ຝຶກອົບຮົມສ້າງຄວາມເຂັ້ມແຂງທາງດ້ານວິຊາການເພື່ອຈັດຕັ້ງປະຕິບັດກົດໝາຍໃນການຕິດຕາມກວດກາການກຳເດີນຄະດີແພ່ງ ໃນບັນດາແຂວງພາກເໜືອ

     ອົງການໄອຍະການປະຊາຊົນສູງສຸດ ກົມຕິດຕາມກວດກາການດຳເນີນຄະດີແພ່ງ ໄດ້ຈັດກອງປະຊຸມຝຶກອົບຮົມ​ກ່ຽວ​ກັບ​ການສ້າງຄວາມເຂັ້ມແຂງທາງດ້ານວິຊາການເພື່ອຈັດຕັ້ງປະຕິບັດກົດໝາຍໃນການຕິດຕາມກວດກາການກຳເດີນຄະດີແ​ພ່ງ ໃຫ້​ກັບ​ບັນ​ດາ​ແຂວງ​ພາກ​ເໜືອ ໃນລະຫວ່າງວັນທີ 02-03 ມີນາ 2020 ຜ່ານ​ມາ ຢູ່ທີ່ ໂຮງ​ແຮມ​ໄຊ​ຊະ​ນະ ແຂວງອຸ​ດົມ​ໄຊ ໂດຍພາຍໃຕ້ການເປັນຂອງ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ, ມີຫົວໜ້າກົມຕິດຕາມກວດກາການດຳເນີນຄະດີແພ່ງ, ຮອງຫົວໜ້າກົມ, ຫົວໜ້າອົງການໄອຍະການປະຊາຊົນພາກເໜືອ, ອົງການໄອຍະການປະຊາຊົນແຂວງຜົ້ງ​ສາ​ລີ, ແຂວງ​ບໍ່​ແກ້ວ, ແຂວງຫຼວງ​ນ້ຳທາ, ແຂວງ​ຫົວ​ພັນ, ແຂວງ​ອຸ​ດົມ​ໄຊ, ອົງການໄອຍະການປະຊາຊົນເຂດ ແລະ ຄະນະຮັບຜິດຊອບຊຸດຝຶກອົບຮົມເຂົ້າຮ່ວມລວມທັງໝົດຈຳ​ນວນ 48 ກວ່າທ່ານ;

     ກອງປະຊຸມຝຶກອົບຮົມດັ່ງກ່າວ ແມ່ນເພື່ອແນ່ໃສ່ຍົກສູງບົດບາດ, ໜ້າທີ່ຮັບຜິດຊອບ, ຫົວຄິດປະດິດສ້າງ ແລະ ເພື່ອສ້າງຄວາມຊຳນິຊຳນານໃຫ້ແກ່ພະນັກງານໄອຍະການ ໂດຍສະເພາະການຍົກສູງຄວາມຮັບຮູ້ ແລະ ຄວາມເຂົ້າໃຈຢ່າງລະອຽດຕໍ່ກັບວຽກງານການຕິດຕາມກວດກາການດຳເນີນຄະດີແພ່ງໃນຂັ້ນຕ່າງໆ ຢູ່ໃນຂອບເຂດທົ່ວປະເທດໃຫ້ມີຄວາມເຂົ້າໃຈຢ່າງເລີກເຊິ່ງທາງ​ດ້ານ​ກົດ​ໝາຍ, ສ້າງຄວາມຮັບຮູ້ກ່ຽວກັບຂັ້ນຕອນໃນການດຳເນີນຕິດຕາມກວດກາການປະຕິບັດກົດໝາຍໃນການດຳເນີນຄະດີແພ່ງໃຫ້ມີປະສິດທິຜົນ ແລະ ເປັນເອກະພາບໃນການຈັດຕັັ້ງປະຕິບັດໃຫ້ຖືກຕ້ອງຕາມຂັ້ນຕອນຂອງກົດໝາຍ ແລະ ປະຕິບັດຕາມຄຳແນະນຳຮ່ວມ ລະຫວ່າງ ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດກ່ຽວກັບໃນການເຂົ້າຮ່ວມຕິດຕາມກວດກາການດຳເນີນຄະດີແພ່ງໃຫ້ຖືກຕ້ອງຄົບຖ້ວນ, ຮອບດ້ານ ແລະ ພາວະວິໄສ;

 

     ນອກນັ້ນ, ກອງປະຊຸມຝຶກອົບຮົມ ຍັງໄດ້ແລກປ່ຽນບົດຮຽນການເຂົ້າຮ່ວມໃນການຕິດ​ຕາມກວດ​ກາ​ການດຳເນີນຄະດີແພ່ງຢູ່ສານປະຊາຊົນຂັ້ນຕົ້ນ, ສານປະຊາຊົນຂັ້ນອຸທອນ ແລະ ສານປະຊາຊົນຂັ້ນລົບລ້າງ, ໃຫ້ມີຄວາມເຂົ້າໃຈຢ່າງເລີກເຊິ່ງ ແລະ ເປັນເອກະພາບໃນການນຳໃຊ້ປະມວນກົດໝາຍແພ່ງ ເປັນຕົ້ນ ບາງມາດຕາທີ່ສ້າງຂຶ້ນໃໝ່ ເຊັ່ນ ທາດສະພາບ ແລະ ສິດເໝືອທີ່ດິນ, ການໄດ້ມາເປັນກຳມະສິດດ້ວຍຄວາມບໍລິສຸດໃຈ ແລະ ບໍ່ບໍລິສຸດໃຈ, ພາກຄອບຄົວ, ມູນມໍຣະດົກ, ເຕັກ​ນິກ​ການ​ຄົ້ນ​ຄວ້າ​ສຳ​ນວນ​ຄະ​ດີ​ແພ່ງ, ເຕັກ​ນິກ​ການ​ຂຽນ​ຮ່າງ​ຄຳ​ຖະ​ແຫຼງ ແລະ ບົດຮຽນທີ່ສຳຄັນອີກຈຳນວນໜຶ່ງ;

     ໃນຕອນທ້າຍ ທ່ານ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ຮຽກຮ້ອງໃຫ້ພະນັກງານໄອຍະການຕ້ອງໄດ້ມີຄວາມຮັບຜິດຊອບສູງ ແລະ ເອົາໃຈໃສ່ຢ່າງເລິກເຊິ່ງກ່ຽວກັບການນຳໃຊ້ປະມວນກົດໝາຍແພ່ງໃນການຕິດຕາມກວດກາການດຳເນີນຄະດີແພ່ງຢູ່ສານປະຊາຊົນໃນແຕ່ລະຂັ້ນໃຫ້ມີຄວາມເຂັ້ມງວດ ແລະ ເປັນເອກະພາບ ແລະ ສາມາດນຳໄປຈັດຕັ້ງປະຕິບັດໃນໜ້າທີ່ ທີ່ຕົນຮັບຜິດຊອບໃຫ້ໄດ້ຮັບ   ໝາກຜົນສຳເລັດ.

ພາບ-ຂ່າວ: ຈະເລີນສິນ ສີພັນດອນ

by:aasdmin

05/03/2020

ປະຕິທິນ

Apr-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ