ພິທີ ປະກາດການປັບປຸງການຈັດຕັ້ງ ແລະ ການສ້າງຕັ້ງ ອົງການໄອຍະການປະຊາຊົນເຂດ.

     ເພື່ອເປັນການປັບປຸງບຸກຄະລະກອນ ແລະ ເພີ້ມທະວີໃນການເສີມສ້າງລະບົບການຈັດຕັ້ງໃນຖັນແຖວພະນັກງານຂອງອົງການໄອຍະການປະຊາຊົນແຂວງ ແລະ ອົງການໄອຍະການປະຊາຊົນ ເຂດ IV ເມືອງ ອາດສະພັງທອງ , ໃນ ລະຫວ່າງ ວັນທີ 4 ຫາ 5 ມິຖຸນາ 2018 , ອົງການໄອຍະການປະຊາຊົນສູງສຸດ ໄດ້ລົງເຄື່ອນໄຫວວຽກງານທາງລັດຖະການ ທີ່ ແຂວງ ສະຫວັນນະເຂດ, ເມືອງ ອາດສະພັງທອງ ຂື້ນ ໂດຍການເປັນປະທານຮ່ວມ  ທ່ານ ປອ ໂພໄຊ ໄຊຍະສອນ, ກໍາມະການສໍາຮອງສູນກາງພັກ,ຮອງເລຂາພັກແຂວງ, ຮອງເຈົ້າແຂວງສະຫວັນນະເຂດ ແລະ  ທ່ານ ໄຊຊະນະ ໂຄດພູທອນ ,ຮອງເລຂາຄະນະພັກ, ຮອງ ຫົວໜ້າອົງການໄອຍະການປະຊາຊົນສູງສຸດ, ໃຫ້ກຽດເຂົ້າຮ່ວມພິທີດັ່ງກ່າວ ມີ ຄະນະພັກ- ຄະນະນໍາແຂວງ, ເຈົ້າເມືອງ 3 ຕົວເມືອງ ຄື: ເມືອງ ອາດສະພັງທອງ, ເມືອງ ອາດສະພອນ ແລະ ເມືອງ ພະລານໄຊ, ມີ ຫົວໜ້າອົງການໄອຍະການປະຊາຊົນແຂວງ ແລະ ບັນດທ່ານ ອົງການໄອຍະການປະຊາຊົນເຂດ IV ປະຈໍາເມືອງ ອາດສະພັງທອງ,  ຫົວໜ້າກົມ- ຮອງກົມ, ຫົວໜ້າຫ້ອງການ - ຮອງຫົວໜ້າຫ້ອງການ, ພະນັກງານລັດຖະກອນ ແລະ ແຂກທີ່ຖືກເຊີນກ່ຽວຂ້ອງອ້ອມຂ້າງເຂົ້າຮ່ວມຈໍານວນ 200 ກວ່າທ່ານ.

       ອົງການໄອຍະການປະຊາຊົນສູງສຸດໄດ້ຜ່ານຂໍ້ຕົກລົງປະກາດການປັບປຸງການຈັດຕັ້ງ ແລະ ຂໍ້ຕົກລົງວ່າດ້ວຍການປະກາດການສ້າງຕັ້ງອົງການໄອຍະການປະຊາຊົນ ເຂດ IV ທີ່ ຕັ້ງຢູ່ ເມືອງ ອາດສະພັງທອງ  ແຂວງ  ສະຫວັນນະເຂດ , ພາຍໃນອົງການໄອຍະການປະຊາຊົນເຂດ IV ເມືອງ ອາດສະພັງທອງ ປະກອບມີພະນັກງານທັງໜົດ 13 ທ່ານ. ໃນນັ້ນໄດ້ແຕ່ງຕັ້ງ ທ່ານ ສົມບັດ ພະພິທັກ  ເປັນຫົວໜ້າອົງການການໄອຍະການປະຊາຊົນເຂດ IV ເມືອງ ອາດສະພັງທອງ ໂດຍການເຂົ້າຮ່ວມເປັນສັກຂີພະຍານຂອງການນໍາຂັ້ນແຂວງ-ຂັ້ນເມືອງ ພ້ອມດ້ວຍແຂກທີ່ຖືກເຊີນອ້ອມຂ້າງເປັນພະຍານ.

      ນອກນັ້ນ, ຕາງໜ້າ ຄະນະພັກ- ຄະນະນຳ  ອົງການໄອຍະການປະຊາຊົນສູງສຸດ ທ່ານ ສົມບູນ ລາດສະບົວສີ ຫົວໜ້າກົມຈັດຕັ້ງ- ພະນັກງານ  ອົງການໄອຍະການປະຊາຊົນສູງສຸດ ກໍໄດ້ມອບ ພາຫະນະ ແລະ ເຄື່ອງອຸປະກອນຮັບໃຊ້ຫ້ອງການໃຫ້ ອົງການໄອຍະການປະຊາຊົນເຂດ IV ແຂວງ ສະຫວັນນະເຂດ ເມືອງ ອາດສະພັງທອງ ມູນຄ່າ ທັງໜົດ 90,000,000 ກີບ (ເກົ້າສິບລ້ານກີບ) ເພື່ອເສີມສ້າງ ແລະ ພັດທະນາບຸກຄະລະກອນພະນັກງານອົງການໄອຍະການປະຊາຊົນໃຫ້ພຽງພໍແທດເໜາະ ແລະ ທວງທັນກັບສະພາບການວຽກງານຕົວຈິງໃນປັດຈຸບັນ ແລະ ເພື່ອແນ່ໃສ່ການຊັບຊ້ອນພະນັກງານໃຫ້ເໜາະສົມກັບໜ້າວຽກ, ໃຫ້ແທດເໜາະກັບຕົວຈິງທັງທາງດ້ານໜ້າທີ່ການເມືອງທີ່ຖືກມອບໜາຍ, ທາງດ້ານວິຊາສະເພາະລົງເລີກ ແລະ ນໍາໃຊ້ວິຊາສະເພາະທີ່ຕົນເອງໄດ້ສືກສາຮ່ຳຮຽນມາໃຫ້ມີປະສິດທິຜົນ ຖືກຕ້ອງ,ໂປ່ງໃສ ແລະ ມີຄວາມຍຸຕິທຳ.

        ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ໂອ້ລົມ ແລະ ໃຫ້ທິດຊີ້ນໍາເຍືອງທາງ ໃນການປະກາດການປັບປຸງການຈັດຕັ້ງ ແລະ ການສ້າງຕັ້ງອົງການໄອຍະການປະຊາຊົນເຂດ IV ໃນຄັ້ງນີ້ ເພື່ອເປັນການປະຕິບັດວຽກງານໃນຂົງເຂດກົດໜາຍໃຫ້ອ້າຍນ້ອງພະນັກງານມີຄວາມເອົາໃຈໃສ່ປັບປຸງຄົ້ນຄ້ວາເພີ້ມຕື່ມສຸມໃສ່ການຈັດຕັ້ງປະຕິບັດແບບແຜນວິທີການເຮັດວຽກ ທີ່ ພັກ-ລັດ ມອບໜາຍໃຫ້, ຈັດຕັ້ງປະຕິບັດກົດໜາຍໃຫ້ຖືກຕ້ອງ, ທ່ຽງທໍາ ບໍ່ເອົາລັດເອົາປຽບປະຊາຊົນ, ໃຫ້ມີການປະສານສົມທົບກັບພາກສ່ວນທີ່ກ່ຽວຂ້ອງໃນຂົງເຂດອື່ນໆ ແລະ ເປັນແບບຢ່າງທີ່ດີຂອງສັງຄົມ  ອົງການໄອຍະການປະຊາຊົນ .

by:sack

07/06/2018

ປະຕິທິນ

Nov-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ