ສ້າງຄວາມເຂັ້ມແຂງໃນການຕ້ານອາຊະຍະກຳຂ້າມຊາດທີ່ມີການຈັດຕັ້ງໂດຍເນັ້ນໜັກໃສ່ບັນຫາການຟອກເງີນ, ການຄ້າມະນຸດ ແລະ ຫຼັກຖານໃນຄະດີອາຍາ

       ໃນລະຫວ່າງວັນທີ 28 ຫາ 30 ກໍລະກົດ 2020, ກອງປະຊຸມສ້າງຄວາມເຂັ້ມແຂງໃນການຕ້ານອາຊະຍາກໍາຂ້າມຊາດທີ່ມີການຈັດຕັ້ງ, ໂດຍເນັ້ນໃສ່ບັນຫາການຟອກເງິນ, ການຄ້າມະນຸດ ແລະ ຫຼັກຖານໃນຄະດີອາຍາ ໄດ້ໄຂຂຶ້ນຢ່າງເປັນທາງການ ທີ່ ຫ້ອງປະຊຸມໃຫ່ຍພະແນກການເງິນ ແຂວງຫຼວງພະບາງ ພາຍໃຕ້ການເປັນປະທານ ຂອງ ທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ, ມີ ທ່ານ ຣີຊາດ ຟີລິບປາດ ປະທານສະຖາບັນຊ່ວຍເຫຼືອທາງດ້ານກົດໝາຍ ແລະ ວິຊາການ ແຫ່ງຣາຊະອານາຈັກລຸກຊຳບວກປະຈຳ ສປປ ລາວ ເປັນປະທານຮ່ວມກອງປະຊຸມ, ພະນັກງານທີ່ມາຈາກອົງການໄອຍະການປະຊາຊົນ, ສານປະຊາຊົນ ແລະ ເຈົ້າໜ້າທີ່ ປກສ ຈາກ 7 ແຂວງພາກເໜືອ ເຂົ້າຮ່ວມລວມທັງໝົດ 80 ທ່ານ.

        ກອງປະຊຸມໄດ້ຄົ້ນຄວ້າແລກປ່ຽນບົດຮຽນກ່ຽວກັບ ເນື້ອໃນຕົ້ນຕໍຂອງອາຊະຍາກຳຂ້າມຊາດທີ່ມີການຈັດຕັ້ງໂດຍສະເພາະບັນຫາການຟອກເງິນ ແລະ ຄ້າມະນຸດ ຊຶ່ງເປັນບັນຫາສິ່ງທ້າທາຍ ແລະ ສ້າງຄວາມເສຍຫາຍຕໍ່ສັງຄົມກໍ່ຄືຕໍ່ຊີວິດ, ຊັບສິນຂອງປະຊາຊົນ ແລະ ຕໍ່ການພັດທະນາເສດຖະກິດ-ສັງຄົມຂອງປະເທດທັງຍັງເປັນອາຊະຍາກໍາທີ່ມີລັກສະນະທີ່ແຜ່ຫຼາຍໃນທົ່ວໂລກກໍຄືປະເທດເຮົາ ຊຶ່ງມັນຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງໂດຍສະເພາະແມ່ນຂົງເຂດປົກປ້ອງກົດໝາຍຈະຕ້ອງໄດ້ຮ່ວມມືກັນພ້ອມກັນຕ້ານ ແລະ ສະກັດກັ້ນ ເພື່ອນໍາເອົາຜູ້ກະທໍາຜິດມາລົງໂທດຕາມກົດໝາຍ.

 
 

      ແນ່ໃສ່ເຮັດໃຫ້ສັງຄົມມີຄວາມສະຫງົບ, ປະເທດຊາດມີສະຖຽນລະພາບທາງດ້ານການເມືອງ ແລະ ເສດຖະກິດແຫ່ງຊາດໄດ້ຮັບການພັດທະນາຢ່າງໝັ້ນຄົງ.  ທີ່ປະຊຸມຍັງໄດ້ສ້າງຄວາມຮັບຮູ້ເຂົ້າໃຈຕໍ່ບັນຫາອາຊະຍາກໍາການຟອກເງິນ ທີ່ເກີດຂຶ້ນຢູ່ພາຍໃນ, ພາກພື້ນ ແລະ ໃນໂລກ ແລະ ຫັຼກຖານໃນການດໍາເນີນຄະດີອາຍາໂດຍເນັ້ນໃສ່ການສົນທະນາແລກປ່ຽນບົດຮຽນດ້ວຍການນໍາສະເໜີທາງດ້ານທິດສະດີ, ການເຮັດຈໍາລອງກ່ຽວກັບການດໍາເນີນຄະດີການຟອກເງິນ, ກໍລະນີສຶກສາ ແລະ ການປະກອບຄໍາຄິດເຫັນຈາກປະສົບການຕົວຈິງຈາກວິທະຍາກອນ ແລະ ບັນດາຊ່ຽວຊານຮັບເຊີນຈາກຕ່າງປະເທດຈໍານວນໜຶ່ງ.

       ໃນໂອກາດດັ່ງກ່າວ ທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ໄດ້ຮຽກຮ້ອງມາຍັງຜູ້ເຂົ້າຮ່ວມທຸກທ່ານ ຈົ່ງພ້ອມກັນແລກປ່ຽນບົດຮຽນເຊິ່ງກັນ ແລະ ກັນຢ່າງເລິກເຊິ່ງ ໂດຍສະເພາະບັນຫາອາຊະຍາກໍາທີ່ເກີດຂຶ້ນຢູ່ພາຍໃນປະເທດທີ່ສ້າງຄວາມເສຍຫາຍໃຫ້ແກ່ປະຊາຊົນ ແລະ ປະເທດຊາດ, ສ້າງກົນໄກການປະສານງານ ແລະ ການຮ່ວມມືທີ່ດີໃນຂົງເຂດຍຸຕິທໍາລວມທັງການຮ່ວມມືສາກົນໃຫ້ໄດ້ຮັບຜົນດີ, ຖອດຖອນບົດຮຽນໃນການເກັບກໍາຫັຼກຖານໃນການດໍາເນີນຄະດີອາຍາ, ການສັ່ງຟ້ອງຄະດີຟອກເງິນ ເພື່ອພ້ອມກັນປະຕິບັດພາລະບົດບາດ, ໜ້າທີ່ຂອງໃຜລາວໃຫ້ໄດ້ຮັບຜົນດີ ແນໃສ່ເຮັດໃຫ້ການດໍາເນີນຄະດີຖືກຕ້ອງ, ຄົບຖ້ວນ, ຮອບດ້ານ, ພາວະວິໃສ ແລະ ທັນເວລາ.

ກອງປະຊຸມຄັ້ງນີ້ໄດ້ດໍາເນີນຮອດວັນທີ 30 ກໍລະກົດ 2020 ຈິ່ງຈະປິດລົງດ້ວຍຜົນສໍາເລັດອັນຈົບງາມ.

by:sack

29/07/2020

ປະຕິທິນ

Aug-2020
S M T W T F S
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ