ວັນທີ 27 ຕຸລາ 2021 ທີ່ອົງການໄອຍະການປະຊາຊົນສູງສຸດ ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ໄດ້ຕ້ອນຮັບ ທ່ານ ລີຊາດ ຟີລິບປາປະທານ ສະຖາບັນຊ່ວຍເຫຼືອທາງດ້ານກົດໝາຍ ແລະ ວິຊາການ ເຂົ້າຢ້ຽມຄຳນັບ, ມອບປື້ມ ແລະ ອຸປະກອນກອງປະຊຸມທາງໄກ ໃຫ້ອົງການໄອຍະການປະຊາຊົນສູງສຸດ ໂດຍມີພະນັກງານສອງຝ່າຍເຂົ້າຮ່ວມຢ່າງພ້ອມພຽງ.ໃນໂອກາດດັ່ງກ່າວ ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ໄດ້ສະແດງຄວາມຕ້ອນຮັບອັນອົບອຸ່ນ ແລະ ຄວາມຊົມເຊີຍ ທີ່ທ່ານ ລີຊາດ ຟີລິບປາ ປະທານສະຖາບັນຊ່ວຍເຫຼືອທາງດ້ານກົດໝາຍ ແລະ ວິຊາການ ປະຈຳ ສປປ ລາວ ໄດ້ເຂົ້າຢ້ຽມຂໍ່ານັບ, ມອບປື້ມ ແລະ ອຸປະກອນກອງປະຊຸມທາງໄກ ໃຫ້ອົງການໄອຍະການປະຊາຊົນສູງສຸດ ພ້ອມທັງ ໄດ້ຕີລາຄາສູງ ຜົນສຳເລັດຂອງການຮ່ວມມື ລະຫວ່າງ ສປປ ລາວ ແລະ ຣາຊະອານາຈັກລຸກຊຳບວກ ໃນໄລຍະຜ່ານມາ ເວົ້າລວມ, ການຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແລະ ສະຖາບັນຊ່ວຍເຫຼືທາງດ້ານກົດໝາຍ ແລະ ວິຊາການ ນັບແຕ່ປີ 2016 ເປັນຕົ້ນມາ ເວົ້າສະເພາະ ໂດຍໄດ້ສະໜອງງົບປະມານອັນຫຼວງຫາຍເຂົ້າໃນການສ້າງຄວາມເຂັ້ມແຂງໃຫ້ແກ່ອົງການໄອຍະການປະຊາຊົນ ເປັນຕົ້ນ ໄດ້ຈັດກອງປະຊຸມ, ສໍາມະນາ, ຝຶກອົບຮົມຫຼາຍກວ່າ 19 ຄັ້ງ, ຈັດພິມປຶ້ມປະມວນກົດໝາຍອາຍາ, ປຶ້ມມູນເຊື້ອໄອຍະການ, ປຶ້ມຄູ່ມືຫຼັກຖານໃນຄະດີອາຍາ, ກົດໝາຍວ່າດ້ວຍດໍາເນີນຄະດີອາຍາ, ຂໍ້ຕົກລົງວ່າດ້ວຍພະນັກງານໄອຍະການ ແລະ ຜູ້ຊ່ວຍພະນັກງານໄອຍະການປະຊາຊົນ ເປັນຈຳນວນຫຼາຍ; ເປີດຫຼັກສູດການຮຽນພາສາອັງກິດ ຢູ່ອົງການໄອຍະການປະຊາຊົນສູງສຸດ, ແຂວງຈຳປາສັກ ແລະ ແຂວງຫຼວງພະບາງ, ສະໜອງຄອມພິວເຕີ້, ປລິນເຕີ້, ເຄື່ອງສາຍແອວຊີດີ ແລະ ອື່ນໆ ໃຫ້ອົງການໄອຍະການປະຊາຊົນສູງສຸດ. ມາໃນປີນີ້ ເຖິງວ່າ ຈະມີສະພາບພະຍາດໂກວິດ 19 ລະບາດ ສະຖາບັນ ກໍບໍ່ລົດລະໃນການໃຫ້ການຊ່ວຍເຫຼືອອົງການໄອຍະການປະຊາຊົນ ໂດຍໄດ້ພ້ອມກັນວາງແຜນກິດຈະກຳປະຈຳປີ 2021 ກ່ຽວກັບລັດທີ່ປົກຄອງດ້ວຍກົດໝາຍ, ກົດໝາຍປົກຄອງ, ການສ້າງປື້ມຄູ່ມືການຄຸ້ມຄອງຄ້າຍຄຸມຂັງ ແລະ ການຕິດຕາມກວດກາຂອງອົງການໄອຍະການປະຊາຊົນ, ການຮ່ວມມືລະຫວ່າງປະເທດທາງອາຍາ, ການວາງແຜນພັດທະນາ ແລະ ການຄຸ້ມຄອງໂຄງການລົງທຶນຂອງລັດຢູ່ອົງການໄອຍະການປະຊາຊົນ, ການຜັນຂະຫຍາຍບົດບັນທຶກກອງປະຊຸມຮ່ວມ 4 ພາກສ່ວນໃນການດໍາເນີນຄະດີຕາມຂະບວນຍຸຕິທຳ; ການສະໜັບສະໜູນພະນັກງານໄອຍະການທີ່ມີເງື່ອນໄຂໄປຮຽນຕໍ່ປະລິຍາໂທກົດໝາຍສາກົນ ຢູ່ຕ່າງປະເທດ, ການສ້າງຄວາມເຂັ້ມແຂງໃຫ້ແກ່ວຽກງານຮ່ວມມືທາງອາຍາ, ຈັດພິມປື້ມແຜນພັດທະນາວຽກງານໄອຍະການປະຊາຊົນ 5 ປີ(2021-2025) ແລະ ປະ ຈຳປີ 2021 ຈຳນວນ 500 ຫົວ, ປື້ມລັດຖະບັນຍັດຂອງປະທານປະເທດວ່າດ້ວຍການໃຫ້ອະໄພຍະໂທດ 1000 ຫົວ, ປື້ມບົດຄວາມກົດໝາຍແພ່ງ, ອາຍາ ແລະ ປົກຄອງ 1000 ຫົວ, ປື້ມກົດໝາຍ ແລະ ສົນທິສັນຍາກ່ຽວກັບການຮ່ວມມືທາງດ້ານກົດໝາຍກັບຕ່າງປະເທດ 1.000 ຫົວ ປື້ມຕໍາແໜ່ງງານ 1000 ຫົວ, ການຈັດຊື້ອຸປະກອນກອງປະຊຸມທາງໄກ ຄື ກ້ອງ 1 ໜ່ວຍ ແລະ ຈໍ 2 ໜ່ວຍ ຊຶ່ງເປັນການຊ່ວຍເຫຼືອອັນລໍ້າຄ່າທີ່ສຸດ ໃຫ້ແກ່ອົງການໄອຍະການປະຊາຊົນ ແລະ ປະກອບສ່ວນສຳຄັນເຂົາໃນການພັດທະນາວຽກງານໄອຍະການປະຊາຊົນ ມີຄວາມເຂັ້ມແຂງ, ກ້າວໜ້າ ແລະ ທັນສະໄໝ, ສາມາດເຊື່ອມໂຍງກັບສາກົນ ແລະ ພາກພື້ນ ຢ່າງມີປະສິດທິຜົນ, ເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ສັກສິດ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດປະເທດເຮົາ ຂະຫຍາຍຕົວຕໍ່ເນື່ອງ ແລະ ກ້າວຂຶ້ນຢ່າງບໍ່ຢຸດຢັ້ງ. ຂ່າວ ແລະ ພາບ: ສຸກ

อาจเป็นรูปภาพของ 1 คน, กำลังนั่ง และ สถานที่ในร่ม
อาจเป็นรูปภาพของ 3 คน และ ผู้คนกำลังยืน
อาจเป็นรูปภาพของ 2 คน และ ผู้คนกำลังยืน

By admin

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

EnglishLao