ພິທີສະເຫຼີມສະຫຼອງວັນສ້າງຕັ້ງໂຮງຮຽນບຳລຸງສ້າງວຽກງານໄອຍະການ ສສ ຫວຽດນາມ

      ໂດຍຕອບສະໜອງຕາມການເຊື້ອເຊີນຂອງ ທ່ານ ເລມິງ ຈິ ກໍາມະການສູນກາງພັກຄອມມຸຍນິດຫວຽດນາມ,ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ, ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ນຳໂດຍ ທ່ານ ຄໍາສານ ສຸວົງ ກໍາມະການສູນກາງພັກ,ເລຂາຄະນະພັກ, ຫົວໜ້າອົງການໄອຍະການປະຊາຊົນສູງສຸດ ພ້ອມດ້ວຍຄະນະ 07 ທ່ານ ໄດ້ເດີນທາງເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງໂຮງຮຽນບໍາລຸງສ້າງວຽກງານໄອຍະການຄົບຮອບ 40 ປີ ທີ່ ນະຄອນໂຮ່ຈິມິນ ສສ ຫວຽດນາມ ແຕ່ວັນທີ 4 ຫາ 6 ມັງກອນ 2018.

    ການສະເຫຼີມສະຫຼອງວັນສ້າງຕັ້ງ ໂຮງຮຽນ ບໍາລຸງສ້າງວຽກງານໄອຍະການຄົບຮອບ 40 ປີໃນຄັ້ງນີ້ ທ່ານ ຫົວໜ້າອົງການໄອຍະການປະຊາຊົນສູງສຸດ ໄດ້ຕາງໜ້າ ພັກ ແລະ ລັດຖະບານລາວ ກໍຄື ໃນນາມອົງການໄອຍະການປະຊາຊົນ ແຫ່ງ ສປປ ລາວ ໄດ້ຕີລາຄາສູງຕໍ່ຜົນງານ ແລະ ການເຄື່ອນໄຫວຕະຫລອດໄລຍະເວລາ 40 ປີ ຜ່ານມາເຊິ່ງໄດ້ມີຜົນງານຫຼາຍດ້ານ ໂດຍສະເພາະ ແມ່ນການກໍ່ສ້າງດ້ານວິຊາສະເພາະໃຫ້ແກ່ພະນັກງານອົງການໄອຍະການປະຊາຊົນ ແຫ່ງ ສປປ ລາວ. ໂດຍເຫັນໄດ້ຄວາມໜາຍຄວາມສຳຄັນໃນການສ້າງຄວາມສາມາດທາງດ້ານວິຊາການໃຫ້ແກ່ພະນັກງານຂອງສອງອົງການໄອຍະການປະຊາຊົນ ທັງສອງປະເທດ  ນັບແຕ່ປີ 1999 ເປັນຕົ້ນມາ 

ອົງການໄອຍະການປະຊາຊົນ ແຫ່ງ ສສ ຫວຽດນາມ ໄດ້ມີການຮ່ວມມື ແລະ ເຊັນບົດບັນທຶກຮ່ວມກັນໂດຍເນັ້ນໃສ່ການແລກປ່ຽນຄະນະຜູ້ແທນໃນດ້ານວິຊາການຮ່ວມກັນ ແລະ ຊ່ວຍເຫຼືອໃນການບຳລຸງກໍ່ສ້າງພະນັກງານໄອຍະການປະຊາຊົນ ແຫ່ງ ສປປ ລາວ ມາຮອດປັດຈຸບັນ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໄດ້ຈັດຊຸດຝຶກອົບຮົມວຽກງານໄອຍະການ ໃຫ້ແກ່ພະນັກງານໄອຍະການຂອງ ສປປ ລາວ  ຈຳນວນ 12 ຊຸດ ມີພະນັກງານເຂົ້າຮ່ວມ 189 ທ່ານ ໃນນີ້ໄດ້ຝຶກອົບຮົມຢູູ່ໂຮງຮຽນບຳລຸງສ້າງວຽກງານໄອຍະການ ນະຄອນ ໂຮ່ຈິມິນ ຈໍານວນ 04 ຊຸດ ມີພະນັກງານເຂົ້າຮ່ວມ 77 ທ່ານ ແລະ ບັນດາທ່ານທີ່ໄດ້ຮັບຝຶກອົບຮົມແລ້ວກໍໄດ້ບັນຈຸເຂົ້າໃນຕຳແໜ່ງງານຕ່າງໆ ແລະ ໜູນໃຊ້ບົດຮຽນທີ່ໄດ້ຮຽນມາຜັນຂະຫຍາຍເຂົ້າໃນວຽກງານຕົວຈິງຢູ່ໃນແຕ່ລະຂົງເຂດຢ່າງມີປະສິດທິຜົນສູງ.

     ການເຂົ້າຮ່ວມສະເຫຼີມສະຫຼອງວັນສ້າງຕັ້ງໂຮງຮຽນ ບໍາລຸງສ້າງວຽກງານໄອຍະການ ໃນຄັ້ງນີ້ ທ່ານ ຄໍາສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ກໍໄດ້ເປັນກຽດປະດັບຫຼຽນໄຊແຮງງານຊັ້ນ II ຕາມລັດຖະດຳລັດ ຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ສະບັບເລກທີ 325/ປປທ,ລົງວັນທີ 25 ທັນວາ 2017 ໃຫ້ແກ່ໂຮງຮຽນ ບໍາລຸງສ້າງວຽກງານໄອຍະການ ນະຄອນໂຮ່ຈິມິນ ແລະ ມອບ ໃບຍ້ອງຍໍຂອງ ທ່ານ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ໃຫ້ແກ່ຄະນະອຳນວຍການໂຮງຮຽນບໍາລຸງສ້າງວຽກງານໄອຍະການ ຈຳນວນ 04 ທ່ານ ເພື່ອເປັນການຍ້ອງຍໍຊົມເຊີຍຕໍ່ຜົນງານອັນລ້ຳຄ່າທີ່ ພັກ - ລັດ ກໍ່ຄື ອົງການໄອຍະການປະຊາຊົນ ແຫ່ງ ສສ ຫວຽດນາມ ທີ່ໄດ້ປະກອບສ່ວນສະໜັບສະໜູນຊ່ວຍເຫຼືອແກ່ອົງການໄອຍະການປະຊາຊົນ ແຫ່ງ ສປປ ລາວ.

ໃນໂອກາດຢູ່ຢ້ຽມຢາມ ນະຄອນ ໂຮ່ຈິມິນ ໃນຄັ້ງນີ້ ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ຍັງໄດ້ເຂົ້າຢ້ຽມພົບປະ ທ່ານ ເລມິງ ຈິ ກໍາມະການສູນກາງພັກຄອມມຸຍນິດຫວຽດນາມ,ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ແລະ ເຂົ້າຢ້ຽມຂ່ຳນັບ  ທ່ານ ເຕິດ ແທັງກາງ ຮອງເລຂາຄະນະປະຈໍາ, ປະທານ ຄະນະປົກຄອງນະຄອນໂຮ່ຈິມິນ   ແລະ ໄດ້ໄປຢ້ຽມຢາມ ເມືອງ ກູຈິ ເມືອງປະຫວັດສາດ ແຫ່ງການຕໍ່ສູ້ປົດປ່ອຍ ນະຄອນ ໂຮ່ຈິມິນ ໃນສະໄໝຕໍ່ສູ້ກູ້ຊາດ ຕ້ານຈັກກະພັດຜູ້ຮູກຮານ ແລະ ໄດ້ເດີນທາງກັບຄືນປະເທດດ້ວຍຄວາມສະຫວັດດີພາບທຸກປະການ.

by:sack

15/01/2018

ປະຕິທິນ

Sep-2018
S M T W T F S
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ