ອົງການໄອຍະການປະຊາຊົນແຂວງບໍ່ແກ້ວເປີດກອງປະຊຸມຮັບຮອງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ແລະ ການດໍາເນີນຊີວິດການເມືອງ ຂອງ ໜ່ວຍພັກ ປະຈໍາປີ 2018

       ອີງຕາມ ຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 03 ມັງກອນ 2018 ວ່າດ້ວຍການເພີ່ມທະວີ ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຄໍາ​ສັ່ງ​ ຂອງ​ຄະນະ​ປະ​ຈໍາ​ພັກ​ແຂວງ ສະບັບ​ເລກທີ 891/ຄປພຂ ​ແລະ ຄໍາ​ແນະ​ນໍາ​ຂອງ​ຄະນະ​ຈັດ​ຕັ້ງ​ແຂວງ ສະບັບ​ເລກທີ 1643/ຄຈຂ, ລົງ​ວັນ​ທີ 26 ພະ​ຈິກ 2018 ກ່ຽວ​ກັບການ​ເພີ່ມ​ທະວີ​ການ​ກໍ່ສ້າງ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ, ໜັກ​ແໜ້ນ ​ແລະ ມະຕິ​ຕົກລົງ ຂອງ​ຄະ​ນະ​ປະ​ຈໍາ​ພັກ​ແຂວງ ສະບັບ​ເລກທີ 200/ຄປພຂ, ລົງ​ວັນ​ທີ 8 ​ເມສາ 2019 ວ່າ​ດ້ວຍ​ການ​ອະນຸມັດ​​ເປີດ​ກອງ​ປະຊຸມ​ຮັບຮອງ​​ແຜນການ​ກໍ່ສ້າງໜ່ວຍ​ພັກ ປອດ​ໃສ, ​ເຂັ້ມ​ແຂງ, ໜັກ​ແໜ້ນ.

          ໃນວັນທີ 15/5/2019 ເວລາ 8 ໂມງ 30 ນາທີ ໜ່ວຍພັກອົງການໄອຍະການປະຊາຊົນແຂວງບໍ່ແກ້ວ ໄດ້ເປີດກອງປະຊຸມຮັບຮອງ​​ແຜນການ​ກໍ່ສ້າງໜ່ວຍ​ພັກ ປອດ​ໃສ, ​ເຂັ້ມ​ແຂງ, ໜັກ​ແໜ້ນ ຂື້ນຢູ່ທີ່ຫ້ອງປະຊຸມຂອງອົງການໄອຍະການປະຊາຊົນແຂວງບໍ່ແກ້ວ ​ໂດຍ​ເປັນກຽດເຂົ້າຮ່ວມ ຂອງສະຫາຍ ສົມ​ລິດ ສີ​ຜາ​ວັນ ຮອງ​ເລຂາ​ພັກ​ແຂວງ, ປະທານ​ສະພາ​ປະຊາຊົນ​ແຂວງ ບໍ່​ແກ້ວ ​ແລະ ມີ​ບັນດາ​ແຂກ​ຖືກ​ເຊີນຕາງໜ້າຄະນະຈັດຕັ້ງແຂວງ, ຕາງໜ້າຄະນະກວດ ກາພັກ-ລັດແຂວງ ​ແລະ​ມີ​ສະມາຊິກ​ພັກ​ເຂົ້າ​ຮ່ວມ​ທັງ​ໝົດ 17 ສະຫາຍ, ຍິງ 04 ສະຫາຍ.

          ໃນ​ກອງ​ປະຊຸມ​ໄດ້​ຮັບ​ຟັງ​ການ​ຜ່ານ​ບົດ​ສະຫຼຸບ​ຕີລາຄາການຊີ້ນໍາ-ນໍາພາວຽກງານປະຈໍາປີ 2018 ຂອງ​ໜ່ວຍ​ພັກ​ອົງການ​ໄອ​ຍະ​ການ​ປະຊາຊົນ​ແຂວງ ທີ່​ຍາດ​ມາ​ໄດ້​ຕະຫຼອດ​ໄລຍະ 01 ປີຜ່ານມາ ​ເຫັນ​ວ່າ​ຫຼາຍ​ອັນ​ໄດ້​ຖືກ​ຈັດ​ຕັ້ງ​ປະຕິບັດ​ສໍາ​ເລັດ​ຕາມ​ແຜນການ ​ໂດຍ​ສະ​ເພາະ​ແມ່ນ​ການ​ຊີ້​ນໍາ-ນໍາພາ ຂອງ​ໜ່ວຍ​ພັກ ​ແລະ ​ສະມາຊິ​ກພັກ ຫຼາຍ​ສະຫາຍ​ມີ​ຄວາມ​ໜັກ​ແໜ້ນ ທາງ​ດ້ານ​ການ​ເມືອງ-​ແນວ​ຄິດ, ມີ​ຄວາມ​ຈົ່ງ​ຮັກ​ພັກດີ​ຕໍ່​ພັກ​-ຕໍ່​ປະຊາຊົນ ​ແລະ ມີ​ຄວາມ​ຈູບ​ຈ້າວ​ຫ້າວຫັນ​ປະກອບສ່ວນ​ໃນ​ວຽກ​ງານ​ທີ່​ພັກ-ລັດ​ມອບ​ໝາຍ​ຢ່າງ​ມີ​ຜົນ​ສໍາ​ເລັດ. ​ໃນ​ກອງ​ປະຊຸມ​ໄດ້​ພ້ອມ​ກັນ​ປະກອບ​ຄໍາ​ເຫັນ​ໃສ່​ບົດ​ສະຫຼຸບ ຢ່າງ​ກົງ​ໄປ​ກົງ​ມາ​ເພື່ອ​ເຮັດ​ໃຫ້​ບົດ​ສະຫຼຸບ​ມີ​ເນື້ອ​ໃນ​ຄົບ​ຖ້ວນ ​ແລະ ສົມບູນ​ຂຶ້ນ​ຕື່ມ.

          ຈາກ​ນັ້ນ ກອງປະຊຸມ​ກໍ່​ໄດ້​ຮັບ​ຟັງທິດທາງແຜນການກໍ່ ສ້າງ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ, ໜັກ​ແໜ້ນ ປະຈໍາປີ 2019​ ຊຶ່ງ​ໄດ້​ມີ​ການ​ກໍານົດ​ບັນດາ​ແຜນ​ວຽກ​ງານ​ຕ່າງໆ ​ແລະ ສືບ​ຕໍ່​ປະຕິບັດ​ແຜນ​ວຽກ​ທີ່​ຄົງ​ຄ້າງ​ຈໍານວນ​ໜຶ່ງ ເຊິ່ງ​ໄດ້​ວາງ​ຄາດໝາຍ​ສູ້​ຊົນ​ແຕ່ລະດ້ານ​ຄື: ດ້ານ​ການ​ເມືອງສູ້​ຊົນ​ໃຫ້​​ໄດ້ 1,8 ຄະ​ແນນ, ດ້ານ​ແນວ​ຄິດສູ້​ຊົນ​ໃຫ້​​ໄດ້ 1,4 ຄະ​ແນນ, ດ້ານ​ການຈັດ​ຕັ້ງສູ້​ຊົນ​ໃຫ້​​ໄດ້ 1,4 ຄະ​ແນນ, ດ້ານ​ແບບ​​ແຜນ​ວິທີ​ນໍາພາສູ້​ຊົນ​ໃຫ້​​ໄດ້ 1,8 ຄະ​ແນນ, ນໍາພາ​ປະຕິບັດ​ໜ້າ​ທີ່​ການ​ເມືອງສູ້​ຊົນ​ໃຫ້​​ໄດ້ 2,7 ຄະ​ແນນ.

ຫຼັງ​ຈາກ​ສໍາ​​ເລັດການ​ຮັບຮອງ​ແຜນການ​ກໍ່ສ້າງ​ໜ່ວຍ​ພັກ ປອດ​ໃສ, ​ເຂັ້ມ​ແຂງ, ໜັກ​ແໜ້ນ ​ ​ໄດ້​ສືບ​ຕໍ່​ດໍາ​ເນີນ​ຊີວິດ​ການ​ເມືອງ​ປະ​ຈໍາປີ 2018 ຂຶ້ນໃນວາລະດໍາເນີນກອງປະຊຸມ ສະຫາຍ ຄໍານວນ ກ້ອນ ​ເລຂາ​ໜ່ວຍ​ພັກ, ຫົວໜ້າ​ອົງ ການ​ໄອ​ຍະ​ການ​ປະຊາຊົນ​ແຂວງ ກໍໄດ້ເຜີຍແຜ່ເຊື່ອມຊືມເອກະສານກົດ​ລະບຽບ​ພັກ​ປະຊາຊົນ ປະຕິວັດ​ລາວ ສະໄໝທີ  X, ​ເອກະສານຝຶກຝົນຫຼໍ່​ຫຼອມຄຸນທາດການເມືອງ, ຄຸນສົມບັດສິນທຳປະຕິວັດ ຂອງ​ພະນັກງານ, ສະມາຊິກ​ພັກ ​ແລະ ເຊື່ອມຊຶມຄໍາສັ່ງ ຂອງ​ກົມ​ການ​ເມືອງ​ສູນ​ກາງ​ພັກ ສະບັບເລກທີ 01/ຄຈສພ, ລົງວັນທີ 03 ມັງກອນ 2018 ວ່າ​ດ້ວຍ​ການ​ເພີ່ມ​ທະວີ​ການ​ກໍ່ສ້າງ​ໜ່ວຍປອດ​ໃສ, ​ເຂັ້ມ​ແຂງ, ໜັກ​ແໜ້ນ ແລະ ຫຼັງຈາກນັ້ນ ສະຫາຍ ສຸພາ​ພອນ ອິນທະ​ວົງ ຄະນະໜ່ວຍພັກ, ຮອງຫົວໜ້າອົງການໄອຍະການປະຊາຊົນແຂວງ ໄດ້ຂຶ້ນຜ່ານບົດສໍາຫຼວດການນໍາພາລວມ ຂອງຄະນະໜ່ວຍພັກ ຈາກນັ້ນສະມາຊິກພັກປະກອບຄຳເຫັນເຂົ້າໃສ່ບົດສໍາຫຼວດການ ນໍາພາລວມ ຂອງໜ່ວຍພັກ, ສະມາຊິກພັກກໍ່ໄດ້ຜ່ານບົດສຳຫຼວດຕາມ 5 ​ເນື້ອ​ໃນ ຂອງສະມາຊິກພັກພ້ອມທັງຕຳນິສົ່ງຂ່າວເຊິ່ງກັນ ແລະ ກັນຢ່າງ​ກົງ​​ໄປກົງ​ມາ ​ແລະ ໄດ້ຕີລາຄາຈັດແບ່ງປະເພດໜ່ວຍ​ພັກ, ສະມາຊິກພັກ. ສາມາດສະ ຫຼຸບສັງລວມໄດ້ດັ່ງນີ້:

  1. ການຈັດແບ່ງປະເພດການຈັດຕັ້ງພັກ: ​ເປັນໜ່ວຍພັກແຂງ.
  2. ການຈັດແບ່ງປະເພດສະມາຊິກພັກ: ແຂງ 17 ສະຫາຍ, ຍິງ 04 ສະຫາຍ. ກາງ 00 ສະຫາຍ, ອ່ອນ 00 ສະຫາຍ, ​ເສຍ​ທາດ 00 ສະຫາຍ.

ຕອນ​ທ້າຍ​ຂອງ​ກອງ​ປະຊຸມ ​ແມ່ນ​ໄດ້​ຮັບ​ຟັງ​ການ​ໂອ້​ລົມ ຈາກ ສະຫາຍ ສົມ​ລິດ ສີ​ຜາ​ວັນ ຮອງ​ເລຂາ​ພັກ​ແຂວງ, ປະທານ​ສະພາ​ປະຊາຊົນ​ແຂວງບໍ່​ແກ້ວໃນ​ນາມ​ຕາງໜ້າ​ຄະນະ​ພັກ​ຂັ້ນ​ເທິງ​ໄດ້​ເປັນ​ກຽດ​ໃຫ້​ຄໍາ​ຄິດ​ຄໍາ​ເຫັນ​ຊີ້​ນໍາ​ກອງ​ປະຊຸມ ​ແລະ ຊີ້​ທິດ​ເຍືອງ​ທາງ ​ໃຫ້​ແກ່​ໜ່ວຍ​ພັກ​ ຂອງອົງການ​ໄອ​ຍະ​ການປະຊາຊົນ​ແຂວງ ຊຶ່ງ​ເນື້ອ​ໃນ​ຕົ້ນ​ຕໍ່ ​ແມ່ນ​ເໜັ້ນ​ໜັກ​ໃຫ້​ບັນດາ​ສະຫາຍ​ສະມາຊິກ​ພັກ ຈົ່ງ​ພ້ອມ​ກັນ​ບຸກບືນ ​ເປັນ​ເຈົ້າ​ການ​ໃນ​ການ​ປະຕິບັດ​ໜ້າ​ທີ່​ວຽກ​ງານ​ຂອງ​ພັກໃຫ້​ມີ​ຜົນ​ສໍາ​ເລັດ, ​ເອົາ​ໃຈ​ໃສ່​ຝຶກ​ຝົນ​ຫຼໍ່​ຫຼອມ​ຕົນ​ເອງ​ໃຫ້​ມີ​ຄຸນ​ທາດ​ການ​ເມືອງ​ໜັກ​ແໜ້ນ, ​ເປັນ​ແບບຢ່າງ​ທີ່​ດີ​ໃຫ້​ແກ່​ມະ ຫາຊົນ, ຮູ້​ປຸກລະດົມ​ຂົນຂວາຍ​ມະຫາຊົນ​ໃຫ້​ປະກອບສ່ວນ​ເຂົ້າ​ໃນ​ວຽກ​ງານ​ຂອງ​ພັກ, ຕີ​ຕ້ານ​ທຸກ​ປະກົດ​ການ​ຫຍໍ້​ທໍ້​ພາຍ​ໃນ​ພັກ, ຕ້ອງ​ຮູ້​ຈໍາ​ແນ​ກມິດ-ສັດຕູ​ຢ່າງ​ຈະ​ແຈ້ງ, ​ເວລາ​ໃດ​ກໍ​ຕ້ອງ​ຢືນ​ຢູ່​ໃນ​ທັດສະນະ​ຂອງ​ພັກ, ​ເວົ້າ​ຕາມ​ມະຕິ, ​ເຮັດ​ຕາມ​ມະຕິ ​ແລະ ປະຕິບັດຕາມ​ຫຼັກການ​ຂອງ​ພັກ; ອັນ​ສໍາຄັນ ​ແມ່ນ​ໃຫ້​ພ້ອມ​ກັນ​ສູ້​ຊົນ​ໃຫ້​ສ້າງໄດ້​ໜ່ວຍ​ພັກ ປອດ​ໃສ, ​ເຂັ້ມ​ແຂງ, ໜັກ​ແໜ້ນ ​ໃນ​ຕໍ່ໜ້າ.

by:ສີນ

22/05/2019

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ