ພິທີມອບ-ຮັບ ເຄື່ອງຊ່ວຍເຫລືອເຄື່ອງຄອມພິວເຕີ, ທີວີ ແລະ ອຸປະກອນໄອທີ

         ຕອນເຊົ້າວັນທີ 31 ພຶດສະພາ 2019 ໄດ້ຈັດພິທີ ມອບ-ຮັບ ເຄື່ອງຊ່ວຍເຫຼືອຂຶ້ນຢູ່ຫ້ອງການອົງການໄອຍະການປະຊາຊົນສູງສຸດ  ໂດຍໃຫ້ກຽດປະທານຂອງ ທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ແລະ ມີຜູ້ເຂົ້າຮ່ວມຫ້ອງການ, ກົມແຜນການ ແລະ ການຮ່ວມມືກັບຕ່າງປະເທດ ແລະ ກົມການເງິນ ແລະ ທ່ານ ຈິນເຮີ້ ປະທານບໍລິສັດເຄບີ ສ.ເກົາຫຼີ, ທ່ານ ຊີຄຽງອີ ອຳນວຍການບໍລິສັດເຄບີໂຄລາວເຊົ່າສິນເຊື່ອຈຳກັດ ແລະ ທ່ານ ດຣ ຢອງໂຣລີ ຊ່ຽວຊານໄອທີ ມູນນິທິຄົ້ນຄວ້າແຫ່ງຊາດ National Research Foundation of Korea (NRF) ທີ່ເປັນຊ່ຽວຊານ ເຮັດວຽກຮ່ວມກັບຫ້ອງການອົງການໄອຍະການປະຊາຊົນສູງສຸດ, ພະແນກເຕັກນິກຂໍ້ມູນ ແລະ ຂ່າວສານ ພ້ອມດ້ວຍຄະນະ ທັງໝົດ 18 ທ່ານ.

ເພື່ອເປັນການຈັດຕັ້ງປະຕິບັດບົດບັນທຶກຊ່ວຍຈຳ Memorandum of Understanding (MOU) ລະຫວ່າງ ຫ້ອງອົງການໄອຍະການປະຊາຊົນສູງສຸດ ແລະ ບໍລິສັດເຄບີໂຄລາວເຊົ່າສິນເຊື່ອຈຳກັດ ໃນວັນທີ 06 ພຶດສະພາ 2019 ກ່ຽວກັບການຊ່ວຍເຫຼືອເຄື່ອງອຸປະກອນ ເຊັ່ນ ເຄື່ອງຄອມພິວເຕີຕັ້ງໂຕະ ຈໍານວນ 20 ໝ່ວຍ, ທີວີ 60 ນີ້ວ ຈໍານວນ 01 ໝ່ວຍ ແລະ ເຄື່ອງອຸປະກອນໄອທີິ ເຊື່ອມໂຍງອິນເຕີເນັດ ຈຳນວນ 05 ແກັດ ມູນຄ່າເປັນຈຳນວນເງິນ 9,000$ (ເກົ້າພັນໂດລາສະຫະລັດ).

ໃນພິທີ ມອບ-ຮັບ ໂຄງການເຄື່ອງຊ່ວຍເຫຼືອດັ່ງກ່າວ  ທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ກໍໄດ້ມີຄໍາເຫັນໂດຍໄດ້ຍົກໃຫ້ເຫັນວ່າ ໂຄງການຮັບເຄື່ອງຊ່ວຍເຫລືອນີ້ແມ່ນໜຶ່ງໃນການຈັດຕັ້ງປະຕິບັດໂຄງການໃນການພັດທະນາວຽກງານໄອທີ ຢູ່ອົງການໄອຍະການປະຊາຊົນສູງສຸດໃຫ້ມີຄວາມເຂັ້ມແຂງ ແລະ ທັນສະໄໝເທື່ອລະກ້າວ ເຊິ່ງເປັນການພັດທະນາຍົກລະດັບຄວາມຮູ້ຄວາມສາມາດຖັນແຖວພະນັກງານໃຫ້ສູງຂຶ້ນ ແລະ ການຍາດແຍ່ງໃຫ້ການຊ່ວຍເຫຼືອໃນຄັ້ງນີ້ ໂດຍແມ່ນຫ້ອງອົງການໄອຍະການປະຊາຊົນສູງສຸດ, ພະແນກເຕັກນິກຂໍ້ມູນ ແລະ ຂ່າວສານ ແລະ ຊ່ຽວຊານໄອທີ ມູນນິທິຄົ້ນຄວ້າແຫ່ງຊາດ National Research Foundation of Korea (NRF).

   ພ້ອມນັ້ນທ່ານຍັງໄດ້ຮຽກຮ້ອງມາຍັງຖັນແຖວພະນັກງານຈົ່ງພ້ອມກັນປົກປັກຮັກສາ ແລະ ນຳໃຊ້ເຄື່ອງອຸປະກອນດັ່ງກ່າວເຂົ້າໃນການເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິພາບ, ປະສິດທິຜົນ ແລະ ຕາງໜ້າຄະນະພັກ, ຄະນະນຳອົງການໄອຍະການປະຊາຊົນສູງສຸດ ສະແດງຄວາມຂອບໃຈມາຍັງ ທ່ານ ຈິນເຮີ້ ປະທານ ບໍລິສັດ ເຄບີ ສ.ເກົາຫຼີ, ທ່ານ ຊີຄຽງອີ ອໍານວຍການບໍລິສັດເຄບີິໂຄລາວເຊົ່າສິນເຊື່ອຈໍາກັດ ພ້ອມດ້ວຍຄະນະ ສະແດງຊົມເຊີຍ ທ່ານ ດຣ ຢອງໂຣລີ (Dr. Lee Young Ho) ອາສາສະໜັກ ຊ່ຽວຊານໄອຊີທີ ມູນນິທິຄົ້ນຄວ້າແຫ່ງຊາດ ສາທາລະນະລັດ ເກົາຫຼີ ທີ່ໄດ້ເອົາໃຈໃສ່ໃນການເຮັດວຽກງານຮ່ວມກັບອົງການໄອຍະການປະຊາຊົນສູງສຸດ ເວົ້າລວມ, ເວົ້າສະເພາະ ຫ້ອງການອົງການໄອຍະການປະຊາຊົນສູງສຸດ ແລະ ພະແນກ ເຕັກນິກຂໍ້ມູນ ແລະ ຂ່າວສານ ໃນຍາດແຍ່ງໂຄງການຊ່ວຍເຫຼືອດັ່ງກ່າວເຂົ້າມາພັດທະນາປັບປຸງລະບົບ ໄອຊີທີ ຂອງອົງການໄອຍະການປະຊາຊົນ ແລະ ມີທັນສະໄໜຂຶ້ນເທື່ອລະກ້າວ.

 

by:SACK

31/05/2019

ປະຕິທິນ

Sep-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ