ໃນຕອນເຊົ້າຂອງວັນທີ 13 ກໍລະກົດ 2021, ຢູ່ທີ່ ອົງການໄອຍະການປະຊາຊົນສູງສຸດ ໄດ້ຈັດພິທີປາຖະກະຖາ ລະນຶກເຖີງວັນເກີດ ປະທານ ສຸພານຸວົງ ຄົບຮອບ 112 ປີ ແລະ ວັນສ້າງຕັ້ງກອມມູນິດຈີນ ຄົບຮອບ 100 ປີ ຂື້ນ. ໂດຍເປັນກຽດເຜີຍແຜ່ເອກະສານ ຂອງ ທ່ານ ໄຊຊະນະ ໂຄດພູທອນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ, ມີຄະນະພັກ-ຄະນະນຳ ອອປສ, ບັນດາກົມ, ຫ້ອງການ ແລະ ສະຖາບັນຄົ້ນຄວ້າ ແລະ ຝຶກອົບຮົມໄອຍະການ ພ້ອມດ້ວຍພະນັກງານຂັ້ນພະແນກເຂົ້າຮ່ວມ.
ທ່ານ ໄຊຊະນະ ໂຄດພູທອນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ ໄດ້ເລົ່າຫວນຄືນເຖິງມູນເຊື້ອພິລະອາດຫານຂອງ ປະທານ ສຸພານຸວົງ ທີ່ເຄົາລົບຮັກຂອງປວງຊາຊົນລາວທັງຊາດ ແລະ ວັນສ້າງຕັ້ງພັກກອມມູນິດຈີນ, ເພື່ອໃຫ້ພະນັກງານຫຼັກແຫຼ່ງນຳພາ-ຄຸ້ມຄອງ ອົງການໄອຍະການປະຊາຊົນ ໄດ້ຮັບຮູ້, ເຂົ້າໃຈຢ່າງເລິກເຊິ່ງ ແລະ ກວ້າງຂວາງກ່ຽວກັບຊີວິດຕໍ່ກັບການເຄື່ອນໄຫວປະຕິວັດ, ຜົນງານ ແລະຄຸນງາມຄວາມດີຂອງປະທານ ສຸພານຸວົງ. ຊຶ່ງ ປະທານ ສຸພານຸວົງ ເກີດເມື່ອວັນທີ່ 13 ເດືອນ ກໍລະກົດ ປີ 1909 ທີ່ ແຂວງຫຼວງພະບາງ ເປັນບຸດຂອງເຈົ້າອຸປະຣາດບຸນຄົງ ກັບ ເຈົ້າຍິງຄຳອ້ວນ ຊາຍາລຳດັບທີ 11 ເປັນຍາດກັບ ເຈົ້າເພັດຊະຣາດ ແລະ ເຈົ້າສຸວັນນະພູມມາ ບຸດຂອງພຣະຊາຍາເອກ ແລະ ເຈົ້າສຸວັນນະຣາດ ບຸດທີ່ເກີດຈາກຊາຍາລຳດັບທີ 9. ປະທານ ສຸພານຸວົງ ໄດ້ຮັບການສຶກສາຊັ້ນປະຖົມຈາກຝຣັ່ງ ໃນຫລວງພະບາງ ແລ້ວໄປສຶກສາຕໍ່ທີ່ ສະຖາບັນລີເຊອັນແບຊາໂຣ ທີ່ ຮ່າໂນ້ຍ. ຫຼັງຈາກຈົບການສຶກສາລະດັບປະລິນຍາຕີ ດ້ານວິສະວະກຳກໍ່ສ້າງ ແລະ ຂົວທາງທີ່ ປາຣີ ປະເທດຝຣັ່ງ ໄດ້ເດີນທາງ ກັບຄືນມາປະເທດລາວ ແລະ ໄດ້ແຕ່ງງານກັບ ຍິງສາວຫວຽດນາມ ຊື່ວ່າ ຫວຽນຖິ ພາຍຫຼັງໄດ້ປ່ຽນຊື່ເປັນ ວຽງຄຳ ສຸພານຸວົງ ມີລູກນຳກັນລວມ 10 ຄົນ ເປັນ ຊາຍ 8 ຄົນ ແລະ ຍິງ 2 ຄົນ. ທ່ານໄດ້ເຂົ້າຮ່ວມຂະບວນການຕໍ່ຕ້ານຝຣັ່ງເພື່ອເອກະລາດ ທີ່ເມືອງທ່າແຂກ ເພີ່ນໄດ້ສ້າງຕັ້ງກອງທັບປົດປ່ອຍປະຊາຊົນລາວ ໃນ ເມືອງຊຳເໜືອ, ແຂວງຫົວພັນ ພາຍໃຕ້ການສະໜັບສະໜູນຂອງ ປະທານ ໂຮຈິມິນ ເຊິ່ງຕໍ່ມາເປັນຂະບວນການກອມມູນິດປະເທດລາວ. ໃນປີ ຄ.ສ 1974 ທ່ານ ໄດ້ດຳລົງຕຳແໜ່ງເປັນປະທານສະພາ ທີ່ປຶກສາແຫ່ງຊາດ 18 ເດືອນ ຈົນສະຖາປະນາ ເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ທ່ານ ກໍໄດ້ຮັບເລືອກໃຫ້ເປັນ ປະທານປະເທດ ແລະ ປະທານສະພາປະຊາຊົນສູງສູດ ຜູ້ທຳອິດ ຂອງ ສາທາລະນະ ປະຊາທິປະໄຕ ປະຊາຊົນລາວ ປະທານສຸພານຸວົງ ໄດ້ນຳພາປະຊາຊົນ ຜ່ານຜ່າອຸປະສັກຕ່າງໆ ໃນໄລຍະຂ້າມຜ່ານ, ນຳພາປະຊາຊົນ ດຳເນີນພາລະກິດ ປ່ຽນແປງ ໃໝ່ ແລະ ນຳພາປະຊາຊົນ ສ້າງສາພັດທະນາ ປະເທດຊາດ ໃຫ້ຈະເລີນຮຸ່ງເຮືອງເທື່ອລະກ້າວ. ທຸກໄລຍະການເຄື່ອນໄຫວ ປະທານ ສຸພານຸວົງ ໄດ້ສຸມສະຕິປັນຍາ ແລະ ເຫື່ອແຮງຂອງຕົນເພື່ອຊີ້ນຳ-ນຳພາຂະບວນການປະຕິວັດລາວ ຍາດໄດ້ໄຊຊະນະອັນຍິ່ງໃຫຍ່ມາໃຫ້ແກ່ປະເທດຊາດ ແລະ ເພີ່ນໄດ້ເຖິງແກ່ກໍາ ເມື່ອວັນທີ 9 ມັງກອນ 1995 ທີ່ນະຄອນຫລວງວຽງຈັນ.
ໃນວັນດຽວກັນນັ້ນ, ທ່ານ ກໍຍັງໄດ້ຍົກໃຫ້ເຫັນເນື້ອໃນຈິດໃຈຂອງວັນສ້າງຕັ້ງກອມມູນິດຈີນ ຄົບຮອບ 100 ປີ, ນັບແຕ່ມື້ໄດ້ສ້າງຕັ້ງພັກກອມມູນິດຈີນ, ຊຶ່ງໄດ້ຍົກໃຫ້ເຫັນການຫວນຄືນທາງດ້ານປະຫວັດສາດແຫ່ງການສ້າງຕັ້ງພັກກອມມູນິດຈີນ ແລະ ບົດບາດການນຳພາຂອງພັກກອມມູນິດຈີນທີ່ພົ້ນເດັ່ນໃນເວທີສາກົນ, ສຳລັບຕໍ່ກັບ ສປປ ລາວສືບຕໍ່ຂະຫຍາຍມູນເຊື້ອການພົວພັນຮ່ວມມືລະຫວ່າງສອງພັກ, ສອງລັດ ແລະ ປະຊາຊົນລາວ-ຈີນ ໃຫ້ຂະຫຍາຍກວ້າງອອກຢ່າງຮອບດ້ານ,ເປັນເພື່ອນບ້ານໃກ້ເຮືອນຄຽງທີ່ເປັນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ ເປັນການສ້າງຂະບວນການຄົ້ນຄວ້າຮໍ່າຮຽນແລກປ່ຽນບົດຮຽນໃນຂົງເຂດວຽກງານຕ່າງໆໃຫ້ສູ່ລວງເລີກເຕິບໃຫ່ຍເຂັ້ມແຂງຢ່າງບໍ່ຢຸດຢັ້ງ.
ພາບ-ຂ່າວ ອານຸສັກ

By admin

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

EnglishLao