະເພາະ ຈະໄດ້ຮັບການເສີມຂະຫຍາຍເຂົ້າສູ່ລວງເລີກ ຢ່າງບໍ່ຢຸດຢັ້ງ. ສອງຝ່າຍ ຕີລາຄາສູງ ຜົນສຳເລັດຂອງການຮ່ວມມື ລະຫວ່າງ ສປປ ລາວ ແລະ ສາທາລະນະລັດ ກູຍບາ ໃນ​ໄລຍະຜ່ານມາ ເວົ້າລວມ, ການຮ່ວມມື ລະຫວ່າງ ອົງການໄອຍະການປະຊາຊົນ ແຫ່ງ ສປປ ລາວ ແລະ ອົງການໄອຍະການ ແຫ່ງ ສາທາລະນະລັດ ກຸຍບາ ເວົ້າສະເພາະ ໂດຍໄດ້ແລກປ່ຽນຄະນະຜູ້ແທນ, ໄປມາຢ້ຽມ ຢາມ, ແລກປ່ຽນບົດຮຽນວຽກງານໄອຍະການ ຊຶ່ງກັນ ແລະ ກັນ ໂດຍດີຕະຫຼອດມາ. ອັນໄດ້ເຮັດໃຫ້ວຽກງານໄອຍະການຂອງ ສປປ ລາວ ໄດ້ຮັບການພັດທະນາດີຂຶ້ນເປັນກ້າວໆ, ຮັບປະກັນການປະຕິບັດໜ້າທີ່ວຽກງານໄອຍະການໃຫ້ມີປະສິດ ທິພາບສູງ ແນໃສ່ປົກປ້ອງຜົນປະໂຫຍດຂອງລັດ, ສັງຄົມ, ສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ເພີ່ມທະວີນິຕິທຳ, ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ ຢ່າງບໍ່ຢຸດຢັ້ງ.
ນ ສຸກພາວະດີ

EnglishLao