ຈັດຝຶກອົບຮົມການສ້າງຄວາມເຂັ້ມແຂງໃຫ້ແກ່ພະນັກງານກົມກວດກາ

   ເພື່ອເປັນການປະຕິບັດຕາມຂໍ້ຕົກລົງ ຫົວໜ້າອົງການໄອຍະການປະຊາຊົນສູງສຸດ ວ່າດ້ວຍການອະນຸມັດໄຂຊຸດຝຶກອົບຮົມການສ້າງ ຄວາມເຂັ້ມແຂງໃຫ້ແກ່ພະນັກງານ ຂອງກົມກວດກາ ອົງການໄອຍະການປະຊາຊົນສູງສຸດ ສະບັບເລກທີ 817/ອອປສ, ລົງວັນທີ 29/11/2019. ໃນຕອນເຊົ້າຂອງວັນທີ 7 ຫາ 9 ກໍລະກົດ 2020 ກົມກວດກາ ອົງການໄອຍະການປະຊາຊົນສູງສຸດ ໄດ້ຈັດຝຶກອົບຮົມສ້າງຄວາມເຂັ້ມແຂງວຽກງານກວດກາ ໃຫ້ພະນັກງານກົມກວດກາ ຂຶ້ນຢູ່ທີ່ໂຮງແຮມ Thavisouk Island ເມືອງວັງວຽງ, ແຂວງວຽງຈັນ. ໂດຍໃຫ້ກຽດເປັນປະທານຂອງ ທ່ານ ສອນສະຫວັນ ແສງອະໄພ ຄະນະພັກ, ຫົວໜ້າກົມກວດກາ ອົງການໄອຍະການປະຊາຊົນສູງສຸດ, ມີຄູຝຶກ, ນັກສຳມະນາກອນຈາກ ອອປສ ແລະ ອົງການໄອຍະການເຂດ II ແຂວງວຽງຈັນ ເຂົ້າຮ່ວມທັງໝົດ 23 ທ່ານ.

   ການຈັດຝຶກອົບຮົມໃນຄັ້ງ ໄດ້ດຳເນີນໄປເປັນເວລາ 03 ວັນ ຊຶ່ງໄດ້ຮັບຟັງການຂຶ້ນສະເໜີເອກະສານ ແລະ ບາງບົດຮຽນ ກ່ຽວກັບວຽກງານຕິດຕາມ, ກວດກາ ຈາກວິທະຍາກອນ ຂອງຄະນະກົມກວດກາ; ການຈັດຝຶກອົບຮົມໃນຄັ້ງນີ້ ແມ່ນເປັນເທື່ອທຳອິດ ທີ່ໄດ້ຈັດຂຶ້ນ ຢູ່ເມືອງວັງວຽງ, ແຂວງວຽງຈັນ ເປົ້າໝາຍແມ່ນຈະເລັ່ງໃສ່ບັນດາທ່ານທີ່ເຮັດວຽກງານຕິດຕາມ, ກວດກາ ກໍຄືພະນັກງານຂອງກົມກວດກາ ໃນປະຈຸບັດ ແລະ ອະນາຄົດ ເພື່ອຈະສ້າງໃຫ້ເປັນພະນັກງານຕິດຕາມ, ກວດກາແບບອາຊີບ. ບົດຮຽນທີ່ຈະນຳມາຖ່າຍທອດ ຫຼື ແລກປ່ຽນນຳບັນດານັກຝຶກອົບຮົມລ້ວນແລ້ວແຕ່ເປັນຫົວຂໍ້ ແລະ ບົດຮຽນທີ່ສຳຄັນຫຼາຍຕໍ່ນັກຝຶກອົບຮົມ.

        

   ໂດຍໃຫ້ກຽດການບັນຍາຍເນື້ອໃນທີ່ສຳຄັນໂດຍ ທ່ານ ສອນສະຫວັນ ແສງອະໄພ ຄະນະພັກ, ຫົວໜ້າກົມກວດກາ ອອປສ, ທ່ານ ພູວຽງ ວົງໄຊ ຮອງຫົວໜ້າກົມກວດກາ ອອປສ, ທ່ານ ວິລະວົງ ພົມກອງ ຮອງຫົວໜ້າກົມກວດກາ ອອປສ. ການບັນຍາຍໃນຄັ້ງນີ້ມີຫົວຂໍ້ທີ່ສຳ ຄັນຫຼາຍຫົວຂໍ້ ຄື:

  1. ຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມກວດກາ ສະບັບເລກທີ 783/ອອປສ, ລົງວັນທີ 25/12/2018 ຂອງທ່ານຫົວໜ້າອົງການໄອຍະການປະຊາຊົນສູງສຸດ;
  2. ວຽກງານຕິດຕາມ, ກວດກາພັກ;
  3. ວຽກງານຕິດຕາມ, ກວດກາລັດ;
  4. ວຽກງານຕ້ານການສໍ້ລາດບັງຫຼວງ;
  5. ວຽກງານການຄົ້ນຄວ້າ ແລະ ແກ້ໄຂຄຳຮ້ອງທຸກ.

  ພາຍຫຼັງຈາກຮັບຟັງການບັນຍາຍເນື້ອໃນທີ່ສຳຄັນຈາກບັນດາທ່ານແລ້ວ ນັກສຳມະນາກອນແຕ່ລະທ່ານຍັງໄດ້ມີການແລກປ່ຽນ ຖອດຖອນບົດຮຽນເຊິ່ງກັນ ແລະ ກັນ ລະຫວ່າງ ອາຈານຜູ້ສິດສອນ ແລະ ນັກຝຶກອົບຮົມ.

        

   ການຈັດຝຶກອົບຮົມໃນຄັ້ງນີ້ຖືເປັນບາດກ້າວທຳອິດ ແລະ ເປັນພື້ນຖານອັນສຳຄັນໃຫ້ແກ່ການຈັດຝຶກອົບຮົມກ່ຽວກັບວຽກງານ ກວດກາ ໃຫ້ແກ່ພະນັກງານທີ່ເຮັດງຽກກວດກາໃນຂົງເຂດ ອົງການໄອຍະການທົ່ວປະເທດ ໃນຕໍ່ໜ້າ. ໃນການຝຶກອົບຮົມ ການສ້າງຄວາມເຂັ້ມແຂງແຂ່ງກັບວຽກງານກວດກາໃຫ້ພະນັກງານຂອງກົມກວດກາຄັ້ງນີ້ໄດ້ສຳເລັດລົງດ້ວຍໝາກຜົນອັນຈົບງາມ, ໄດ້ຕາມຈຸດປະສົງ, ຕາມຄາດໝາຍທີ່ວາງໄວ້ ແລະ ເຖິ່ງຢ່າງໃດກໍຕາມຍັງຈະຕ້ອງໄດ້ສືບຕໍ່ສູ້ຊົນສ້າງໃຫ້ວຽກງານຕິດຕາມ, ກວດກາພັກ, ຕິດຕາມ, ກວດກາລັດ, ຕ້ານການສໍ້ລາດບັງຫຼວງ, ການຄົ້ນຄວ້າ, ແກ້ໄຂຄຳຮ້ອງ ໃຫ້ກວ້າງຂວາງ ແລະ ໃຫ້ເປັນຄວາມຮັບຜິດຊອບຂອງໝົດທຸກຄົນ ເວົ້າລວມ ເວົ້າສະເພາະ ພະນັກງານທີ່ເຮັດວຽກງານກວດກາແຕ່ຂັ້ນສູນກາງຮອດທ້ອງຖິ່ນ ໃນຂົງເຂດອົງການໄອຍະການປະຊາຊົນ.

by:ແສງພະຈັນ

09/07/2020

ປະຕິທິນ

Aug-2020
S M T W T F S
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ