ກອງປະຊຸມວຽກງານກວດກາຂອງຄະນະກວດກາອົງການໄອຍະການປະຊາຊົນສູງສຸດ ທີ່ ທ່າລາດ ແຂວງ ວຽງຈັນ

        ອົງການໄອຍະການປະຊາຊົນສູງສຸດ ໄດ້ຈັດກອງປະຊຸມຈັດຕັ້ງຜັນຂະຫຍາຍເນື້ອໃນຈິດໃຈກອງປະຊຸມໃຫຍ່ ວຽກງານກວດກາທົ່ວປະເທດ ປະຈໍາປີ 2017, ພ້ອມທັງສະຫຼຸບຖອດຖອນບົດຮຽນວຽກງານກວດກາ ປະຈໍາປີ 2017 ແລະ ທິດທາງແຜນການ ປີ2018 ຂອງ ຄະນະກວດກາ ອົງການໄອຍະການປະຊາຊົນສູງສຸດ ຂຶ້ນໃນວັນທີ 14 ມີນາ 2018 ທີ່ ທ່າລາດ ແຂວງ ວຽງຈັນ, ພາຍໃຕ້ການເປັນ ປະທານ ຂອງ ທ່ານ ບຸນຍັງ ຈັນດາລະສານ ຄະນະປະຈໍາພັກ, ປະທານກວດກາ, ຮອງຫົວໜ້າ ອົງການໄອຍະການປະຊາຊົນສູງສຸດ, ມີເລຂາ, ຮອງເລຂາໜ່ວຍພັກ ແລະ ພາກສວ່ນກ່ຽວຂ້ອງເຂົ້າຮ່ວມທັງໝົດ 37 ສະຫາຍ.

      ກອງປະຊຸມຄັ້ງນີ້ ຈຸດປະສົງຫຼັກກໍເພື່ອຈັດຕັ້ງຜັນຂະຫຍາຍເນື້ອໃນຈິດໃຈ ກອງປະຊຸມໃຫຍ່ວຽກງານກວດກາທົ່ວປະເທດ ປະຈໍາປີ 2017, ພ້ອມນີ້ກໍໄດ້ສະຫຼຸບຖອດຖອນບົດຮຽນວຽກງານຕິດຕາມ, ກວດກາໃນໜຶ່ງປີຜ່ານມາ ແລະ ວາງທິດທາງແຜນການ ປີ2018 ພ້ອມທັງໄດ້ມີການປະກອບຄໍາເຫັນຕໍ່ກອງປະຊຸມຢ່າງກ້ວາງຂວາງ. ຊຶ່ງສາມາດຊອກໃຫ້ເປັນດ້ານດີຕັ້ງໜ້າ, ດ້ານອອ່ນຂໍ້ຄົງຄ້າງທີ່ຈະຕ້ອງໄດ້ປັບປຸງແກ້ໄຂ ແລະ ມີບາງບົດຮຽນ ທີ່ຈະຕ້ອງໄດ້ເສີມຂະຫຍາຍ, ໃນນີ້ຍັງໄດ້ເຜີຍແຜ່ ເອກະສານຈໍານວນໜຶ່ງເຊັ່ນ: ບົດສະຫຼຸບຕີລາຄາວຽກງານກວດກາ ປີ 2017

ແລະ ທິດທາງແຜນການວຽກງານກວດກາ ປີ 2018 ຂອງຄະນະກວດກາສູນກາງພັກ, ບົດໂອ້ລົມຂອງ ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ  ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູງກາງ ຕໍ່ກອງປະຊຸມວຽກງານກວດກາ       ທົ່ວປະເທດ ປະຈໍາປີ 2017 ແລະ ເຜີຍແຜ່ເຊື່ອມຊຶມເນື້ອໃນເອກະສານສໍາຄັນຈໍານວນໜຶ່ງ.

ໃນຕອນທ້າຍ, ທ່ານປະທານຍັງໄດ້ໂອ້ລົມຕໍ່ກອງປະຊຸມ,​ ໃນນາມຕາງໜ້າໃຫ້ຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ ເຫັນໄດ້ຄວາມໝາຍຄວາມສໍາຄັນຕໍ່ວຽກງານກວດກາດັ່ງຄໍາເວົ້າທີ່ວ່າ: “ ຖ້າບໍ່ມີການກວດກາກໍໝາຍຄວາມວ່າບໍ່ມີການນໍາພາ”  ສິ່ງດັ່ງກ່າວສະແດງໃຫ້ເຫັນວ່າ ວຽກງານກວດກາແມ່ນວຽກງານໜຶ່ງທີ່ສໍາຄັນ ທີ່ຕິດພັນກັບທຸກຂົງເຂດວຽກງານ ໃນການນໍາພາຂອງພັກ ແລະ ການຄຸ້ມຄອງບໍລິຫານລັດ ພ້ອມທັງແນະນໍາໃຫ້ຜູ້ແທນກອງປະຊຸມ ນໍາເອົາເນື່ອໃນຈິດໃຈກອງປະຊຸມໃນຄັ້ງນີ້ໄປຈັດຕັ້ງເຜີຍແຜ່ໃຫ້ສະມາຊິກພັກ, ພະນັກງານ-ລັດຖະກອນຂອງຕົນເຊື່ອມຊຶມກໍາແໜ້ນ ເຮັດໃຫ້ວຽກງານຕິດຕາມກວດກາໄດ້ຮັບການຜັນຂະຫຍາຍ ຈັດຕັ້ງປະຕິບັດຢ່າງແຂງແຮງທົ່ວກົງຈັກການຈັດຕັ້ງຂອງ ອົງການໄອຍະການປະຊາຊົນ.

by:sack

19/03/2018

ປະຕິທິນ

Nov-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ