ຄະນະຜູ້ແທນຂັ້ນສູງອົງການໄອຍະການປະຊາຊົນສູງສຸດ ແຫ່ງ ສປປ ລາວ ເຄື່ອນໄຫວວຽກງານ ຢູ່ອົງການໄອຍະການປະຊາຊົນສູງສຸດ ແຫ່ງ ສປ ຈີນ

   ໂດຍຕອບສະໜອງຕາມການເຊື້ອເຊີນຂອງ ທ່ານ ຈ່າງ ຈຸ່ນ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປ ຈີນ, ທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ໄດ້ນຳພາຄະນະຜູ້ແທນຂັ້ນສູງ ຂອງອົງການໄອຍະການປະຊາຊົນສຸດ ແຫ່ງ ສປປ ລາວ ຈຳນວນ 06 ທ່ານ ເດີນທາງໄປເຄື່ອນໄຫວເຮັດວຽກ ຢູ່ອົງການໄອຍະການປະຊາຊົນສູງສຸດ ແຫ່ງ ສປ ຈີນ ໃນລະຫວ່າງວັນທີ 04 ຫາ 07 ພະຈິກ 2018 ທີ່ນະຄອນຫຼວງປັກກິ່ງ ສປ ຈີນ.

   ໃນໂອກາດດັ່ງກ່າວຄະນະຜູ້ແທນຂັ້ນສູງຂອງ ສປປ ລາວ ໄດ້ພົບປະແລກປ່ຽນບົດຮຽນ ກ່ຽວກັບການປະຕິບັດພາລະບົດບາດ, ສິດ ແລະ ໜ້າທີ່ ຂອງອົງການໄອຍະການປະຊາຊົນ ແຕ່ລະຂັ້ນ ຄື: ອົງການໄອຍະການປະຊາຊົນສູງສຸດ, ອົງການໄອຍະການປະຊາຊົນແຂວງ ແລະ ຂັ້ນເມືອງ, ຈາກນັ້ນ ຍັງຮ່ວມມືກັນເຊັນບົດບັນທຶກຊ່ວຍຈຳ ລະຫວ່າງສອງຝ່າຍ ຂອງອົງການໄອຍະການປະຊາຊົນສູງສຸດ ລາວ-ຈີນ, ຈີນ-ລາວ ກ່ຽວກັບການສືບຕໍ່ແລກປ່ຽນຄະນະຜູ້ແທນເຊິ່ງກັນ ແລະ ກັນ ເພື່ອຢ້ຽມຢາມເຮັດວຽກ ແລະ ແລກປ່ຽນບົດຮຽນ ໂດຍພັດປ່ຽນກັນເປັນເຈົ້າພາບ ປົກກະຕິ ສອງປີຕໍ່ຄັ້ງ, ແຕ່ລະປີຝ່າຍຈີນຈະສືບຕໍ່ຊ່ວຍກໍ່ສ້າງບຸກຄະລາກອນຂອງລາວ ຈຳນວນ 15 ຄົນ ດ້ວຍການສົ່ງພະນັກງານໄປຝຶກອົບຮົມວຽກງານໄອຍະການຢູ່ສະຖາບັນຝຶກອົບຮົມວຽກງານໄອຍະການ ຈີນ-ອາຊຽນ ທີ່ນະຄອນໜານໜິງ ເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ.

   ສືບຕໍ່ເພີ່ມທະວີການພົວພັນຮ່ວມມືກັນ ລະຫວ່າງ ອົງການໄອຍະການປະຊາຊົນ ບັນດາແຂວງພາກເໜືອຂອງ ສປປ ລາວ ແລະ ອົງການໄອຍະການປະຊາຊົນແຂວງຢຸນນານ ສປ ຈີນ, ສອງຝ່າຍເຫັນດີໃຫ້ມີການແລກປ່ຽນ ຂໍ້ມູນ-ຂ່າວສານ ແລະ ສະໜອງຂໍ້ມູນ ກ່ຽວກັບກົດໝາຍ, ນິຕິກຳ ແລະ ວາລະສານ ທີ່ຕິດພັນກັບວຽກງານໄອຍະການ ເພື່ອເປັນພື້ນຖານໃຫ້ແກ່ການຮ່ວມມື, ການຄົ້ນຄ້ວາ ແລະ ການນຳໃຊ້ເຂົ້າໃນການປະຕິບັດໜ້າທີ່ ວິຊາສະເພາະ ຢ່າງມີປະສິດທິພາບ ແລະ ປະສິດທິຜົນ; ນອກນັ້ນ ຄະນະດັ່ງກ່າວ ຍັງໄດ້ໄປຢ້ຽມຢາມ ແລະ ຖອດຖອນບົດຮຽນ ກ່ຽວກັບການປະຕິບັດວຽກງານວິຊາສະເພາະ ດ້ວຍລະບົບເຕັກນິກທີ່ທັນສະໄໝ ຢູ່ອົງການໄອຍະການປະຊາຊົນ ນະຄອນຫຼວງປັກກິ່ງ ສປ ຈີນ ຕື່ມອີກ.

by:ແສງພະຈັນ

12/11/2018

ປະຕິທິນ

Jan-2019
S M T W T F S
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ