ເພື່ອຫວນຄືນ ວັນສ້າງຕັ້ງກອງທັບປະຊາຊົນລາວ

      ໃນຕອນເຊົ້າຂອງວັນທີ 11 ມັງກອນ 2019, ທີ່ອົງການໄອຍະການປະຊາຊົນສູງສຸດໄດ້ຈັດຕັ້ງປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ( 20 ມັງກອນ 1949 – 20 ມັງກອນ 2019 ) ຂື້ນເປັນກຽດເຜີຍແຜ່ເອກະສານໃນຄັ້ງນີ້ໂດຍ:ທ່ານ ພົນຈັດຕະວາ ສີໄຫວ ໄມພອນ ຮອງຫົວໜ້າອົງການໄອຍະການປະຊາຊົນສູງສຸດ, ຫົວໜ້າອົງການໄອຍະການທະຫານຂັ້ນສູງ ເຂົ້າຮ່ວມຟັງປາຖະກະຖາຄັ້ງນີ້ມີຄະນະພັກ, ຄະນະນໍາອົງການໄອຍະການປະຊາຊົນສູງສຸດ, ຄະນະນໍາບັນດາກົມ, ຫ້ອງການ ແລະ ສະຖາບັນຄົ້ນຄວ້າ ແລະ ຝຶກອົບຮົມໄອຍະການ ພ້ອມດ້ວຍພະນັກງານ-ລັດຖະກອນທັງໝົດ 200 ກວ່າຄົນ;

      ໃນພິທີບັນດາຜູ້ເຂົ້າຮ່ວມໄດ້ຮັບຮູ້ເຖິງປະຫວັດຄວາມເປັນມາຂອງວັນສ້າງຕັ້ງກອງທັບປະຊາຊົນລາວ ແລະ ການເຄື່ອນໄຫວສູ້ຮົບໃນແຕ່ລະໄລຍະ ເຊິ່ງລວມມີ 4 ເນື້ອໃນຕົ້ນຕໍຄື: 1/. ການກໍາເນີດຂອງກອງທັບປະຊາຊົນລາວ; 2/. ຜົນງານ, ໄຊຊະນະ ແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວຕະຫຼອດໄລຍະ 70 ປີ; 3/. ທາດແທ້ ແລະ ມູນເຊື້ອສະຫງ່າອົງອາດຂອງກອງທັບປະຊາຊົນລາວ; 4/. ສືບຕໍ່ເສີມຂະຫຍາຍມູນເຊື້ອສະຫງ່າອົງອາດ ຂອງກອງທັບປະຊາຊົນລາວ ຄວນຈັດຕັ້ງປະຕິບັດຫຍັງແດ່?. ທັງ 04 ເນື້ອໃນລ້ວນແຕ່ສ່ອງແສງໃຫ້ເຫັນມູນເຊື້ອ, ຈິດໃຈຮັກຊາດ, ຮັກລະບອບປະຊາທິປະໄຕປະຊາຊົນ, ສ້າງຄວາມສາມັກຄີໃຫ້ເປັນປຶກແຜ່ນ, ສ້າງສະຕິເປັນເຈົ້າຕົນເອງຂອງ ກອງທັບປະຊາຊົນລາວ ແລະ ວັນດັ່ງກ່າວ ແມ່ນເຫດການປະຫວັດສາດໜຶ່ງທີ່ສຳຄັນ, ແມ່ນບາດກ້າວແຫ່ງການຂະຫຍາຍຕົວຂອງການປະຕິວັດເວົ້າລວມ, ເວົ້າສະເພາະແມ່ນການເຕີບໃຫຍ່ເຂັ້ມແຂງຂອງກຳລັງປະກອບອາວຸດ.

       ຕະຫຼອດການຕໍ່ສູ້, ອັນທີ່ພົ້ນເດັ່ນແມ່ນກອງທັບປະຊາຊົນລາວເຮົາ ໄດ້ປະເຊີນໜ້າໂດຍກົງກັບສັດຕູທີ່ມີກໍາລັງແຮງ ເໜືອກວ່າຕັ້ງຫຼາຍທົບທາງດ້ານເສດຖະກິດ, ກຳລັງພົນ ແລະ ອາວຸດຍຸດໂທປະກອນ, ແຕ່ດ້ວຍການເສີມຂະຫຍາຍນໍ້າໃຈຮັກຊາດອັນສູງສົ່ງ, ມູນເຊື້ອຕໍ່ສູ້ບໍ່ຍອມຈຳນົນຂອງບັນພະບູລຸດ ແລະ ປະຊາຊົນເຮົາ, ຜ່ານການຝຶກຝົນທົດສອບໃນແປວໄຟແຫ່ງການຕໍ່ສູ້ກູ້ຊາດໃນເງື່ອນໄຂທີ່ຫຍຸ້ງຍາກລຳບາກທີ່ສຸດນັ້ນ ກອງທັບເຮົາໄດ້ສ້າງວິລະກຳອັນລໍ້າເລີດຈາລຶກໄວ້ ໃນໜ້າປະຫວັດສາດຂອງກອງທັບ ແລະ ຂອງຊາດລາວເຮົາ. ຊຶ່ງທັງໝົດນັ້ນ,​ ແມ່ນເພື່ອສຶກສາອົບຮົມສະມາຊິກພັກ, ພະນັກງານ-ລັດຖະກອນ ໃນລະບົບອົງການໄອຍະການປະຊາຊົນເວົ້າລວມ, ອົງການໄອຍະການປະຊາຊົນສູງສຸດ ແລະ ສະຖາບັນຄົ້ນຄວ້າ ແລະ ຝຶກອົບຮົມໄອຍະການ ເວົ້າສະເພາະຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບທາດແທ້ ແລະ ມູນເຊື້ອຂອງກອງທັບປະຊາຊົນລາວ.

by:ຕາດຳ

25/01/2019

ປະຕິທິນ

Feb-2019
S M T W T F S
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ