ພິທີມອບ-ຮັບເຄື່ອງຊ່ວຍເຫຼືອຈາກ ບໍລິສັດ ເຄບີ ໂຄລາວ ເຊົ່າສິນເຊື່ອຈຳກັດ

     ໃນວັນທີ 31 ພຶດສະພາ 2018 ທີ່ ຫ້ອງການອົງການໄອຍະການປະຊາຊົນສູງສຸດ ໄດ້ຈັດພິທີ ມອບ-ຮັບ ການຊ່ວຍເຫລືອ ລະຫວ່າງ ບໍລິສັດ ເຄບີ ໂຄລາວ ເຊົ່າສິນເຊື່ອຈຳກັດ ແລະ ຫ້ອງການ ອົງກາານໄອຍະການປະຊາຊົນສູງສຸດ. ໂດຍການເຂົ້າຮ່ວມເປັນປະທານຂອງ ທ່ານ ຄຳສານ ສຸວົງ ຫົວໜ້າ ອົງການໄອຍະການປະຊາຊົນສູງສຸດ, ມີບັນດາທ່ານໃນຄະນະນໍາຫ້ອງການ, ຜູ້ຕາໜ້າບັນດາກົມກ່ຽວຂ້ອງ ແລະ ຕາງໜ້າ ບໍລິສັດ ເຄບີໂຄລາວ ເຊົ່າສິນເຊື່ອຈຳກັດ ແລະ ອາສາສະໜັກ ຊ່ຽວຊານໄອຊີທີ ສາທາລະນະລັດເກົາຫລີ ເຂົ້າຮ່ວມໃນພິທີດັ່ງກ່າວ.

      ເຄື່ອງທີທາງ ບໍລິສັດ ເຄບີໂຄລາວ ເຊົ່າສິນເຊື່ອຈຳກັດ ທີ່ໄດ້ປະກອບສ່ວນຊ່ວຍເຫລືອໃຫ້ແກ່ອົງການໄອຍະການປະຊາຊົນສູງສຸດໃນຄັ້ງນີ້ ປະກອບມີ, ເຄື່ອງຄອມພິວເຕີ ຈຳນວນ 10 ເຄື່ອງ, ເຄື່ອງເຊື່ອມໂຍງສັນຍາອິນເຕີເນັດ ຈໍານວນ 15 ຈຸດ, ທີວີ ແອວຈີ 55 ນິ້ວ 01 ເຄື່ອງ, ການສ້ອມແປງ ແລະ ຂັ້ນຫ້ອງຝຶກອົບຮົມວຽກງານໄອທີ ພ້ອມດ້ວຍອຸປະກອນເຄື່ອງຮັບໃຊ້ວຽກງານໄອທີອື່ນໆຈຳນວນໜຶ່ງ ຊຶ່ງມີມູນຄ່າເປັນຈຳນວນເງີນ 9,000$ (ເກົ້າພັນໂດລາສະຫະລັດ)

   ໃນພິທີ ມອບ-ຮັບ ໂຄງການເຄື່ອງຊ່ວຍເຫລືອດັ່ງກ່າວ  ທ່ານ ຄຳສານ ສຸວົງ ຫົວໜ້າ ອົງການໄອຍະການປະຊາຊົນສູງສຸດ ກໍໄດ້ມີຄໍາເຫັນໂດຍໄດ້ຍົກໃຫ້ເຫັນວ່າ ໂຄງການຮັບເຄື່ອງຊ່ວຍເຫລືອໃນການຂັ້ນຫ້ອງຝຶກອົບຮົມໄອທີ ແລະ ເຄືີ່ອງອຸປະກອນເຊື່ອມໂຍງສັນຍາອິນເຕີເນັດ ແລະ ເຄື່ອງຄອມພິວເຕີ  ນີ້ແມ່ນໜຶ່ງໃນການຈັດຕັ້ງປະຕິບັດໂຄງການໃນການພັດທະນາວຽກງານໄອຊີທີຢູ່ອົງການໄອຍະການປະຊາຊົນສູງສຸດໃຫ້ມີຄວາມເຂັ້ມແຂງ ແລະ ທັນສະໄໝເທື່ອລະກ້າວເປັນການພັດທະນາຍົກລະດັບຄວາມຮູ້ຄວາມສາມາດຖັນແຖວພະນັກງານໃຫ້ສູງຂຶ້ນ.

   ພ້ອມທັງຍັງໄດ້ຮຽກຮ້ອງມາຍັງຖັນແຖວພະນັກງານຈົ່ງພ້ອມກັນປົກປັກຮັກສາ ແລະ ນຳໃຊ້ເຄື່ອງອຸປະກອນດັ່ງກ່າວເຂົ້າໃນການເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິພາບ, ປະສິດທິຜົນ ແລະ ຕາງໜ້າຄະນະພັກ, ຄະນະນຳອົງການໄອຍະການປະຊາຊົນສູງສຸດ ສະແດງຄວາມຂອບໃຈມາຍັງ ຜູ້ຕາງໜ້າ ບໍລິສັດ ເຄບີໂຄລາວ ເຊົ່າສິນເຊື່ອຈຳກັດ ແລະ ຂໍສະແດງຊົມເຊີຍມາຍັງ ທ່ານ ດຣ ລີຢອງໂຣ (Dr. Lee Young Ho) ອາສາສະໜັກ ຊ່ຽວຊານໄອຊີທີ ສາທາລະນະລັດເກົາຫລີ ທີ່ໄດ້ເອົາໃຈໃສ່ໃນການເຮັດວຽກງານຮ່ວມກັບອົງການໄອຍະການປະຊາຊົນສູງສຸດ ເວົ້າລວມ ໂດຍສະເພາະຫ້ອງການ ອົງການໄອຍະການປະຊາຊົນສູງສຸດ ແລະ ພະແນກ ເຕັກນິກຂໍ້ມູນ ແລະ ຂ່າວສານ ໃນການພັດທະນາ ແລະ ປັບປຸງລະບົບ ໄອຊີທີ ໃຫ້ມີຄວາມກ້າວໜ້າ ແລະ ມີການພັດທະນາດີຂຶ້ນເທື່ອລະກ້າວ.

by:sengphachan

31/05/2018

ປະຕິທິນ

Nov-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ