ກອງປະຊຸມ ສະຫຼຸບວຽກງານຂອງຄະນະກຳມະການອະໄພຍະໂທດລະດັບຊາດ ປະຈຳປີ 2017 ຄັ້ງວັນທີ 7-3-2018

         ໃນລະຫວ່າງວັນທີ 07 ມີນາ 2018 ຄະນະກໍາມະການອະໄພຍະໂທດ ລະດັບຊາດ ໄດ້ເປີດກອງປະຊຸມສະຫຼຸບວຽກງານອະໄພຍະໂທດ ປະຈໍາປີ 2017 ແລະ ກໍານົດທິດທາງແຜນການອະໄພຍະໂທດປະຈໍາປີ 2018 ຢູ່ທີ ອົງການໄອຍະການປະຊາຊົນສູງສຸດ ໂດຍພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການອະໄພຍະໂທດ ລະດັບຊາດ, ມີ : ຮອງປະທານ, ຄະນະກໍາມະການ ແລະ ກອງເລຂາ ຄະນະກໍາມະການອະໄພຍະໂທດ ລະດັບຊາດ ເຂົ້າຮ່ວມທັງໝົດຈໍານວນ 33  ທ່ານ.

         ກອງປະຊຸມໃນຄັ້ງນີ້ໄດ້ຮັບຟັງການລາຍງານສະຫຼຸບວຽກງານອະໄພຍະໂທດ ຂອງຄະນະກໍາມະການອະໄພຍະໂທດ ລະດັບຊາດ ປະຈໍາປີ 2017, ຊຶ່ງໄດ້ຄົ້ນຄວ້າໃຫ້ອະໄພຍະໂທດແກ່ນັກໂທດທົ່ວປະເທດທັງໝົດ ຈໍານວນ 1,890 ຄົນ, ຍິງ 400 ຄົນ, ຕ່າງປະເທດ 39 ຄົນ, ຍິງ 10 ຄົນ. ໃນນີ້: ໄດ້ໃຫ້ອະໄພຍະໂທດຫຼຸດຜ່ອນໂທດ ຈໍານວນ 1,557 ຄົນ, ຍິງ 340 ຄົນ, ຕ່າງປະເທດ 33 ຄົນ, ຍິງ 10 ຄົນ ແລະ ໃຫ້ອະໄພຍະໂທດປ່ອຍຕົວ ຈໍານວນ 333 ຄົນ, ຍິງ 60 ຄົນ,​ ຕ່າງປະເທດ 06 ຄົນ.

      ເກັບຄ່າປັບໃໝທາງອາຍາໄດ້ຈໍານວນ 2,700,920,500 (ສອງຕື້ເຈັດຮ້ອຍລ້ານເກົ້າແສນຊາວພັນຫ້າຮ້ອຍກີບ) ຖອກເຂົ້າງົບປະມານ 1,213,573,000ກີບ (ໜຶ່ງຕື້ສອງຮ້ອຍສິບສາມລ້ານຫ້າແສນເຈັດສິບສາມພັນກີບ) ຍັງບໍ່ທັນໄດ້ຖອກເຂົ້າງົບປະມານ 1,487,347,500ກີບ (ໜຶ່ງຕີ້ສີ່ຮ້ອຍແປດສິບເຈັດລ້ານ ສາມແສນສີ່ສິບເຈັດພັນຫ້າຮ້ອຍກີບ).

         ນອກນັ້ນ ຍັງໄດ້ຜ່ານແຜນການປະຈໍາປີ 2018 ຂອງຄະນະກໍາມະການອະໄພຍະໂທດ ລະດັບຊາດ ເພື່ອປັບປຸງ ແລະ ນໍາສະເໜີປະທານປະເທດປະກາດໃຊ້ລັດຖະບັນຍັດ ວ່າດ້ວຍການໃຫ້ອະໄພຍະໂທດ ແລະ ການຈັດຕັ້ງເຜີຍແຜ່ເຊື່ອມຊຶມນິຕິກໍາດັ່ງກ່າວໃຫ້ກວ້າງຂວາງ ແລະ ທົ່ວເຖິງ. ໃນຕອນທ້າຍ ປະທານກອງປະຊຸມຍັງໄດ້ໃຫ້ກຽດໂອ້ລົມຕໍ່ກອງປະຊຸມໂດຍໄດ້ຮຽກຮ້ອງໃຫ້ຄະນະກໍາມະການອະໄພຍະໂທດ ລະດັບຊາດ ສືບຕໍ່ເຊີດຊູ ແລະ ຍົກສູງຄວາມຮັບຜິດຊອບໃນການຄົ້ນຄວ້າວຽກງານອະໄພຍະໂທດ ແລະ ປັບປຸງແກ້ໄຂບັນດາຂໍ້ຄົງຄ້າງຕ່າງໆ, ຈັດຕັ້ງເຊື່ອມຊຶມເຜີຍແຜ່ບັນດານິຕິກໍາຕ່າງໆໃຫ້ແກ່ອົງການຈັດຕັ້ງ, ກຸ່ມຄົນທີ່ກ່ຽວຂ້ອງໄດ້ເຂົ້າໃຈເພື່ອເປັນບ່ອນອີງໃນການຈັດຕັ້ງປະຕິບັດວຽກງານອະໄພຍະໂທດ ປະຈໍາປີ 2018 ໃຫ້ມີປະສິດທິຜົນສູງຂຶ້ນ.

by:sack

14/03/2018

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ