ໃນຕອນເຊົ້າຂອງວັນທີ 21  ມັງກອນ 2022 ຄະນະຜູ້ແທນຂັ້ນສູງອົງການໄອຍະການປະຊາ ຊົນສູງສຸດ ແຫ່ງ ສປປ ລາວ ຊຶ່ງນໍາໂດຍ ທ່ານ ໄຊຊະນະ ໂຄດພູທອນ ກໍາມະການສູນກາງພັກປະ ຊາຊົນປະຕິວັດລາວ ເລຂາຄະນະບໍລິຫານງານພັກ ຫົວໜ້າອົງການໄອຍະການປະຊາຊົນສູງສຸດ ໄດ້ພົບປະທາງໄກ ກັບ ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດແຫ່ງສສ ຫວຽດ ນາມ ຊຶ່ງນຳໂດຍ ສະຫາຍ ເລ ມິງ ຈີ ກໍາມະການສູນກາງພັກຄອມມູນິດ ຫວຽດນາມ ເລຂາຄະ ນະບໍລິຫານງານພັກ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດ ນາມ ໂດຍມີຄະນະຜູ້ແທນທັງສອງຝ່າຍ ເຂົ້າຮ່ວມຢ່າງພ້ອມພຽງ. ໃນວະລະດັ່ງກ່າວ ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ ເລຂາຄະນະບໍລິຫານງານພັກ ຫົວໜ້າອົງການໄອຍະການປະ ຊາຊົນສູງສຸດ ໄດ້ສະແດງຄວາມຂອບໃຈຢ່າງຈິງໃຈມາຍັງພັກ ລັດ ແລະ ປະຊາຊົນ ສສ ຫວຽດ ນາມ ອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນມີຄ່າ ແກ່ ສປປ ລາວ ໃນການຕ້ານພະຍາດ ໂຄວິດ 19 ໃນໄລຍະຜ່ານມາ. ສປປ ລາວ ແລະ ສສ ຫວຽດນາມ ແມ່ນປະເທດສະຫາຍອ້າຍນ້ອງ, ເປັນເພື່ອນມິດຍຸດທະສາດ, ບໍ່ວ່າຈະຢູ່ໃນສະພາບການ ແລະ ຄວາມຫຍຸ້ງຍາກອັນໃດກໍຕາມ ສອງປະ ເທດພວກເຮົາ ກໍອຸ້ມຊູຊ່ວຍເຫຼືອຊຶ່ງກັນ ແລະ ກັນໂດຍດີຕະຫຼອດມາ ຊຶ່ງບໍ່ມີອິດທິກຳລັງໃດ ຈະແບ່ງແຍກໄດ້. ສອງຝ່າຍ ຕີລາຄາສູງຜົນສຳເລັດ ຂອງການພົວພັນ-ຮ່ວມມື ອົງການໄອຍະການປະ ຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໃນໄລຍະຜ່ານມາ ນັບແຕ່ປີ 1993 ເປັນຕົ້ນມາ ມີຜົນສໍາເລັດ; ໄດ້ລົງນາມບົດບັນທຶກຊ່ວຍຈຳສະ ບັບທໍາອິດໃນປີ 1997, ຕໍ່ມາໃນ ປີ 2002, 2012 ແລະ ບົດບັນທຶກການພົບປະ, ບົດບັນທຶກກອງປະຊຸມໃນປີ 2010, ປີ 2014 ອັນໄດ້ເຮັດໃຫ້ການຮ່ວມມືຂອງສອງປະເທດພວກເຮົາ ເຂົ້າສູ່ລວງເລິກ ໂດຍສະເພາະ ການແລກປ່ຽນຄະນະຜູ້ແທນຂັ້ນສູງ, ຂັ້ນວິຊາການ, ການກໍ່ສ້າງພະນັກງານ, ການແລກປ່ຽນຄະນະຜູ້ແທນພະນັກງານອະວຸໂສ-ບໍານານ, ການສ້າງກິດຈະກຳຮ່ວມ ສິລະປະ -ກິລາ ແລະ ກິດຈະກໍາອື່ນ ຈໍານວນໜຶ່ງ; ໄດ້ຮ່ວມກັນຈັດກອງປະຊຸມອົງການໄອຍະການປະຊາ ຊົນບັນດາແຂວງທີ່ມີຊາຍແດນຕິດຈອດກັນໃນປີ 2009, 2011, 2013, 2015, 2017 ແລະ ໃນປີ 2019 ທີ່ນະຄອນປາກເຊ, ແຂວງ ຈຳປາສັກ, ສປປ ລາວ ດ້ວຍຜົນສຳເລັດ; ເຫັນໄດ້ວ່າ ຕະຫຼອດໄລຍະທີ່ຜ່ານມາ ພາຍໃຕ້ການນໍາພາຂອງພັກປະຊາຊົນປະຕິວັດລາວ ແລະ ພັກກອມມູນິດຫວຽດນາມ ເວົ້າລວມ ຄະນະພັກ-ຄະນະນໍາອົງການໄອຍະການປະຊາຊົນຂອງສອງປະເທດ ການພົວພັນຮ່ວມມື ລະຫວ່າງ ສອງອົງການພວກເຮົາ ມີຄວາມເຕີບໃຫຍ່ເຂັ້ມແຂງ ແລະ ເຂົ້າສູ່ລວງເລິກຢ່າງບໍ່ຢຸດຢັ້ງ, ປະກອບສ່ວນສໍາຄັນເຂົ້າໃນການພັດທະນາວຽກງານໄອຍະການປະຊາ ຊົນ ກໍຄື ການພົວພັນ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວອ້າຍນ້ອງ ຢ່າງໜັກແໜ້ນ. ໃນປີ 2021 ຜ່ານມາ ອົງການໄອຍະການປະຊາຊົນສອງປະເທດ ກໍໄດ້ພ້ອມກັນວາງແຜນການເຄື່ອນໄຫວ ກ່ຽວກັບການແລກປ່ຽນຄະນະຜູ້ແທນຂັ້ນສູງ, ການເຂົ້າຮ່ວມກອງປະຊຸມຫົວໜ້າອົງການໄອຍະການສູງສຸດ ອາຊຽນ-ຈີນຄັ້ງທີ 13, ການຝຶກອົບຮົມວຽກງານໄອຍະການ, ການຢ້ຽມຢາມ ສສ ຫວຽດນາມ ຂອງຄະນະຜູ້ແທນວາລະສານອົງການໄອຍະການປະຊາຊົນສູງສຸດ ແຫ່ງ ສປປ ລາວ ແຕ່ສະພາບລະບາດຂອງພະຍາດໂຄວິດ 19 ຈຶ່ງບໍ່ສາມາດຈັດຕັ້ງປະຕິບັດໄດ້. ໃນປີ 2022 ນີ້ ອົງການໄອຍະການປະຊາຊົນສູງສຸດ ສອງປະເທດ ຈະພ້ອມກັນຄົ້ນຄວ້າບົດບັນທຶກຊ່ວຍຈໍາສະບັບໃໝ່ ເພື່ອເປັນພື້ນຖານໃຫ້ແກ່ການຮ່ວມມືກັນຢ່າງມີປະສິດທິຜົນ ໂດຍສຸມໃສ່ການແລກປ່ຽນຄະນະຜູ້ແທນຂັ້ນສູງ, ຜູ້ແທນຂັ້ນວິຊາການ, ການຖອດຖອນບົດຮຽນ ກ່ຽວກັບການດໍາເນີນຄະດີປົກຄອງ ແລະ ບົດບາດຂອງອົງ ການໄອຍະການປະຊາຊົນ, ການຮ່ວມມືທາງອາຍາ, ການປະຈຳຄ້າຍຄຸມຂັງຂອງພະນັກງານໄອຍະການປະຊາຊົນ, ການຂຽນຄຳຖະແຫຼງ ແລະ ການເຂົ້າຮ່ວມປະຊຸມສານຂອງ ພະນັກງານໄອຍະການປະຊາຊົນ, ການກໍ່ສ້າງພະນັກງານໄອຍະການປະຊາຊົນ, ການຮ່ວມມືລະຫວ່າງ ອົງການໄອຍະການປະຊາຊົນທ້ອງຖິ່ນທີ່ມີຊາຍແດນຕິດຈອດກັນ ວຽກງານສື່ມວນຊົນ, ການຫັນເປັນທັນສະໄໝ ແລະ ວຽກງານອື່ນ ທີ່ສອງຝ່າຍໃຫ້ຄວາມສົນໃຈ ຊຶ່ງຈະປະສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ – ຫວຽດນາມ, ຫວຽດນາມ-ລາວ ເວົ້າລວມ, ການພົວພັນ-ຮ່ວມມື ລະຫວ່າງ ອົງການໄອຍະການປະຊາຊົນ ແຫ່ງ ສປປ ລາວ ແລະ ອົງການໄອຍະການປະຊາຊົນ ແຫ່ງ ສສ ຫວຽດນາມ ເວົ້າສະເພາະ ໃຫ້ນັບມື້ກ້າວສູ່ລວງເລິກ, ມີຜົນສຳເລັດໃຫຍ່ຫຼວງກວ່າເກົ່າ ແລະ ໝັ້ນຄົງທະນົງແກ່ນຊົ່ວກາລະນາ, ເພີ່ມທະວີການຮ່ວມມືທາງດ້ານກົດໝາຍ, ຕ້ານອາຊະຍາກໍາຂ້າມຊາດ, ເຮັດໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ ຈະເລີນກ້າວໜ້າຢ່າງບໍ່ຢຸດຢັ້ງ ຕາມທິດສັງຄົມນະຍົມ. ໂດຍ: ນັກຂ່າວ ອອປສ

 

By admin

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

EnglishLao