ພິທີປາຖະກະຖາຫວນຄືນມູນເຊື້ອວັນສຳຄັນຂອງຊາດ ວັນແມ່ຍິງສາກົນ

   ໃນຕອນເຊົ້າຂອງວັນທີ 06 ມີນາ 2019 ຢູ່ທີ່ຫ້ອງປະຊຸມໃຫ່ຍຂອງອົງການໄອຍະການປະຊາຊົນສູງສຸດ ໄດ້ຈັດຕັ້ງພິທີຮັບຟັງປາຖະກະຖາຫວນຄືນມູນເຊື້ອວັນສໍາຄັນຂອງຊາດ ກໍຄືວັນແມ່ຍິງສາກົນ ຄົບຮອບ 109 ປີ (08 ມີນາ 1910 ຫາ 08 ມີນາ 2019) ໃຫ້ກຽດເປັນປະທານໂດຍ ສະຫາຍ ບຸນທັນ ບຸນທະວິໄລ ກໍາມະການຄະນະພັກ ຜູ້ຊີ້ນໍາ 3 ອົງການຈັດຕັ້ງມະຫາຊົນ ອົງການໄອຍະການປະຊາຊົນສູງສຸດ, ເຂົ້າຮ່ວມມີບັນດາຄະນະພັກ-ຄະນະນຳ, ບັນດາຫົວໜ້າກົມ, ຫ້ອງການ, ສະຖາບັນຄົ້ນຄ້ວາ ແລະ ຝຶກອົບຮົມໄອຍະການ ພ້ອມດ້ວຍພະນັກງານ-ລັດຖະກອນທັງໝົດເຂົ້າຮ່ວມ 200 ກວ່າທ່ານ.

   ການປາຖະກະຖາໃນຄັ້ງນີ້ ​ສະຫາຍ ບຸນທັນ ບຸນທະວິໄລ ໄດ້ຍົກໃຫ້ເຫັນປະຫວັດມູນ​ເຊື້ອການ​ກຳ​ເນີ​ດ ​ແລະ ຜົນງານ​ການ​ເຄື່ອນ​ໄຫວ ຂອງ​​ແມ່ຍິງ​ໃນທົ່ວໂລກ ກໍຄືແມ່ຍິງລາວ​ ໃນພາລະກິດ​ຕໍ່ສູ້ ​ເພື່ອ​ປົດ​ປ່ອຍ​ຊາດ​ກໍ​ຄືພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ​.

   ຜ່ານ​ຂະ​ບວນການ​ວຽກ​ງານ​ຕົວ​ຈິງ​ໃນ​ແຕ່ລະ​ໄລຍະ ແມ່ຍິງ​ລາວຈຳນວນ​ບໍ່​ໜ້ອຍ​ໄດ້​ຮັບ​ຄວາມ​ເຊື່ອ​ໝັ້ນຈາກພັກ-ລັດ ​ແລະ ມະຫາຊົນ ສະ​ແດງ​ອອກຢູ່ບ່ອນວ່າ​ແມ່ຍິງ​​ລາວໄດ້​ເຂົ້າ​ຮ່ວມ​ໃນ​ຕຳ​ແໜ່​ງນຳພາຂັ້ນສູງຂອງ​ພັກ-ລັດ ​ເຊັ່ນ: ສະພາ​ແຫ່ງ​ຊາດ, ລັດຖະບານ, ການ​ນຳ​ຂັ້ນກະຊວງ, ອົງການ, ຂັ້ນ​ແຂວງ, ​ເມືອງ ຈົນ​ຮອດຂັ້ນຮາກ​ຖານບ້ານ ມີ​ຈຳນວນ​ເພີ່ມ​ຂຶ້ນ. ເພື່ອ​ຍົກ​ສູງ​ບົດບາດ​ ​ໃນ​ການ​ນຳພາ​ຄຸ້ມ​ຄອງການຈັດຕັ້ງສະຫະພັນ​ແມ່ຍິງ​ ໄດ້​ເຄື່ອນ​ໄຫວ​ຕາມ​ພາລະ​ບົດບາດ​ຂອງ​ຕົນ​ຢ່າງມີ​ຜົນສຳ​ເລັດຕາມຈຸດປະສົງ ແລະ ຄາດໝາຍທີ່ວາງໄວ້. ຫຼັງຈາກເສັດພິທີຮັບຟັງປາຖະກະຖາແລ້ວ ເພື່ອເປັນການສະເຫຼີມສະຫຼອງວັນສຳຄັນດັ່ງກ່າວໃຫ້ມີຄວາມຟົດຟື້ນ ມີຄວາມມ່ວນຊ່ວນ ສະຫະພັນແມ່ຍິງ ອົງການ​ໄອ​ຍະ​ການ​ປະຊາຊົນ​ສູງ​ສຸດ ກໍໄດ້ຈັດກິດຈະກໍາຂຶ້ນ ເຊັ່ນ: ກິດຈະກຳຍາດຕັ່ງ, ກິດຈະກໍາຕີໝາກປູມເປົ້າໃຫ້ແຕກ, ກິດຈະກຳຕອບຄຳຖາມ ແລະ ກິດຈະກຳອື່ນໆ.

by:ແສງພະຈັນ

12/03/2019

ປະຕິທິນ

Mar-2019
S M T W T F S
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ