ຂປລ. ໃນວັນທີ 29 ມິຖຸນາ 2021 ທີ່ອົງການໄອຍະການປະຊາຊົນສູງສຸດ ນະຄອນຫລວງວຽງຈັນ, ໄດ້ມີພິທີປະກາດການຈັດຕັ້ງ ແລະ ມອບ-ຮັບໜ້າທີ່ ບັນດາກົມຂອງອົງການໄອຍະການປະຊາຊົນສູງສຸດ, ໂດຍການເປັນປະທານຂອງ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ມີບັນດາຫົວໜ້າກົມ, ຮອງກົມ, ພ້ອມດ້ວຍພະນັກງານຫລັກແຫລ່ງ ແລະ ພາກ ສ່ວນກ່ຽວຂ້ອງ ເຂົ້າຮ່ວມ.
ທ່ານ ຄຳນູທອນ ສູນວິເລີດ ຮອງຫົວໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງ ແລະ ຍົກຍ້າຍ ຂັ້ນຫົວໜ້າກົມ ຂອງອົງການໄອຍະການປະຊາຊົນສູງສຸດ, ໂດຍແຕ່ງຕັ້ງ ທ່ານ ພຸດທະວົງ ບົວລະພາ ເປັນຫົວໜ້າຫ້ອງການ ອົງການໄອຍະການປະຊາຊົນສູງສູງ, ທ່ານ ຈັນ ທະບູນ ເພັງຄຳໃສ ເປັນຫົວໜ້າກົມຈັດຕັ້ງ-ພະນັກງານ ອົງການໄອຍະການປະຊາຊົນສູງສຸດ, ທ່ານ ຂັນທະວີ ວິໄລສັກ ເປັນຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ອົງການໄອຍະການປະຊາ ຊົນສູງສຸດ, ທ່ານ ນາງ ພອນທິບ ສາວະລີ ເປັນຫົວໜ້າກົມກວດກາ ອົງການໄອຍະການປະຊາຊົນສູງສຸດ, ທ່ານ ພູວຽງ ວົງໄຊ ເປັນຮອງຫົວໜ້າອົງການໄອຍະການປະຊາຊົນພາກກາງ ແລະ ຊີ້ນຳພະແນກຕິດຕາມກວດກາ ການດຳເນີນຄະດີແພ່ງ ອົງການໄອຍະການປະຊາຊົນພາກກາງ, ທ່ານ ນາງ ບຸນໄທ ປັນແກ້ວ ເປັນຮອງຫົວໜ້າອົງການໄອຍະການປະຊາຊົນພາກກາງ ແລະ ຊີ້ນຳວຽກງານຫ້ອງ ການ, ຈັດຕັ້ງ-ພະນັກງານ ແລະ ວຽກງານການເງິນ ອົງການໄອຍະການປະຊາຊົນພາກກາງ ແລະ ທ່ານ ໂນສະຫວັນ ສີຫາລາດ ເປັນຮອງຫົວໜ້າອົງການໄອຍະການປະຊາຊົນນະຄອນຫລວງວຽງຈັນ.
ໃນໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ໄດ້ໃຫ້ກຽດໂອ້ລົມ ແລະ ມີທິດຊີ້ນຳ ຕໍ່ພິທີດັ່ງກ່າວວ່າ: ການປັບປຸງກົງຈັກການຈັດຕັ້ງ ຂອງອົງການໄອຍະການປະຊາຊົນສູງສຸດໃນຄັ້ງນີ້, ແມ່ນບາດລ້ຽວທີ່ສຳຄັນ ແຫ່ງການຫັນປ່ຽນໄປຕາມທິດ ແລະ ປະຕິບັດຕາມມະຕິຂອງກອງປະຊຸມໃຫຍ່ຄັ້ງທີ XI ຂອງພັກ, ໂດຍໄດ້ມີການສ້າງການຫັນປ່ຽນຢ່າງຕັ້ງໜ້າ ແລະ ແຂງແຮງ, ເຊິ່ງການປັບປຸງກົງຈັກການຈັດຕັ້ງໃນຄັ້ງນີ້ ແມ່ນອີງໃສ່ 5 ດ້ານຕົ້ນຕໍ ຄື: ດ້ານການຈັດຕັ້ງໄດ້ມີການຄົ້ນຄວ້າຈາກຄະ ນະນຳຂັ້ນສູງ ຂອງອົງການໄອຍະການປະຊາຊົນສູງສຸດ, ດ້ານສະພາບແນວຄິດຂອງພະນັກງານ, ດ້ານຄວາມສາມັກຄີ, ດ້ານວິຊາສະເພາະ ແລະ ດ້ານແບບແຜນວິທີເຮັດວຽກ. ພ້ອມນີ້, ຍັງໄດ້ອີງໃສ່ແຜນການປະເມີນພະນັກງານປະຈຳປີ ຂອງອົງການໄອຍະການປະຊາຊົນສູງສຸດ ຕື່ມອີກ.
ຂ່າວ: ສົມຫວັງ
ພາບ: ອ່າຍຄໍາ

By admin

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

EnglishLao