ກອງປະຊຸມວິຊາການຂອງອົງການໄອຍະການປະຊາຊົນພາກເໜືອ,ອົງການໄອຍະການປະຊາຊົນແຂວງ7ແຂວງແລະອົງການໄອຍະການປະຊາຊົນ16ເຂດຂອງແຂວງພາກເໜືອຄັ້ງທີ III

       ໃນວັນທີ 20 ທັນວາ 2017 ຜ່ານມານີ້, ອົງການ​ໄອ​ຍະ​ການ​ປະຊາຊົນ​ພາກ​ເໜືອ​ ໄດ້​ເປີດ​ປະຊຸມວຽກ​ງານ​ວິຊາ​ການ ຄັ້ງທີ III ຂຶ້ນ​ຢ່າງ​ເປັນ​ທາງ​ການ​ ຢູ່ທີ່​ຫ້ອງປະຊຸມ​​ຂອງ​ພະ​ແນ​ກຍຸຕິ​ທຳ​ແຂວງ​ບໍ່​ແກ້ວ ພາຍໃຕ້ການເປັນປະທານຂອງທ່ານ ອຸ່ນຄຳ ພິດສະວົງ ເລຂາໜ່ວຍພັກ, ຫົວໜ້າອົງການໄອຍະການປະຊາຊົນພາກເໜືອ ໃນກອງປະຊຸມໄດ້ຮັບກຽດຕ້ອນຮັບທ່ານ  ສົມ​ລິດ ສີ​ຜາ​ວັນ ຮອງ​ເລຂາ​ພັກ​ແຂວງ ສະມາຊິກ​ສະພາ​ແຫ່ງ​ຊາດ​ ປະຈຳ​ເຂດ​ເລືອກ​ຕັ້ງ​ທີ 5 ແລະ ທັງເປັນປະທານ​ສະພາ​ປະຊາ ຊົນ​ແຂວງ​ບໍ່​ແກ້ວ, ມີບັນດາການນຳຂອງອົງ​ການ​ໄອ​ຍະ​ການ​ປະ​ຊາ​ຊົນ​ພາກ​ເໜືອ, ​ອົງການ​ໄອ​ຍະ​ການ​ທະຫານ​ພາກ​ເໜືອ, ອົງ​ການ​ໄອ​ຍະ​ການ​ປະ​ຊາ​ຊົນ​ 7 ແຂວງ​ ແລະ ອົງການ​ໄອ​ຍະ​ການ​ປະຊາຊົນ 16 ​ເຂດຂອງແຂວງພາກເໜືອ ເຂົ້າຮ່ວມທັງໝົດ ຈໍານວນ 60 ທ່ານ, ຍິງ 10 ທ່ານ, ກອງປະຊຸມໄດ້ຮັບຟັງການຜ່ານບົດສະຫຼຸບຕີລາຄາ ຜົນຂອງການຈັດຕັ້ງປະຕິບັດບົດບັນທຶກກອງປະຊຸມວິຊາການ ຄັ້ງທີ II ໃນໄລຍະ 1 ປີ ຜ່ານມາ ແລະ ກໍານົດທິດທາງແຜນການໃນປີຕໍ່ໜ້າ ໂດຍສະເພາະທິດທາງ ແລະ ມາດຕະການຈໍານວນໜຶ່ງດັ່ງນີ້:

  1. ກອງປະຊຸມໄດ້ເຫັນດີເຫັນພ້ອມຮັບຮອງເອົາ 5 ທິດທາງ ໃນການຈັດຕັ້ງປະຕິບັດໜ້າທີ່ວຽກງານ ຕາມພາລະບົດບາດ, ສິດ ແລະ ໜ້າທີ່ກົດໝາຍວ່າດ້ວຍອົງການໄອຍະການປະຊາຊົນ ກຳນົດໄວ້ ປະກອບມີ:
  • ເພີ່ມທະວີການສຶກສາ​ອົບຮົມ​ການ​ເມືອງ-ນໍາພາແນວຄິດໃຫ້ແກ່ພະນັກງານໄອຍະການປະຊາຊົນ, ຜູ້ຊ່ວຍພະນັກງານໄອຍະການ ແລະ ວິຊາການຂອງຕົນ ໂດຍສຸມໃສ່ຈັດຕັ້ງເຊື່ອມຊືມມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກອົງການໄອຍະການປະຊາຊົນສູງສຸດ, ມະຕິກອງປະຊຸມໃຫຍ່ຂອງບັນດາແຂວງ ແລະ ເມືອງ, ບັນດາກົດໝາຍ ແລະ ນິຕິກໍາລຸ່ມກົດໝາຍໃຫ້ເລີກເຊີ່ງ ແລະ ທົ່ວເຖິງແນໃສ່ສຶກສາອົບຮົມພະນັກງານໄອຍະການປະຊາຊົນ, ຜູ້ຊ່ວຍພະນັກງານໄອຍະການປະຊາຊົນ ແລະ ວິຊາການມີຄຸນທາດການເມືອງ, ຄຸນສົມບັດສີນທໍາປະຕິວັດ, ​ຈັນ​ຍາ​ບັນ, ຈັນຍາທໍາໜັກແໜ້ນ, ມີຄວາມຮັບຜິດຊອບຕໍ່ໜ້າທີ່ວຽກງານ;

  

- ສູ້ຊົນຍົກສູງຄຸນະພາບຂອງຕິດຕາມກວດກາການເຄົາລົບ, ປະຕິບັດກົດໝາຍ ແລະ ການສັ່ງຟ້ອງຜູ້ຖືກຫາຂຶ້ນສານໃຫ້ບັນລຸຄາດໝາຍ 95% ຂຶ້ນໄປທາງດ້ານປະລິມານ ແລະ ຮັບປະກັນຄວາມຖືກຕ້ອງ 100% ຂອງການແກ້ໄຂຄະດີອາຍາ, ຄະດີແພ່ງຢູ່ຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ ໂດຍຮັບປະກັນຄວາມຖືກຕ້ອງ, ຍຸຕິທໍາ, ໂປ່ງໃສ ແລະ ທັນກໍານົດເວລາ ໄປຄຽງຄູ່ກັບການຢືດໝັ້ນຫຼັກການພື້ນຖານໃນການດໍາເນີນຄະດີ ຮອບດ້ານ, ຄົບຖ້ວນ ແລະ ພາວະວິໄສ;​ສູ້ຊົນຍົກສູງຄຸນນະພາບການຕິດຕາມກວດກາການຈັດຕັ້ງປະຕິບັດນິຕິກໍາຂອງຫົວໜ້າອົງການໄອຍະການປະຊາຊົນສູງສຸດ ຄຽງຄູ່ກັບນິຕິກໍາລຸ່ມກົດໝາຍຂອງຂະແໜງອື່ນໆ ທີ່ພົວພັນກັບວຽກງານ ໄປພ້ອມກັບການຕິດຕາມກວດກາ ແລະ ປະເມີນຄືນວ່າອົງການໄອຍະການປະຊາຊົນແຂວງ ແລະ ເຂດໃດ ທີ່ຈັດຕັ້ງປະຕິບັດໄດ້ດີ ຮັບປະກັນຄວາມຖືກຕ້ອງ ເປັນກົມກອງຕົວແບບ ເພື່ອໃຫ້ກົມກອງອື່ນມາຖອດຖອນບົດຮຽນ;

- ສືບຕໍ່ຈັດຕັ້ງປະຕິບັດຄໍາສັ່ງ, ຄໍາແນະນໍາປະເພດຕ່າງໆຂອງຫົວໜ້າອົງການໄອຍະການປະຊາຊົນສູງສຸດ ຕາມບົດບັນທືກກອງປະຊຸມວິຊາການຂອງອົງການໄອຍະການປະຊາຊົນພາກເໜືອ ແລະ ອົງການໄອຍະການປະຊາຊົນ 7 ແຂວງພາກເໜືອ ຄັ້ງທີ II ຂໍ້ 6 ແລະ ນິຕິກໍາຕ່າງໆທີ່ອອກໃຫມ່ໃນປີ 2017 ດ້ວຍການຍົກສູງ ແລະ ເຄົາລົບປະຕິບັດຕາມ​ 6 ຫັຼກການກ່ຽວກັບວຽກງານຂອງອົງການໄອຍະການປະຊາຊົນ ແລະ ຈັດຕັ້ງຜັນຂະຫຍາຍເນື້ອໃນຈິດໃຈບົດບົນທືກກອງປະຊຸມ 4 ພາກສ່ວນ ກ່ຽວກັບການດໍາເນີນຄະດີຕາມຂະບວນການຍຸຕິທໍາ ຄັ້ງທີ V ໃນວຽກງານຂອງຕົນ;

- ສີືບຕໍ່ຫັນລົງຕິດຕາມກວດກາ ແລະ ຊຸກຍູ້ການປະຕິບັດພາລະບົດບາດ ສິດ ແລະ ໜ້າທີ່ຂອງອົງການໄອຍະການປະຊາຊົນ 7 ແຂວງ ແລະ  16 ເຂດຂອງແຂວງພາກເໜືອ ເພື່ອບຸກທະລຸທັງ 4 ດ້ານ ຕາມທິດກ້າວໜ້າ ແລະ ທັນສະໄໝ;

  1. ກອງປະຊຸມໄດ້ເຫັນດີເຫັນພ້ອມຮັບຮອງເອົາ 3 ມາດຕະການໃນການຈັດຕັ້ງປະຕິບັດ ດັ່ງນີ້:
  • ຄົ້ນຄວ້າ, ເຊື່ອມຊືມ ແລະ ກໍາແໜ້ນຄາດໝາຍສູ້ຊົນ ແລະ ໜ້າທີ່ວຽກງານຈຸດສຸມໃຫ້ເລີກເຊີ່ງ ເພື່ອສ້າງທັດສະນະທີ່ເປັນເອກະພາບໃນການຈັດຕັ້ງປະຕິບັດ;

  • ສ້າງບາດກ້າວບຸກທະລຸທັງ 4 ດ້ານ ໃຫ້ເປັນຮູບປະທໍາ ດ້ວຍການບຸກທະລຸດ້ານຈິນຕະນາການ ໃຫ້ພະນັກງານໄອຍະການປະຊາຊົນ, ຜູ້ຊ່ວຍພະນັກງານໄອຍະການ ແລະ ວິຊາການຂອງຕົນມີການພັດທະນາດ້ານຄວາມຮູ້ຄວາມສາມາດເຂົ້າສູ່ຄຸນນະພາບ ໂດຍສະເພາະກົນໄກການແກ້ໄຂຄະດີແບບຄົບວົງຈອນ, ການປະຕິບັດໜ້າທີ່ຕິດຕາມກວດກາການເຄົາລົບ ແລະ ປະຕິບັດກົດໝາຍໃນຂອບເຂດຄວາມຮັບຜິດຊອບຂອງຕົນ ແລະ ການສັ່ງຟ້ອງຜູ້ຖືກຫາຂຶ້ນສານໃຫ້ຖືກຕ້ອງ, ຄົບຖ້ວນ ແລະ ພາວະວິໄສ, ຮັບປະກັນການຕິດຕາມກວດກາ ແລະ ແກ້ໄຂຄະດີໃຫ້ບັນລຸ 95%ຂຶ້ນໄປ ແລະ ຮັບປະກັນຄຸນນະພາບ 100%;

- ເປັນເຈົ້າການໃນການຊີ້ນໍາໆພາ, ຕິດຕາມກວດກາ ແລະ ປະເມີນຜົນໃນການຈັດຕັ້ງປະຕິບັດບົດບັນທຶກກອງປະຊຸມວິຊາການຄັ້ງທີ III ພ້ອມລາຍງານຢ່າງເປັນປົກກະຕິຕໍ່ອົງການໄອຍະການປະຊາຊົນພາກເໜືອ;

  1. ກອງປະຊຸມໄດ້​ເປັນ​ເອ​ກະ​ພາບ​ກັນ​ວ່າ ການຈັດກອງປະຊຸມວິຊາການຂອງອົງ​ການ​ໄອ​ຍະ​ການ​ປະ​ຊາ​ຊົນ​ພາກ​ເໜືອ, ອົງການໄອຍະການປະຊາຊົນ 7 ແຂວງ ແລະ ອົງການໄອຍະການປະຊາຊົນ 16 ເຂດ ຂອງແຂວງພາກເໜືອ ຄັ້ງ​ທີ IV ​ແມ່ນຈັດຢູ່ແຂວງຫົວພັນ;

ພາຍຫຼັງສຳເລັດກອງປະຊຸມວິຊາການ ກໍໄດ້ຮ່ວມກັນສ້າງຂະບວນການແຂ່ງຂັນກິລາບານຟຸດຊໍ ແລະ ເປຕັງ ເພື່ອຊົມ ເຊີຍຜົນສຳເລັດຂອງກອງປະຊຸມ, ສະເຫຼີມສະຫຼອງວັນສ້າງຕັ້ງອົງການໄອຍະການປະຊາຊົນ ແຫ່ງ ສປປລາວ ຄົບຮອບ 28 ປີ ແລະ ວັນສ້າງຕັ້ງອົງການໄອຍະການປະຊາຊົນພາກເໜືອ ຄົບຮອບ 11 ປີ ດ້ວຍບັນຍາກາດຟົດຟື້ນ-ມ່ວນຊື່ນ ແລະ ຮັກສາໄດ້ຄວາມສາມັກຄີ.

2018-02-07

ປະຕິທິນ

Feb-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ