ອົງການໄອຍະການປະຊາຊົນ 05 ແຂວງພາກເໜືອເປີດກອງປະຊຸມປຶກສາຫາລືດ້ານຍຸຕິທໍາຄັ້ງທີ 09 ກັບອົງການໄອຍະການປະຊາຊົນແຂວງຢູນານ ແຫ່ງ ສປ ຈີນ

     ເພື່ອ​ເສີມ​ຂະຫຍາຍ​ສາຍ​ພົວພັນ​ຮ່ວມ​ມື ບົນ​ຈິດ​ໃຈ​ຄູ່​ຮ່ວມ​ມື​ທາງ​ຍຸດ​ທະ​ສາດ​ຮອບດ້ານ, ໝັ້ນຄົງ, ຍາວ​ນານ ຕາມ​ມະຕິ​ກອງປະຊຸມ​ໃຫ່ຍຄັ້ງ​ທີ X ຂອງ​ພັກ​ປະຊາຊົນ​ປະຕິວັດ​ລາວ, ການ​ຮ່ວມ​ມື ​ແລະ ການ​ແລກປ່ຽນ​ບົດຮຽນ​ເຊິ່ງກັນ ​ແລະ ກັນ​ເວົ້າ​ລວມ, ​ເວົ້າ​ສະ​ເພາະ ການ​ແລກປ່ຽນ​ບົດຮຽນ​ເຊິ່ງກັນ ​ແລະ ກັນ ລະຫວ່າງ ອົງການ​ໄອ​ຍະ​ການ​ປະຊາຊົນ 05 ​ແຂວງ​ພາກ​ເໜືອ​ ມີ ​ແຂວງ​ບໍ່​ແກ້ວ, ​ແຂວງ ຜົ້ງ​ສາລີ, ​ແຂວງ ຫຼວງ​ນໍ້າ​ທາ, ​ແຂວງ ອຸດົມ​ໄຊ, ​ແຂວງ ຫຼວງ​ພະ​ບາງ ​ແລະ ຢູນານ ສປ ຈີນ. ​ໂດຍ​ປະຕິບັດ​ຕາມ​ຄະນະ​ນໍາ​ຂອງ​ສອງ​ອົງການ​ໄອ​ຍະ​ການ​ປະຊາຊົນ ​ແຫ່ງ ສປ ຈີນ ​ແລະ ອົງການ​ໄອ​ຍະ​ການ​ປະຊາຊົນ​ ແຫ່ງ ສປປ ລາວ ​ໄດ້​ເຊັນ​ບົດ​ບັນທຶກ​ການ​ພົບ​ປະ ​ແລະ ຊ່ວຍ​ເຫຼືອ​ເຊິ່ງກັນ​ແລະ​ກັນ. ​ວັນ​ທີ 30 ພະຈິກ 2009 ນັບ​ແຕ່​ນັ້ນ​ມາ ອົງການ​ໄອ​ຍະ​ການ​ປະຊາຊົນ 05 ​ແຂວງ​ພາກ​ເໜືອ ກັບ ອົງການ​ໄອ​ຍະ​ການ​ປະຊາຊົນ ​ແຂວງ ຢູນານ ສປ ຈີນ ກໍ່​ໄດ້​ເປີດ​ກອງ​ປະຊຸມ​ປຶກສາ​ຫາລື​ວຽກ​ງານ​ຍຸຕິ​ທໍາ​ບັນຫາ​ທາງ​ແພ່ງ ​ແລະ ທາງ​ອາຍາ ​ໂດຍ​ມີ​ການ​ຜັດປ່ຽນ​ກັນ​ເປັນ​ເຈົ້າພາບ 02 ປີ ຕໍ່​ຄັ້ງ, ປີ 2018 ທາງ​ຝ່າຍ ສປປ ລາວ ​ເປັນ​ເຈົ້າພາບ.

     ​ໃນ​ວັນ​ທີ 09 ມັງກອນ 2019 ອົງການ​ໄອ​ຍະ​ການ​ປະຊາຊົນ ​ແຂວງ ​ບໍ່​ແກ້ວ, ອົງການ​ໄອ​ຍະ​ການ​ປະຊາຊົນ​​ ແຂວງ ຫຼວງ​ນໍ້າ​ທາ, ອົງການ​ໄອ​ຍະ​ການ​ປະຊາຊົນ​​ ແຂວງ ອຸດົມ​ໄຊ, ​ອົງການ​ໄອ​ຍະ​ການ​ປະຊາຊົນ ​ແຂວງ ຫຼວງ​ພະ​ບາງ ​ແລະ ອົງການ​ໄອ​ຍະ​ການ​ປະຊາຊົນ​​ ແຂວງ ຜົ້ງ​ສາລີ ​ໄດ້​ຈັດ​ກອງ​ປະຊຸມ​ວ່າ​ດ້ວຍ​ການ​ຮ່ວມ​ມື​ທາງ​ດ້ານ​ຍຸຕິ​ທໍາກ່ຽວກັບ​ບັນຫາ​ທາງ​ແພ່ງ ​ແລະ ທາງ​ອາຍາ ຄັ້ງ​ທີ IX ກັບ ອົງການ​ໄອ​ຍະ​ການ​ປະຊາຊົນ ​ແຂວງ ຢູນານ ສປ ຈີນ ​ທີ່​ ແຂວງ ບໍ່​​ແກ້ວ. ​ໃຫ້​ກຽດ​ເຂົ້າ​​ເປັນ​ປະ​ທານຮ່ວມ​ກອງ​ປະຊຸມ ຕາງໜ້າ​ຝ່າຍ​ລາວ ​ໂດຍ​ ທ່ານ ຄໍານວນ ກ້ອນ ​ເລຂາ​ໜ່ວຍ​ພັກ, ຫົວໜ້າ​ອົງການ​ໄອ​ຍະ​ການ​ປະຊາຊົນ​ແຂວງ​ ບໍ່​ແກ້ວ ​ແລະ ມີ​ຜູ້​ແທນ​ຝ່າຍ​ລາວ 05 ​ແຂວງພາກ​ເໜືອ ​ເຂົ້າ​ຮ່ວມ 19 ທ່ານ. ຕາງໜ້າ​ຝ່າຍ​ ສປ ຈີນ ​ທ່ານ ຊູ ສາວ​ເຈີ້​ງ ຮອງ​ຫົວໜ້າ​ອົງການ​ໄອ​ຍະ​ການ​ປະຊາຊົນ​​ແຂວງ ຢູນານ ສປ ຈີນ ມີ​ຜູ້​ແທນ​ຝ່າຍ​ຈີນ​ເຂົ້າ​ຮ່ວມ ທັງ​ໝົດ 05​ ທ່ານ ໃນນັ້ນ ກອງ​ປະຊຸມ​ພົບ​ປະ​ໄດ້​ຕົກລົງ​ເປັນ​ເອກກະ​ພາບ​ກັນ​ 06 ບັນຫາ ຄື:

  1. ເຫັນດີເພີ່ມທະວີການຮ່ວມມື ແລະ ພົບປະທາງດ້ານວຽກງານຍຸຕິທຳ, ພາຍໃຕ້ການຊີ້ນຳຂອງອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນສູງສຸດແຫ່ງ ສປ ຈີນ ໃນຂອບເຂດສິດອຳນາດຂອງໃຜລາວ ​ບົນ​ຟື້ນ​ຖານ​ສົນ​ທິ​ສັນ​ຍາທີ່​ສອງ​ປະ​ເທດ​ເປັນ​ພາ​ຄີ​;
  2. ສືບຕໍ່ເພີ່ມທະວີ ແລະ ການຮ່ວມມືຊ່ວຍເຫຼືອເຊິ່ງ​ກັນ​ວຽກ​ງານ​ຍຸ​ຕິ​ທຳ​ທາງ​ອາ​ຍາ, ການ​ສົ່ງ​ຜູ້​ຮ້າຍ​ຂ້າມ​ແດນ ແລະ ຕ້ານ​ອາ​​ຊະ​ຍາ​ກຳ​ຂ້າມ​ຊາດ​ເປັນ​ຕົ້ນ: ຕ້ານການສໍ້ລາດບັງຫຼວງ, ການຄ້າມະນຸດ, ຢາ​ເສບ​ຕິດ ແລະ ອາ​ຊະ​ຍະ​ກຳ​ອື່ນໆ ໃຫ້​ມີ​ປະ​ສິດ​ທິ​ຜົນ;
  3. ສອງຝ່າຍຈະແລກປ່ຽນເອກະສານທາງດ້ານກົດໝາຍ ແລະ ຂໍ້ມູນຕ່າງໆ ເພື່ອ​ນຳ​ໃຊ້ໃນການປະຕິບັດໜ້າທີ່ຂອງຕົນໃນ​ແຕ່​ລະ​ໄລ​ຍະ;
  4. ຊຸກຍູ້ປະຕິບັດບົດບັນທຶກທີ່ທັງສອງຝ່າຍເຊັນກັນໃນໄລຍະທີ່ຜ່ານມາໃຫ້ປະກົດຜົນເປັນຈິງ;
  5. ອົງການໄອຍະການປະຊາຊົນແຂວງ ຢູນານ ແຫ່ງ ສປ ຈີນ ຊ່ວຍຈັດຝຶກອົບຮົມ ໃຫ້ພະນັກງານວິຊາການ 05 ແຂວງພາກເໜືອ ຂອງລາວທີ່ມີຊາຍແດນຕິດກັບແຂວງຢູນານໃນຫົວຂໍ້: ທີ່ຝ່າຍລາວຈະສົ່ງຫົວຂໍ້ໃຫ້ຝ່າຍ ສປ ຈີນ ຕາມສະພາບຄວາມເປັນຈິງ ສ່ວນສະຖານທີ່, ວັນເວລາ , ຈຳນວນພົນເຂົ້າຮ່ວມແມ່ນສອງຝ່າຍຈະປະສານສົມ ທົບກັນອີກຕື່ມອີກ;
  6. ການ​ແລກ​ປ່ຽນ​ບົດ​ຮຽນ​ຂອງ​ຄະ​ນະ​ຜູ້​ແທນ​ທັງ​ສອງ​ຝ່າຍ​ເຫັນ​ດີ​ປະ​ຕິ​ບັດ 02 ປີ ຕໍ່ຄັ້ງໂດຍມີການພັດປ່ຽນກັນເປັນເຈົ້າພາບໃນປີ 2020 ແມ່ນຝ່າຍ ສປ ຈີນຈະໄດ້ຮັບກຽດເປັນເຈົ້າພາບ.

   ກອງ​ປະຊຸມ​ດັ່ງກ່າວ​​ໄດ້ເສີມຂະຫຍາຍສາຍພົວພັນຮ່ວມື ແລະ ການແລກປ່ຽນບົດຮຽນທາງດ້ານວິຊາການ ລະຫວ່າງອົງການໄອຍະການປະຊາຊົນ 06 ແຂວງ ຂອງ 02 ປະເທດ, ເພີ່ມທະວີຮັດແໜ້ນຄວາມສາມັກໃຫ້ແໜ້ນແຟ້ນກວ່າ​ເກົ່າ, ສ້າງການປະສານສົມທົບ ແລະ ຮ່ວມມືກັນໃນການຕ້ານ, ການສະກັດກັ້ນອາຊະຍາກຳຢາເສບຕິດ, ການຄ້າມະນຸດ ແລະ ອາຊະຍາກຳ ອື່ນໆ ທີ່ຈະເກີດຂື້ນ, ເຮັດໃຫ້ຊາຍແດນຂອງສອງປະເທດມີສັນຕິພາບ, ມິດຕະພາບ ການຮ່ວມມືຮອບດ້ານ, ມີການພັດທະນາ ແລະ ຄວາມສະຫງົບສຸກໝັ້ນຄົງໃນທຸກໆດ້ານ.

by:ແສງພະຈັນ

07/03/2019

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ