ອົງການໄອຍະການປະຊາຊົນສູງສຸດສ້າງຄວາມເຂັ້ມແຂງໃນການຕິດຕາມກວດກາການດໍາເນີນຄະດີແພ່ງໃຫ້ແກ່ພະນັກງານໄອຍະການປະຊາຊົນ

        ໃນລະຫວ່າງວັນທີ 06-07 ກັນຍາ 2018; ທີ່ ຫ້ອງຝືກອົບຮົມ ສະຖາບັນຄົ້ນຄ້ວາ ແລະ ຝືກອົບຮົມວຽກງານໄອຍະການ, ອົງການໄອຍະການປະຊາຊົນສູງສຸດ (ອອປສ) ໄດ້ເປີດຊຸດອົບຮົມເພື່ອຍົກລະດັບຄວາມຮູ້ຄວາມສາມາດໃນການຕິດຕາມກວດກາການດຳເນີນຄະດີແພ່ງໃຫ້ແກ່ພະນັກງານອົງການໄອຍະການປະຊາຊົນນະຄອນຫຼວງວຽງຈັນ ແລະ ອົງການໄອຍະການປະຊາຊົນເຂດ I, II ,III, ແລະ ເຂດ IV ພາຍໃນນະຄອນຫຼວງວຽງຈັນ ຂື້ນ ຢ່າງເປັນທາງການ. ເຊິ່ງໄດ້ມີນັກສໍາມະນາກອນເຂົ້າຝືກອົບຮົມທັງໜົດ  36 ສະຫາຍ, ຍີງ 16 ສະຫາຍ. ໃຫ້ກຽດເປັນ ປະທານໃນພິທີເປີດຊຸດຝືກອົບຮົມໃນຄັ້ງນີ້ ໂດຍ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ ມີ ຄະນະຮັບຜິດຊອບຈາກກົມຕິດຕາມກວດກາການດໍາເນີນຄະດີແພ່ງ ແລະ ພະນັກງງານລັດຖະກອນເຂົ້າຮ່ວມທັງໜົດ 48 ທ່ານ.

       ເພື່ອເປັນການເສີມສ້າງຄວາມຊໍານິຊໍານານໃຫ້ແກ່ພະນັກງານອົງການໄອຍະການປະຊາຊົນກ່ຽວກັບວຽກງານການຕິດຕາມກວດກາການດໍາເນີນຄະດີແພ່ງຂັ້ນຕ່າງໆ ໃນຂອບເຂດນະຄອນຫຼວງວຽງຈັນ, ເຮັດໃຫ້ມີຄວາມເຂົ້າໃຈຢ່າງເລີກເຊີ່ງທາງດ້ານກົດໜາຍ ແລະ ຮູ້ຈັກກ່ຽວກັບຂັ້ນຕອນໃນການຕິດຕາມກວດກາການປະຕິບັດກົດໜາຍໃນການຕິດຕາມກວດກາການດໍາເນີນຄະດີແພ່ງໃຫ້ມີປະສິດທິຜົນ ແລະ ຄວາມເປັນເອກະພາບ ໃນການຈັດຕັ້ງປະຕິບັດໃຫ້ຖືກຕ້ອງຕາມຂັ້ນຕອນຂອງກົດ   ໜາຍ ແລະ ເພື່ອເຮັດໃຫ້ການດໍາເນີນຄະດີແພ່ງ ຄົບຖ້ວນ, ຮອບດ້ານ, ພາວະວິໄສ.

        ໃນການຝືກອົບຮົມແມ່ນແນ່ໃສ່ບັນດາ ເອກະສານຕົ້ນຕໍ 6 ສະບັບ ຫົວຂໍ້  “ ການຕິດຕາມກວດກາການດໍາເນີນຄະດີແພ່ງຢູ່ສານຂັ້ນຕົ້ນ; ການຕິດຕາມກວດກາການດໍາເນີນຄະດີແພ່ງ ຢູ່ສານຂັ້ນອຸທອນ; ການຕິດຕາມກວດກາການດໍາເນີນຄະດີແພ່ງ ຢູ່ສານຂັ້ນລົບລ້າງ; ເຕັກນິກການຄົ້ນຄ້ວາສໍານວນຄະດີແພ່ງ; ເຕັກນິກການຂຽນຮ່າງຄໍາຖະແຫຼງ ແລະ ພ້ອມກັນນີ້ກໍຍັງເປັນການເຜີຍແຜ່ຄໍາແນະນໍາຮ່ວມ ສະບັບ​ເລກ​ທີ 001/ອອປສ.ສປສສ; ລົງ​ວັນ​ທີ 12 ມັງກອນ 2017 ລະຫວ່າງ ຫົວໜ້າ ອົງການໄອຍະການປະຊາຊົນສູງສຸດ ແລະ ປະທານສານປະຊາຊົນສູງສຸດ ວ່າດ້ວຍການເຂົ້າຮ່ວມໃນການດໍາເນີນຄະດີແພ່ງ, ແຮງງານ,ການຄ້າ,ຄອບຄົວ ແລະ ເດັກ ຢູ່ສານຂັ້ນຕົ້ນ.”

       ໃນພິທີດັ່ງກ່າວ ທ່ານ ຮອງຫົວໜ້າອົງການໄອຍະການປະຊາຊົນສູງສຸດ ກໍໄດ້ເນັ້ນຄວາມຈໍາເປັນ ແລະ ຄວາມຕ້ອງການໃນການພັດທະນາລະບົບອົງການໄອຍະການປະຊາຊົນໃຫ້ມີຄວາມເຂັ້ມແຂງເທື່ອລະກ້າວ ແລະ ຍັງໄດ້ໃຫ້ທິດຊີ້ນໍາເຍືອງທາງໃຫ້ບັນດານັກສໍາມະນາກອນໄດ້ມີການຄົ້ນຄ້ວາຝືກອົບຮົມຕົນເອງໃຫ້ມີຄວາມຮັບຮູ້ ແລະ ເຂົ້າໃຈໃນການນໍາເອົາບົດຮຽນຈາກບັນດາຄູ່ອາຈານ ນໍາໃຊ້ເຂົ້າໃນວຽກງານຕົວຈີງໃຫ້ມີປະສິດທິພາບສູງໃນການແກ້ໄຂບັນຫາຕ່າງໆ ທີ່ເກີດຂື້ນໃນສັງຄົມ ໂດຍສະເພາະ ພາກສ່ວນທີ່ກ່ຽວຂ້ອງໃນການດຳເນີນຄະດີໃຫ້ຖືກຕ້ອງຕາມຂັ້ນຕອນ ແລະ  ເພື່ອຮັບປະກັນໃຫ້ຖືກຕ້ອງໃນສັງຄົມໃນປັດຈຸບັນ ແລະ ອານາຄົດ.

by:sack

06/09/2018

ປະຕິທິນ

Nov-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ