ໃນຕອນເຊົ້າຂອງ ວັນທີ 20 ກໍລະກົດ 2021 ທີ່ ຫ້ອງການປະຊຸມຊັ້ນ 4 ອົງການກວດສອບແຫ່ງລັດ ໄດ້ມີພິທີເຊັນບົດບັນທຶກການປະສານງານຮ່ວມກັນ ລະຫວ່າງ ອົງການກວດສອບແຫ່ງລັດ ກັບ ອົງການໄອຍະການປະຊາຊົນສູງສຸດ, ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ມະໄລທອງ ກົມມະສິດ ກຳມະການສຳຮອງສູນກາງພັກ, ປະທານອົງການກວດສອບແຫ່ງລັດ ແລະ ທ່ານ ໄຊຊະນະ ໂຄດພູທອນ ກຳມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ, ຄະນະນຳ, ບັນດາທ່ານຫົວໜ້າກົມ ແລະ ພະນັກງານຫລັກແຫລ່ງຂອງທັງສອງອົງການ ຊຶ່ງມີຜູ້ເຂົ້າຮ່ວມໃນການເຊັນບົດບັນທຶກການປະສານງານຮ່ວມກັນໃນຄັ້ງນີ້.

          ຈຸດປະສົງ ເພື່ອເປັນຈັດຕັ້ງປະຕິບັດຜັນຂະຫຍາຍກົດໝາຍວ່າດ້ວຍການກວດສອບແຫ່ງລັດ ສະບັບ ເລກທີ 09/ສພຊ, ລົງວັນທີ 11 ພະຈິກ 2016,​ ມະຕິກອງປະຊຸມຂອງສະພາແຫ່ງຊາດ ສະບັບ ເລກທີ 21/ສພຊ, ລົງວັນທີ 18/11/2019, ມາດຕາ 4, ຂໍ້ 1.4 ມອບໃຫ້ອົງການກວດສອບແຫ່ງລັດຄົ້ນຄວ້າສ້າງບົດບັນທຶກການປະສານງານ ກັບ ອົງການໄອຍະການປະຊາຊົນ ແລະ ສານປະຊາຊົນ ເພື່ອເຮັດໃຫ້ການຈັດຕັ້ງແກ້ໄຂການລະເມີດກົດໝາຍຂອງເປົ້າໝາຍຖືກກວດສອບໄດ້ຮັບການແກ້ໄຂຢ່າງທັນການ ແລະ ເຂັ້ມງວດ ທີ່ໄດ້ກຳນົດໄວ້ໃນມາດຕາ 19 ຂອງ ກົດໝາຍວ່າດ້ວຍການກວດສອບແຫ່ງລັດ ແລະ ແຈ້ງການຂອງຄະນະເລຂາທິການສະພາແຫ່ງຊາດ ສະບັບ ເລກທີ 87/ຄລສ.ກຜງສ, ລົງວັນທີ 04/03/2020 ກ່ຽວກັບການຈັດຕັ້ງປະຕິບັດ ມາດຕາ 19 ຂອງກົດໝາຍວ່າການກວດສອບແຫ່ງລັດ ໃນການສົ່ງສຳນວນເອກະສານ, ຫລັກຖານຜົນຂອງການກວດສອບ ເພື່ອໃຫ້ອົງການທີ່ມີສິດອຳນາດດຳເນີນຄະດີຕາມຂະບວນຍຸຕິທຳຂອງ ສປປ ລາວ.

ທັງສອງອົງການໄດ້ມີການປະສານສົມທົບຢ່າງກົມກຽວໃນການຄົ້ນຄວ້າສ້າງບົດບັນທຶກການປະສານງານຮ່ວມກັນ ຊຶ່ງໄດ້ປະກອບມີ 03 ໝວດ ແລະ 9 ມາດຕາ ໂດຍໄດ້ກຳນົດໜ້າທີ່ຄວາຮັບຜິດຊອບຂອງແຕ່ລະພາກສ່ວນອອກເປັນໜ້າວຽກອັນລະອຽດ ເພື່ອປະກອບສ່ວນໃຫ້ການຄຸ້ມຄອງລັດ, ຄຸ້ມຄອງເສດຖະກິດການນຳໃຊ້ງົບປະມານ ແລະ ຊັບສິນຂອງລັດໃຫ້ມີຄວາມໂປ່ງໃສ, ເຂັ້ມແຂງ,​ ປະສິດທິພາບ, ປະສິດຜົນ, ປະຢັດ ແລະ ປະຕິບັດມາດຕະການສະກັດກັ້ນ ແລະ ການແກ້ໄຂການລະເມີດກົດໝາຍຕາມຂະບວນຍຸຕິທຳ.

By admin

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

EnglishLao