ອົງການໄອຍະການປະຊາຊົນ ແຂວງຫຼວງພະບາງ ຈັດຕັ້ງກອງປະຊຸມສະຫຼຸບການ ເຄື່ອນໄຫວວຽກງານ ປີ 2018 ແລະ ວາງທິດທາງແຜນການ ປີ 2019

   ໃນ​ວັນ​ທີ 21 ມີນາ 2019 ທີ່ ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ​ໄດ້​ຈັດ​ກອງ​ປະຊຸມ​ຕີ​ລາຄາ​ການ​ເຄື່ອນ​ໄຫວ​ວຽກ​ງານ​ ປະ​ຈໍາປີ 2018 ​ແລະ ວາງ​ທິດ​​ແຜນການ​ໃນ​ສົກ​ປີ 2019 ຂື້ນ​ຢູ່​ຫ້ອງ​ປະຊຸມ​ຂອງອົງການ​ໄອ​ຍະ​ການປະຊາຊົນ​ແຂວງ ພາຍ​ໃຕ້​ການ​ເປັນ​ປະທານ​ຂອງ ​ທ່ານ ບຸນເລື່ອມ ມະນີວົງ ກໍາມະການ​ພັກ​ແຂວງ ຫົວໜ້າ​ອົງການ​ໄອ​ຍະ​ການ​ປະຊາຊົນ​ແຂວງ, ​ໂດຍ​ການ​ເຂົ້າຮ່ວມ​ຂອງ ​ທ່ານ ຄຳຂັນ ຈັນທະວີສຸກ ກໍາມະການ​ສູນ​ກາງ​ພັກ, ​ເລຂາ​ພັກ​ແຂວງ ​ເຈົ້າ​ແຂວງ​ຫຼວງ​ພະ​ບາງ ຄະນະນຳ​ ຈາກພາ​ກສ່ວນ​ກ່ຽວຂ້ອງ ອ້ອມ​ຂ້າງ​ແຂວງ, ບັນດາ​ຂະ​ແໜງ​ການ ​ແລະ ອົງການ​ໄອ​ຍະ​ການ​ປະຊາຊົນ 03 ​ເຂດ​ເຂົ້າຮ່ວມ.

   ທ່ານ ບຸນເລື່ອມ ມະນີວົງ ​ໄດ້​ກ່າວ​​ເປີດ​ກອງ​ປະຊຸມ ​ແລະ ສະຫຼຸບ​ຕີ​ລາຄາ​ການ​ເຄື່ອນ​ໄຫວ​ວຽກ​ງານ ​ໃນ​ປີ 2018 ຂອງອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ​ໂດຍ​ໄດ້​ຍົກ​ໃຫ້​ເຫັນ​ດ້ານ​ດີ​ທີ່​ພົ້ນ​ເດັ່ນ, ດ້ານ​ຄົງ​ຄ້າງ​ໃນ​ໄລຍະ​ຜ່ານ​ມາ ພ້ອມ​ທັງ​ວາງ​ທິດ​ທາງ​ໃນ​ຕໍ່ໜ້າອັນ​ພົ້ນ​ເດັ່ນ ​ແມ່ນ​ການ​ປະຕິບັດ ພາລະ​ບົດບາດ ​ໃນ​ການ​ຕິດຕາມ​ກວດກາ​ການ​ປະຕິບັດ​ກົດໝາຍ ​ແລະ ການ​ສັ່ງ​ຟ້ອງ​ຜູ້​ຖືກ​ຫາຂື້ນ​ສານ ​​ໂດຍບັນລຸ​ຕົວ​ເລກ​ຄາດໝາຍ, ກົນ​ໄກ​ການ​ປະສານ​ສົມທົບ ກັບ ທຸກ​ພາກສ່ວນ​ທີ່​ກ່ຽວຂ້ອງ ​ແລະ ການ​ຊີ້​ນຳ​ວຽກ​ງານ​ຮອບດ້ານ ຂອງ​ອົງການ​ໄອ​ຍະ​ການ​ປະຊາຊົນ​ແຂວງ ​ແລະ 03 ​ເຂດ ສະ​ແດງ​ອອກ​ໃນ​ໜຶ່ງປີຜ່ານມາດັ່ງ​ນີ້:

      - ​ໄດ້​ຮັບ​ຄຳ​ຮ້ອງທຸກ​ຂອງ​ປະຊາ​ຊົນ​ບັນດາ​ເຜົ່າ ຈຳນວນ 341 ສະບັບ ແລະ ​ໄດ້​ແກ້​ໄຂ​ແລ້ວ 337 ສະບັບ ​ເທົ່າ​ກັບ 98,83% ພວມ​ຄົ້ນຄວ້າ 04 ສະບັບ.

      - ​ໄດ້​ຮັບ​ສຳນວນຄະດີ​ອາຍາ​ຂັ້ນຕົ້ນທັງ​ໝົດ: 356 ເລື່ອງ, ​ແກ້​ໄຂ​ແລ້ວ 326 ​ເລື່ອງ, ​ເທົ່າ​ກັບ 91,57%

ພວມ​ຄົ້ນຄວ້າ 30 ​ເລື່ອງ.

      - ​ໄດ້​ຮັບ​ສຳນວນ​ຄະດີ​ອາຍາ​ຂັ້ນອຸທອນ​ທັງ​ໝົດ: 09 ​ເລື່ອງ, ​ແກ້​ໄຂ​ແລ້ວ 09 ​ເລື່ອງ ​ເທົ່າ​ກັບ 100%.

      - ​ໄດ້​ຮັບ​ບົດ​ສະຫຼຸບ​ຄະດີ​ແພ່ງ​ຂັ້ນຕົ້ນທັງ​ໝົດ: 166 ​ເລື່ອງ, ​ໃນ​ນັ້ນຖະ​ແຫຼ​ງສົ່ງ​ສານ 166 ​ເລື່ອງ​ ສານຕັດສິນ​ເອົາ​ຄຳ​ຖະ​ແຫຼ​ງ 166 ​ເລື່ອງ ​ເທົ່າ​ກັບ 100%.

      - ​ໄດ້​ຮັບ​ສຳນວນ​ຄະດີ​ແພ່ງ​ຂັ້ນອຸທອນ​ທັງ​ໝົດ: 104 ​ເລື່ອງ, ແກ້​ໄຂ​ແລ້ວ 104 ​ເລື່ອງ ​ເທົ່າ​ກັບ100%.

   ກອງ​ປະຊຸມ​ຍັງໄດ້ມີ​ການ​ປະກອບ​ຄວາມ​ເຫັນ ຂອງ​ຫຼາຍ​ພາກສ່ວນ​ທີ່​ກ່ຽວຂ້ອງ​ເຂົ້າຮ່ວມ ​ແລະ ​ໄດ້​ຮັບ​ຟັງ​ການ​ໂອ້​ລົມ​ຂອງ​ທ່ານ ​ເຈົ້າ​ແຂວງໆ​ຫຼວງ​ພະ​ບາງ ​ເພື່ອ​ເປັນ​ເຂັ້ມທິດ​ເຍື່ອງ​ທາງ​ ​ໃນການຈັດຕັ້ງປະຕິບັດ​ວຽກ​ງານ​ ​ແລະ ​ເລັ່ງ​ໃສ່ໃນການ​ແກ້​ໄຂ​ບັນຫາ​ທີ່​ເປັນ​ຈຸດ​ອ່ອນ ​ແລະ ຂໍ້ຄົງຄ້າງ ດ້ວຍ​ຄວາມ​ຮັບຜິດຊອບ​ສູງ ​ໂດຍ​ສະ​ເພາະ​ແມ່ນ ການຈັດຕັ້ງປະຕິບັດ​ພາລະ​ບົດບາດ ​ໃນ​ການ​ຕິດຕາມ​ກວດກາ​ການ​ປະຕິບັດ​ກົດໝາຍ ຂອງ​ບັນດາ​ອົງການ​ຈັດຕັ້ງລັດ ​ເພາະ​ຜ່ານ​ມາ​ຍັງ​ເຫັນ​ວ່າ ການ​ຕິດຕາມ​ກວດກາ​ລະ​ເມີດ​ກົດໝາຍ ຂອງ​ເຈົ້າໜ້າ​ທີ່​ຍັງ​ບໍ່​ທັນ​ມີ​ວິທີ​ປັບປຸງ​ແກ້​ໄຂ, ການ​ສືບສວນ-ສອບ​ສວນ, ການ​ເກັບ​ກຳ​ຂໍ້​ມູນ​ໃນ​ການ​ດຳ​ເນີນ​ຄະດີ, ການ​ປະຕິບັດ​ມາດ​ຕະການ​ສະກັດກັ້ນຂອງ​ເຈົ້າໜ້າ​ທີ່​ສືບສວນ-ສອບ​ສວນ ຍັງ​ເຮັດ​ບໍ່​ທັນ​ສອດຄ່ອງ ຕາມ​ກົດໝາຍ ດັ່ງນັ້ນຄວນ​ເອົາ​ໃຈ​ໃສ່​ກວດກາ​ຄືນ ການ​ປະຕິບັດ​ກົດໝາຍ​ໃນ​ສະຖານ​ທີ່​ກັກ​ຕົວ, ກັກ​ຂັງ, ຜູ້​ຖືກ​ຫາ​ກັກ​ຂັງ​ເກີນ​ກຳນົດ ພ້ອມ​ນີ້​ຕ້ອງ​ເອົາ​ໃຈ​ໃສ່​ຕິດຕາມ​ກວດກາ​ການ​ປະຕິບັດ​ຄຳ​ຕັດສິນ​ຂອງ​ສານ​ທີ່​ໃຊ້​ໄດ້​ຢ່າງ​ເດັດຂາດ​ແລ້ວ ​ໃຫ້​ໄດ້​ຮັບ​ການຈັດຕັ້ງປະຕິບັດ, ກົນ​ໄກ​ປະສານ​ສົມທົບ ລະຫວ່າງ ອົງການ​ໄອ​ຍະ​ການ​ປະຊາຊົນ ກັບ ພາກສ່ວນ​ທີ່​ກ່ຽວຂ້ອງ ຍັງ​ບໍ່​ທັນ​ຄ່ອງ​ຕົວ, ມີ​ລັກສະນະ​ຊັກ​ຊ້າ, ການ​ແກ້​ໄຂ​ບາງ​ບັນຫາ​ບໍ່​ທັນ​ເປັນ​ເອກະ​ພາບ ​ເຮັດ​ໃຫ້​ມີ​ຫາງ​ສຽງ​ຈົ່ມ​ວ່າ​ຈາກ​ສັງຄົມ, ​ເພີ້​ມທະວີ​ປັບປຸງ​ການຈັດຕັ້ງຢູ່​ຂັ້ນ​ແຂວງ, ​ເຂດ ​ໃຫ້​ມີ​ຄວາມ​ເຂັ້ມ​ແຂງ, ໜັກ​ແໜ້ນ ທາງ​ດ້ານ​ບຸກຄະລາ​ກອນ ​ໃຫ້​ມີ​ຄວາມ​ຮັບຜິດຊອບ​ສູງ​ຕໍ່ໜ້າ​ທີ່​ວຽກ​ງານ.

      ​ໃນ​ພິທີ​ດຽວ​ກັນ​ນີ້​ ໄດ້​ມີ​ການ​ມອບ​ໃບ​ຍ້ອງຍໍ​ ຂອງທ່ານ ອົງການ​ໄອ​ຍະ​ການ​ປະຊາຊົນ​ສູງ​ສຸດ ​ໃຫ້​ແກ່​ກົມ​ກອງ​ລວມໝູ່ ​ເຊັ່ນ: ອົງການ​ໄອ​ຍະ​ການ​ປະຊາຊົນ​ແຂວງ, ອົງການ​ໄອ​ຍະ​ການ​ປະຊາຊົນ 03 ​ເຂດ, ບຸກຄົນ​ທີ່​ມີ​ຜົນງານ​ດີ​ເດັ່ນ​ ນັບ​ທັງພະນັກງານ​ໄອ​ຍະ​ການ​ແຂວງ ​ແລະ 03 ​ເຂດ ຈຳນວນ 68 ສະຫາຍ, ຍິງ 12 ສະຫາຍ, ​ໃບ​ຊົມ​ເຊີຍ 11 ສະຫາຍ, ຍິງ 07 ສະຫາຍ​​ຕື່ມ​ອີກ.

by:

10/06/2019

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ