ຜົນສໍາເລັດກອງປະຊຸມໃຫ່ຍຂອງໜ່ວຍພັກ ອົງການໄອຍະການປະຊາຊົນນະຄອນຫຼວງວຽງຈັນ

         ໂດຍປະຕິບັດຕາມມະຕິຕົກລົງຂອງຄະນະປະຈໍາພັກນະຄອນຫຼວງວຽງຈັນ ສະບັບເລກທີ 305/ຄພ.ນວ, ລົງວັນທີ 20 ພຶດສະພາ 2020  ວ່າດ້ວຍການອະນຸມັດໃຫ້ໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ ເປີດກອງປະຊຸມໃຫ່ຍຂອງຕົນ. ມາຮອດຕອນເຊົ້າຂອງວັນທີ 27 ພຶດສະພາ 2020 ໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ ໄດ້ເປີດກອງປະຊຸມໃຫ່ຍຄັ້ງທີ IV ຂອງຕົນຂຶ້ນ; ພາຍໃຕ້ການເປັນປະທານກອງປະຊຸມໂດຍສະຫາຍ ຄໍາສຸກ ແສງມີໄຊ ເລຂາໜ່ວຍພັກ, ຫົວໜ້າອົງການໄອຍະການປະຊາຊົນນະຄອນຫຼວງວຽງຈັນ, ມີແທນສົມບູນເຂົ້າຮ່ວມທັງໝົດ 41 ສະຫາຍ, ຍິງ 10 ສະຫາຍ, ມີແຂກຖືກເຊີນເຂົ້າຮ່ວມກອງປະຊຸມໃຫ່ຍຄັ້ງນີ້, ມາຈາກຄະນະຈັດຕັ້ງນະຄອນຫຼວງວຽງຈັນ, ຄະນະກວດກາພັກ-ລັດນະຄອນຫຼວງວຽງຈັນ, ມີສະຫະພັນແມ່ຍິງນະຄອນຫຼວງວຽງຈັນ, ພະແນກຍຸຕິທໍານະຄອນຫຼວງວຽງຈັນ.

         ໃນກອງປະຊຸມໃຫ່ຍຄັ້ງທີ  IV ຂອງໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ ໃນຄັ້ງນີ້ ຕາງໜ້າສະມາຊິກພັກທົ່ວໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ ສະຫາຍ ຄໍາສຸກ ແສງມີໄຊ ເລຂາໜ່ວຍພັກໄດ້ຂຶ້ນຜ່ານບົດລາຍງານການເມືອງທັງສອງພາກ, ໂດຍໄດ້ຍົກໃຫ້ເຫັນຜົນງານດ້ານດີ, ດ້ານອອ່ນ, ຂໍ້ຄົງຄ້າງ ແລະ ທິດທາງແຜນການໃນ 5 ປີ ຕໍ່ໜ້າຂອງໜ່ວຍພັກ ຫຼັງຈາກນັ້ນ, ສະຫາຍ ສົມສະໜຸກ ວັນນະບົວທອງ ສະມາຊິກພັກ, ຫົວໜ້າຂະແໜງກວດກາຄ້າຍຄຸມຂັງ-ດັດສ້າງ ຕາງໜ້າໃຫ້ສາມອົງການຈັດຕັ້ງມະຫາຊົນ ໄດ້ປະກອບເຫັນຂອງຕົນຕໍ່ການຊີ້ນໍາ-ນໍາພາ ຂອງຄະນະໜ່ວຍພັກ ຕໍ່ສາມອົງການຈັດຕັ້ງມະຫາຊົນ, ໜ່ວຍຊາວໜຸ່ມ, ໜ່ວຍສະຫະພັນແມ່ຍິງ, ໜ່ວຍກໍາມະບານ ຕະຫຼອດໄລຍະ 5 ປີ ຜ່ານມາ ແລະ ສະເໜີບາງບັນຫາທີ່ຈະຕ້ອງໄດ້ສືບຕໍ່ແກ້ໄຂຕໍ່ຄະນະໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ ຊຸດໃໝ່ ພາຍຫຼັງສະຫາຍ ສົມສະໜຸກ ວັນນະບົວທອງ ໄດ້ປະກອບຄໍາເຫັນສິ້ນສຸດແລ້ວ.   

        ຕໍ່ມາສະຫາຍ ນິກອນ ນາມມະໄຊ ສະມາຊິກພັກ, ຫົວໜ້າຂະແໜງກວດກາທົ່ວໄປ ຕາງໜ້າໃຫ້ບັນດາຂະແໜງວິຊາການ ໄດ້ສືບຕໍ່ຂຶ້ນປະກອບຄໍາເຫັນຂອງຕົນ ຕໍ່ການຊີ້ນໍາ-ນໍາພາ ຂອງຄະນະໜ່ວຍພັກຕໍ່ວຽກງານຕິດຕາມກວດກາທົ່ວໄປ ໂດຍສະເພາະການອອກນິຕິກໍາລຸ່ມກົດໝາຍ ຂອງບັນດາພະແນກການ, ອົງການປົກຄອງເມືອງ, ອົງການປົກຄອງບ້ານ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ ໃນຂອບເຂດຄວາມຮັບຜິດຊອບຂອງຕົນ ຜ່ານການຕິດຕາມກວດກາການອອກນິຕິກໍາລຸ່ມກົດໝາຍ ຂອງບັນດາອົງການດັ່ງກ່າວ ເຫັນວ່າມີຜົນສໍາເລັດ, ມີຂໍ້ຂາດຕົກບົກພ່ອງ, ຂໍ້ຄົງຄ້າງຈໍານວນໜຶ່ງ ທີ່ຕ້ອງໄດ້ສືບຕໍ່ແກ້ໄຂໃນຊຸມປີຕໍ່ໜ້າ ຊຶ່ງສະຫາຍ ນິກອນ ນາມມະໄຊ ໄດ້ສະເໜີທິດທາງແຜນການຕິດຕາມກວດກາການອອກນິຕິກໍາລຸ່ມກົດໝາຍ ຕໍ່ຄະນະໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ ຊຸດໃໝ່ ເພື່ອຊີ້ນໍາ-ນໍາພາຕໍ່ວຽກງານດັ່ງກ່າວໃນ 5 ປີຕໍ່ໜ້າດັ່ງນີ້: ສະເໜີໃຫ້ຄະນະໜ່ວຍພັກຊຸດໃໝ່ ເພີ່ມທະວີການຊີ້ນໍາ-ນໍາພາຕໍ່ວຽກງານຕິດຕາມກວດກາທົ່ວໄປ ແລະ ວຽກງານກວດກາການອອກນິຕິກໍາລຸ່ມກົດໝາຍໃຫ້ຫຼາຍຂຶ້ນ; ຖືເອົາການໂຄສະນາເຜີຍແຜ່ກົດໝາຍວ່າດ້ວຍອົງການໄອຍະການປະຊາຊົນ ສະບັບປັບປຸງປີ 2017 ໃຫ້ບັນດາພະແນກການ, ບັນດາອົງການປົກຄອງເມືອງ, ອົງການປົກຄອງບ້ານ, ອົງການຈັດຕັ້ງສັງຄົມ, ອົງການຈັດຕັ້ງມະຫາຊົນ ແລະ ພົນລະເມືອງ ຢູ່ນະຄອນຫຼວງວຽງຈັນ ທີ່ຂຶ້ນກັບຄວາມຮັບຜິດຊອບຂອງຕົນ ເພື່ອໃຫ້ເຂົາເຈົ້າຮັບຮູ້, ເຂົ້າໃຈ ຕໍ່ພາລະບົດບາດ, ສິດ ແລະ ໜ້າທີ່ ຂອງອົງການໄອຍະການປະຊາຊົນຫຼາຍຂຶ້ນ; ສະເໜີໃຫ້ເພີ່ມງົບປະມານຈໍານວນໜຶ່ງເຂົ້າໃນວຽກງານດັ່ງກ່າວ ເພື່ອເຮັດໃຫ້ການເຄື່ອນໄຫວວຽກງານມີຄວາມສະດວກ ແລະ ຮັບປະກັນໄດ້ຄຸນນະພາບຂອງວຽກງານ.

     ກອງປະຊຸມໃຫ່ຍຄັ້ງທີ IV ຂອງໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ ໃນຄັ້ງນີ້, ສະມາຊິກພັກຍັງໄດ້ສິດປະຊາທິປະໄຕຂອງຕົນ ເພື່ອເລືອກເອົາຄະນະໜ່ວຍພັກຊຸດໃໝ່, ໃນນີ້ມີຜູ້ສະໝັກຮັບເລືອກຕັ້ງເປັນຄະນະພັກຊຸດໃໝ່ມີຈໍານວນ 7 ສະຫາຍ, ຍິງ 1 ສະຫາຍ; ເລືອກເອົາ 5 ສະຫາຍ; ຜົນການເລືອກຕັ້ງຄະນະໜ່ວຍພັກຊຸດໃໝ່ເລືອກໄດ້ດັ່ງນີ້: ສະຫາຍ ຄໍາສຸກ ແສງມີໄຊ ເປັນເລຂາໜ່ວຍພັກອົງການໄອຍະການປະຊາຊົນນະຄອນຫຼວງວຽງຈັນ, ສະຫາຍ ບຸນມາ ດວງມາລາສິນ ເປັນຮອງເລຂາໜ່ວຍພັກທັງເປັນປະທານກວດກາໜ່ວຍພັກ; ສະຫາຍ ສູນທອນ ພັນທະວົງ, ສະຫາຍ ບຸນທະວີ ແສນດີ ແລະ ສະຫາຍ ພູຫວິງ ໄຊຍະວົງ ເປັນກໍາມະການພັກ. ນອກຈາກນັ້ນ, ສະມາຊິກພັກຍັງໄດ້ໃຊ້ສິດປະຊາທິປະໄຕຂອງຕົນເລືອກເອົາຜູ້ແທນສົມບູນ ແລະ ຜູ້ແທນສໍາຮອງ ໄປເຂົ້າຮ່ວມກອງປະຊຸມໃຫ່ຍຄັ້ງທີ VIII ຂອງຄະນະປະຈໍາພັກນະຄອນຫຼວງວຽງຈັນທີ່ຈະເປີດຂຶ້ນໃນຕໍ່ໜ້າ ໂດຍມີຜູ້ສະໝັກທັງໝົດ 3 ສະຫາຍຄື: ສະຫາຍ ຄໍາສຸກ ແສງມີໄຊ, ສະຫາຍ ບຸນມາ ດວງມາລາສິນ ແລະ ສະຫາຍ ບຸນທະວີ ແສນດີ, ຜົນການເລືອກຕັ້ງໄດ້ດັ່ງນີ້: ສະຫາຍ ຄໍາສຸກ ແສງມີໄຊ ເປັນຜູ້ແທນສົມບູນເພື່ອເຂົ້າຮ່ວມກອງປະຊຸມໃຫ່ຍຄັ້ງທີ VIII ຂອງຄະນະປະຈໍາພັກນະຄອນຫຼວງວຽງຈັນ ແລະ ສະຫາຍ ບຸນມາ ດວງມາລາສິນ ເປັນຜູ້ແທນສໍາຮອງເພື່ອເຂົ້າຮ່ວມກອງປະຊຸມໃຫ່ຍຄັ້ງທີ VIII ຂອງຄະນະປະຈໍາພັກນະຄອນຫຼວງວຽງຈັນ. ໃນຕອນທ້າຍໄດ້ຮັບຟັງການໂອ້ລົມຈາກທ່ານ ບຸນທອງ ພົມມະຈັນ ຄະນະປະຈໍາພັກນະຄອນຫຼວງວຽງຈັນ ຕື່ມອີກ ແລະ ກອງປະຊຸມໃຫ່ຍດັ່ງກ່າວໄດ້ປິດລົງໃນຕອນເຊົ້າຂອງວັນທີ 27 ພຶດສະພາ 2020.

by:sack

03/06/2020

ປະຕິທິນ

Jul-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ