ວັນສ້າງຕັ້ງກອງທັບປະຊາຊົນລາວ ຄົບຮອບ 69 ປີ

         ໃນຕອນເຊົ້າຂອງ ວັນທີ 19 ມັງກອນ 2018, ທີ່ ອົງການໄອຍະການປະຊາຊົນສູງສຸດໄດ້ຈັດຕັ້ງປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 68 ປີ (20 ມັງກອນ 1949 ຫາ 20 ມັງກອນ 2018) ຂື້ນໃຫ້ກຽດເຜີຍແຜ່ເອກະສານໃນຄັ້ງນີ້; ໂດຍ ທ່ານ ພົ/ວ ຄຳຫລ້າ ໄຊຍະສຸກ ຄະນະພັກ ກະຊວງ, ອໍານວຍການວິທະຍາຄານປ້ອງກັນຊາດໄກສອນພົມວິຫານ, ເຂົ້າຮ່ວມຟັງປະຖະກະຖາຄັ້ງນີ້ມີຄະນະພັກ, ຄະນະນຳອົງການໄອຍະການປະຊາຊົນສູງສຸດ, ບັນດາຫົວໜ້າກົມ, ຫ້ອງການ, ແລະ ສະຖາບັນຄົ້ນຄ້ວາຝຶກອົບຮົມໄອຍະການ ພ້ອມດ້ວຍພະນັກງານລັດຖະກອນທັງໝົດເຂົ້າຮ່ວມ ຈຳນວນ 150 ກ່ວາຄົນ.

        ທ່ານ ພົ/ວ ຄຳຫລ້າ ໄຊຍະສຸກ ຄະນະພັກ ກະຊວງອໍານວຍການວິທະຍາຄານປ້ອງກັນຊາດໄກສອນພົມວິຫານໄດ້ເລົ່າຄືນເຖິງ ວັນທີ 20 ມັງກອນ 1949 ແມ່ນວັນສ້າງຕັ້ງກອງທັບລາວອິດອສະຫຼະ (ກອງທັບປະຊາຊົນລາວໃນປັດຈຸບັນ) ເຊິ່ງໄດ້ຮັບການສ້າງຕັ້ງຂຶ້ນຢ່າງເປັນທາງການຢູ່ເຂດລາວຮຸ່ງພຽງສາ ເມືອງຊຽງຄໍ້ ແຂວງຫົວພັນ ໂດຍແມ່ນ ປະທານ  ໄກສອນ ພົມວິຫານ ເປັນຜູ້ບັນຊາໂດຍກົງ; ນັບແຕ່ໄດ້ຮັບການສ້າງຕັ້ງມາພາຍໃຕ້ການນຳພາຂອງພັກທີ່ມີແນວທາງການເມືອງ ແລະ ການທະຫານອັນຖືກຕ້ອງ ແລະ ປະດິດສ້າງ,ກອງທັບປະຊາຊົນລາວ ໄດ້ເຕີບໃຫຍ່ເຂັ້ມແຂງ ແລະກ້າວຂຶ້ນຍາດເອົາ ໄຊຊະນະຢ່າງເນື່ອງນິດລຽນຕິດ, ຍິ່ງຕີຍິ່ງເຕີບໃຫຍ່ເຂັ້ມແຂງໃນແຕ່ລະໄລຍະ.

            ອັນພົ້ນເດັ່ນແມ່ນໄລຍະ ປີ 1973 ຫາ 1975 ເປັນໄລຍະຕໍ່ສູ້ປົກປັກຮັກສາສັນຕິພາບຄວາມຖືກຕ້ອງປອງດອງຊາດ,ປຸກລະດົມຂົນຂວາຍປະຊາຊົນບຸກໂຈມຕີຮອບດ້ານ ແລະ ນຳໃຊ້ 03 ບາດຄ້ອນຍຸດທະສາດ (ການລຸກຮື້ຂຶ້ນຂອງມະຫາຊົນ, ການໜູນໜີບຂອງກຳລັງປະກອບອາວຸດ ແລະ ການແຍກຕົວອອກຂອງກຳລັງທະຫານສັດຕູ) ຈົນສາມາດປົດປ່ອຍປະເທດຊາດຢ່າງສົມບູນ ແລະ ສ້າງຕັ້ງລະບອບ ສາທາລະນະລັດ ປະຊາທິປະໄຕ ປະຊາຊົນລາວ, ວັນທີ 2 ທັນວາ 1975ພ້ອມກັນນີ້ກອງທັບປະຊາຊົນລາວຍັງໄດ້ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດສ້າງຜົນງານໃນຫຼາຍດ້ານພົ້ນເດັ່ນແມ່ນສາມາດປ້ອງກັນ, ປົກປັກຮັກສາເຂດນໍ້າແດນດີນ, ອໍານາດອະທິປະໄຕ ແລະຜືນແຜ່ນດີນອັນຄົບຖ້ວນໄດ້ຢ່າງໜັ້ນຄົງ.

        ຈາກຜົນງານດັ່ງກ່າວ,  ທ່ານ ພົ/ວ ຄຳຫລ້າ ໄຊຍະສຸກ ຄະນະພັກ ກະຊວງອໍານວຍການວິທະຍາຄານປ້ອງກັນຊາດໄກສອນພົມວິຫານ ໄດ້ເນັ້ນໃຫ້ບັນດາສະຫາຍ ຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ, ອົງການໄອຍະການປະຊາຊົນພາກກາງ, ສະຖາບັນຄົ້ນຄ້ວາ ແລະ ຝຶກອົບຮົມໄອຍະການ ພ້ອມດ້ວຍ ພະນັກງານ-ລັດຖະກອນທັງໝົດ  ຈົ່ງສືບຕໍ່ຮໍ່າຮຽນ ແລະ ເສີມຂະຫຍາຍມູນເຊື້ອອັນພິລະອາດຫານ ຂອງ ກອງທັບປະຊາຊົນລາວໃຫ້ຕິດພັນກັບການພັດທະນາລະບົບອົງການໄອຍະການປະຊາຊົນ ກໍ່ຄຶື: ປົກປັກຮັກສາ ແລະ ສ້າງສາພັດທະນາປະເທດຊາດຢ່າງຮອບດ້ານໜັ້ນຄົງ.

2018-01-19

ປະຕິທິນ

Feb-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ