ກອງປະຊຸມວຽກງານໄອຍະການປະຊາຊົນທົ່ວປະເທດ ປະຈຳປີ 2017

       ກອງປະຊຸມວຽກງານໄອຍະການປະຊາຊົນທົ່ວປະເທດ ປະຈຳປີ 2017 ແລະ ແຜນການເຄື່ອນໄກອງປະຊຸມວຽກງານໄອຍະການປະຊາຊົນທົ່ວປະເທດ ປະຈຳປີ 2017 ກອງປະຊຸມວຽກງານໄອຍະການປະຊາຊົນທົ່ວປະເທດ ປະຈຳປີ 2017 ແລະ ແຜນການເຄື່ອນໄຫວວຽກງານ ປະຈໍາປີ 2018 ໄດ້ເປີດຂື້ນຢ່າງເປັນທາງການໃນຕອນເຊົ້າຂອງ ວັນທີ 25 ຫາ 26 ມັງກອນ 2018, ເວລາ 8:00 ໂມງ   ທີ່ ສູນຮ່ວມມືສາກົນລາວ-ຍີປຸ່ນ (ICTC). ໂດຍການເປັນປະທານຂອງ ທ່ານ ຄຳສານ ສຸວົງ, ກຳມະການສູນກາງພັກ,ເລຂາຄະນະພັກ,ຫົວໜ້າອົງການໄອຍະການປະຊາຊົນສູງສຸດ, ໃນນັ້ນໃຫ້ກຽດເຂົ້າຮ່ວມ ໂດຍ ທ່ານ ນາງ ປານີ ຢາທໍ່ຕູ້, ກຳມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ໃຫ້ການໂອ້ລົມຕໍ່ກອງປະຊຸມ, ມີບັນດາທ່ານການນຳຂອງກໍາມາທິການຍຸຕິທຳສະພາແຫ່ງຊາດ, ສານປະຊາຊົນສູງສຸດ, ການນຳກະຊວງ-ອົງການອ້ອມຂ້າງສູນກາງ, ການນຳຂອງບັນດາແຂວງ-ນະຄອນຫຼວງ, ຫົວໜ້າອົງການໄອຍະການທະຫານຂັ້ນສູງ ແລະ ທະຫານພາກ, ອົງການໄອຍະການປະຊາຊົນພາກ, ແຂວງ-ນະຄອນຫຼວງ, ບັນດາກົມອ້ອມຂ້າງອົງການໄອຍະການປະຊາຊົນສູງສຸດ ເຂົ້າຮ່ວມທັງໝົດຈຳນວນ 170 ກວ່າທ່ານ.

      ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄຳເຫັນສຸມໃສ່ບັນດາເນື້ອໃນ ແລະ ວຽກງານທີ່ສຳຄັນ, ບົດສະຫຼຸບຕີລາຄາປະເມີນຜົນການຈັດຕັ້ງເຄື່ອນໄຫວວຽກງານຮອບດ້ານໃນ 1 ປີທີ່ ຜ່ານມາ, ຈຸດອ່ອນ-ຂໍ້ຄົງຄ້າງ ແລະ ທິດທາງແຜນການພັດທະນາວຽກງານອົງການໄອຍະການປະຊາຊົນປະຈຳປີ 2018 ຄື : ການຖອດຖອນ ແລະ ແລກປ່ຽນບົດຮຽນ, ປະສົບການໃນການປະຕິບັດວຽກງານໃຫ້ນັບມື້ນັບດີຂື້ນເປັນກ້າວໆ, ຊຶ່ງເປັນປີ ທີ 3 ແຫ່ງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X  ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII, ກ້າວເຂົ້າປີທີ 2 ແຫ່ງການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍສະມາຊິກພັກ ຄັ້ງທີ IV ຂອງອົງຄະນະພັກອົງການໄອຍະການປະຊາຊົນສູງສຸດ ດ້ວຍ 5 ແຜນງານ ແລະ 21 ໂຄງການເພື່ອພັດທະນະວຽກງານໄອຍະການປະຊາຊົນ 2016 ຫາ 2020 ແລະ 06 ຄາດໜາຍສູ້ຊົນໃນປີ 2017 ຜ່ານມາ. ເວົ້າລວມ, ການປະຕິບັດໜ້າທີ່ຂອງອົງການໄອຍະການປະຊາຊົນໃນທົ່ວປະເທດ. ເວົ້າສະເພາະ, ການເອົາໃຈໃສ່ຈັດຕັ້ງປະຕິບັດພາລະບົດບາດ, ສິດ ແລະ ໜ້າທີຂອງອົງການໄອຍະການຂັ້ນຕ່າງໆ ແມ່ນໄດ້ປະກອບສ່ວນເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ຜ່ານຮ່າງບົດສະຫລຸບການເຄື່ອນໄຫວວຽກງານຮອບດ້ານປະຈຳ 2017 ແລະ ທິດທາງແຜນການເຄື່ອນໄຫວວຽກງານປະຈໍາປີ 2018. ໃນປີ 2017 ຜ່ານມາສ້າງຕັ້ງອົງການໄອຍະການປະຊາຊົນເຂດຕື່ມ 2 ເຂດ ຄື : ເຂດ 1 ແຂວງໄຊສົມບູນ ແລະ ເຂດ 3 ແຂວງຈຳປາສັກ.

ມາຮອດງວດ IV ປີ 2017 ມີພະນັກງານ-ລັດຖະກອນ 1.692 ຄົນ ຍິງ 599 ຄົນ, ອອກພັກຜ່ອນຮັບເບັ້ຍບໍານານ 6 ຄົນ; ໃນນີ້ສັງກັດຢູ່ອົງການໄອຍະການປະຊາຊົນສູງສຸດ 236 ຄົນ ຍິງ 97 ຄົນ ກວມ 13,9%, ອົງການໄອຍະການປະຊາຊົນ 3 ພາກ 96 ຄົນ ຍິງ 32 ຄົນ ກວມ 5,67%, ອົງການໄອຍະການປະຊາຊົນແຂວງ-ນະຄອນຫຼວງ 537 ຄົນ ຍິງ 214 ຄົນ ກວມ 31,73%, ອົງການໄອຍະການປະຊາຊົນ 41 ເຂດ 709 ຄົນ ຍິງ 238 ຄົນ ກວມ 41,90% (ໃນນີ້ພະນັກງານໄອຍະການປະຊາຊົນເຂດປະຈຳເມືອງ 114 ຄົນ ຍິງ 18 ຄົນ). ພະນັກງານທີ່ມີລະດັບທິດສະດີການເມືອງຊັ້ນບໍາລຸງຮອດຊັ້ນກາງມີ 583 ຄົນ ຍິງ 154 ຄົນ, ແຕ່ຊັ້ນສູງຂຶ້ນເມືອຮອດປະລິນຍາເອກ 154 ຄົນ ຍິງ 17 ຄົນ (ໃນນີ້ປະລິນຍາເອກ 2 ຄົນ). ລະດັບວິຊາສະເພາະກົດໝາຍທີ່ຈົບກົດໝາຍຊັ້ນກາງຂຶ້ນເມືອ 1.299 ຄົນ ຍິງ 385 ຄົນ, ລະດັບວິຊາສະເພາະອື່ນ 386 ຄົນ ຍິງ 211 ຄົນ. ອົງການໄອຍະການທະຫານທົ່ວປະເທດມີພະນັກງານທັງໝົດ 285 ຄົນ ຍິງ 41 ຄົນ; ໃນນີ້ປະຈໍາຢູ່ອົງການໄອຍະການທະຫານຂັ້ນສູງ 35 ຄົນ ຍິງ 7 ຄົນ, ອົງການໄອຍະການທະຫານພາກ 92 ຄົນ ຍິງ 18 ຄົນ, ອົງການໄອຍະການທະຫານກອງພົນ, ກອງພັນໃຫຍ່, ກອງບັນຊາການທະຫານແຂວງ-ນະຄອນຫຼວງ, ວິທະຍາຄານ, ໂຮງໝໍໃຫຍ່, ໂຮງຮຽນໃຫຍ່ 158 ຄົນ ຍິງ 16 ຄົນ.

       ອົງການໄອຍະການປະຊາຊົນໃນທົ່ວປະເທດ ໄດ້ຮັບຄໍາຮ້ອງຂໍຕິດຕາມກວດກາການຈັດຕັ້ງປະຕິບັດຄໍາສີນຂອງສານ ຈໍານວນ 349 ເລື່ອງ, ແກ້ໄຂແລ້ວ 293 ເລື່ອງ, ຍັງພວມຄົ້ນຄວ້າ 56 ເລື່ອງ, ນອກນັ້ນອົງການໄອຍະການປະຊາຊົນຂັ້ນສູນກາງ  ແລະ ທ້ອງຖິ່ນຈໍານວນໜຶ່ງເຂົ້າຮ່ວມຄະນະສະເພາະກິດຂັ້ນສູນກາງລົງກວດກາບາງກະຊວງ ແລະ ແຂວງຈໍານວນໜຶ່ງ. ຜ່ານມາໄດ້ຮັບ ຄະດີອາ​ຍາ 18.040 ​ເລື່ອງ, ປະຕິບັດ​ສໍາ​ເລັດ 1.788 ​ເລື່ອງ ເທົ່າ​ກັບ9,91%, ພວມ​ປະຕິບັດ 16.252 ​ເລື່ອງ​ ເທົ່າ​ກັບ  90,08%. ຄະດີ​ແພ່ງ​ 6.886 ເລື່ອງ, ປະຕິບັດ​ສໍາ​ເລັດ 1.162 ​ເລື່ອງ ເທົ່າ​ກັບ 16,87%, ພວມ​ປະຕິບັດ 5.724 ​ເລື່ອງ ​ເທົ່າ​ ກັບ 83,12% ໃນໜຶ່ງປີຜ່ານມາເຫັນວ່າຖັນແຖວສະມາຊິກພັກ-ພະນັກງານໃນທົ່ວປະເທດລະບົບອົງການໄອຍະການປະຊາຊົນ ໄດ້ມີຄວາມໜັກແໜ້ນທາງ ດ້ານຄຸນທາດການເມືອງ, ມີຄວາມຮັບຜິດຊອບຕໍ່ໜ້າທີ່ວຽກງານ, ມີສະຕິຕໍ່ການຈັດຕັ້ງດີ, ຕັ້ງໜ້າປະຕິບັດສິດ ແລະ ໜ້າທີ່ດ້ວຍຄວາມຊື່ສັດບໍລິສຸດ, ລະບົບການຈັດຕັ້ງຂອງອົງການໄອຍະການປະຊາຊົນທຸກຂັ້ນໄດ້ຮັບການປັບປຸງໃຫ້ມີຄວາມເຂັ້ມແຂງກວ່າເກົ່າ,ການພັດທະນາບຸກລາກອນໄດ້ຮັບການຍົກສູງຂຶ້ນທາງດ້ານຈຳນວນ ແລະ ຄຸນນະພາບ.

by:sengphachan

25/01/2018

ປະຕິທິນ

Jul-2018
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ