ກອງປະຊຸມປືກສາຫາລືການດຳເນີນຄະດີຂະບວນຍຸຕິທຳ

        ຕອນເຊົ້າຂອງວັນທີ 05 ທັນວາ 2017 ໄດ້ເປີດກອງປະຊຸມປຶກສາຫາລືການດຳເນີນຄະດີຂະບວນຍຸຕິທຳ ຄັ້ງທີ V ທີ່ ນະຄອນຫລວງວຽງຈັນ ໃນເວລາ 8:00 ໂມງ ໂດຍເປັນປະທານຂອງ ທ່ານ ໄຊສີ ສັນຕິວົງ ລັດຖະມົນຕີ ກະຊວງຍຸຕິທຳ, ທ່ານ ພຈົວ ປອ ສົມຫວັງ ກຳມະສິດ ຮອງລັດຖະມົນຕີ ກະຊວງ ປ້ອງກັນຄວາມສະຫງົບ, ທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ, ທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດ. ໃນການເຂົ້າຮ່ວມກອງປະຊຸມຄັ້ງນີ້ຍັງມີບັນດາຜູ້ຕາງໜ້າຈາກສະພາແຫ່ງຊາດ, ຫ້ອງວ່າການສຳນັກງານນາຍົກລັດຖະມົນຕີ, ອົງການກວດກາລັດຖະບານ, ບັນດາກົມກອງຂອງ 4 ພາກສ່ວນເຂົ້າຮ່ວມຈໍານວນ 80 ທ່ານ, ຍິງ 7 ທ່ານ.

           ໃນນັ້ນກອງປະຊຸມໄດ້ດຳເນີນເປັນເວລາ 01 ວັນ ຊຶ່ງເປັນເອກະພາບຕໍ່ເນື້ອໃນບົດລາຍງານທີ່ໄດ້ຕີລາຄາສະພາບລວມກ່ຽວກັບການດຳເນີນຄະດີຂະບວນການຍຸຕິທຳໃນຄັ້ງຜ່ານມາ ໂດຍຍົກໃຫ້ເຫັນດ້ານດີພົ້ນເດັ່ນ, ຜົນງານທີ່ເຮັດໄດ້, ດ້ານອ່ອນ-ຄົງຄ້າງ, ບົດຮຽນທີ່ຖອດຖອນໄດ້, ກໍານົດທິດທາງແຜນການສູ້ຊົນໃນປີຕໍ່ໜ້າ ແລະ ມາດຕະການການຈັດຕັ້ງປະຕິບັດ. ພ້ອມກັນນັ້ນໄດ້ຮັບຟັງການລາຍງານ ແລະ ປະກອບຄຳເຫັນຂອງ ກະຊວງປ້ອງກັນຄວາມສະຫງົບ, ອົງການໄອຍະການປະຊາຊົນສູງສຸດ, ກຳມະທິການຍຸຕິທຳແຫ່ງຊາດ ແລະ ກະຊວງຍຸຕິທຳ ທີ່ພົວພັນການດຳເນີນຄະດີຕາມຂະບວນຍຸຕິທຳ. ຜົນການຮັບຟັງລາຍງານດັ່ງກ່າວກອງປະຊຸມໄດ້ຄົ້ນຄວ້າປະກອບຄໍາເຫັນ ຊຶ່ງໄດ້ມີຄວາມເປັນເອກະພາບຕີລາຄາດ້ານດີ, ດ້ານອ່ອນ-ຄົງຄ້າງ.

          ພິເສດ ກອງປະຊຸມໄດ້ຮັບກຽດເປັນຢ່າງສູງ ຄໍານັບຮັບຕ້ອນການເຂົ້າຮ່ວມຂອງ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ຊຶ່ງເປັນການນໍາເອົາຄວາມອົບອຸ່ນອັນໃຫຍ່ຫລວງຈາກກົມການເມືອງສູນກາງພັກ ແລະ ລັດຖະບານມາສູ່ກອງປະຊຸມ. ພ້ອມນີ້ ທ່ານ ຍັງໄດ້ໃຫ້ກຽດໂອ້ ລົມຕໍ່ກອງປະຊຸມ ຊຶ່ງເນື້ອໃນດັ່ງກ່າວ ມີຄວາມສຳຄັນເປັນຢ່າງຍິ່ງ ແລະ ຖືເປັນທິດຊີ້ນໍາໃຫ້ແກ່ 4  ພາກສ່ວນ ທີ່ເຮັດໜ້າທີ່ໃນການດຳເນີນຄະດີຂະບວນຍຸຕິທຳ ນຳໄປຈັດຕັ້ງປະຕິບັດໃຫ້ມີຄວາມກົມກຽວ, ຖືກຕາມແນວທາງ ແລະ ກົດໝາຍ, ມີຄວາມໂປ່ງໃສ, ຍຸຕິທຳ ແລະ ມີປະສິດທິຜົນ.

ຈາກນັ້ນກອງປະຊຸມໄດ້ຜ່ານ ແລະ ລົງລາຍເຊັນໃນບົດບັນທຶກຮ່ວມຂອງ 4 ພາກສ່ວນ ໂດຍມອບໃຫ້ແຕ່ລະອົງການນຳໄປຈັດຕັ້ງປະຕິບັດ ເພື່ອແກ້ໄຂບັນຫາຂໍ້ຄົງຄ້າງສະເພາະຂອງຂະແໜງການ ແລະ ບັນຫາຄົງຄ້າງທີ່ເປັນອັນ ລວມທີ່ຈະໄດ້ແກ້ໄຂຮ່ວມກັນກ່ຽວກັບການດຳເນີນຄະດີຂະບວນຍຸຕິທຳ ຄັ້ງທີ V ໄດ້ສໍາເລັດຕາມລະດັບຄາດໝາຍ ແລະ ເຫັນດີເປັນເອກະພາບມອບໃຫ້ສານປະຊາຊົນສູງສຸດ ເປັນເຈົ້າພາບຈັດກອງປະຊຸມຄັ້ງທີ VI ຕໍ່ໄປ.

ນັກຂ່າວ ອອປສ

by:anousack

07/12/2017

ປະຕິທິນ

Aug-2018
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ