ພິທີພົບປະ ລະຫວ່າງ ຄະນະຜູ້ແທນ ອົງການໄອຍະການປະຊາຊົນ ແຂວງຫຼວງພະບາງ ແຫ່ງ ສປປ ລາວ-ແຂວງດຽນບຽນແຫ່ງ ສສ ຫວຽດນາມ

   ໂດຍຕອບ​ສະໜອງ​ຕາມ​ຄຳ​ເຊີນ​ຂອງ​ຫົວໜ້າ​ອົງການ​ໄອ​ຍະ​ການ​ປະຊາຊົນ​ແຂວງ ຫຼວງ​ພະ​ບາງ, ຫົວໜ້າ​ອົງການ​ໄອ​ຍະ​ການ​ປະຊາຊົນ​ແຂວງ ດຽນບຽນ ​ແຫ່ງ ສສ ຫວຽດນາມ ພ້ອມ​ຄະນະ​ໄດ້​ເດີນທາງ​ມາ​ເຮັດ​ວຽກ ​ແລະ ຢ້ຽມ​ຢາມ ​ອົງການ​ໄອ​ຍະ​ການ​ປະຊາຊົນ​ແຂວງ ຫຼວງ​ພະ​ບາງ ​ເພື່ອ​ເສີມ​ຂະຫຍາຍ​ມູມ​ເຊື້ອບົນ​ຈິດ​ໃຈ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ, ໝັ້ນຄົງ, ຍາວ​ນານ ຕາມ​ບົດ​ບັນທຶກ​ຊ່ວຍ​ຈຳ​ທີ່​ສອງ​ແຂວງ​ໄດ້​ລົງ​ນາມ​ຮ່ວມ​ກັນ ​ໃນ​ວັນ​ທີ 22 ມິ​ຖຸນາ 2011 ຢູ່​ທີ່​ ອົງການ​ໄອ​ຍະ​ການ​ປະຊາຊົນ​ແຂວງ ດຽນບຽນ ​ແຫ່ງ ສສ ຫວຽດນາມ ການ​ຮ່ວມື ​ແລະ ​ແລກປ່ຽນ​ບົດຮຽນ​ເຊິ່ງກັນ ​ແລະ ກັນ​ໃຫ້​ນັບ​ມື້​ນັບ​ເຕີບ​ໃຫ່ຍຂະຫຍາຍຕົວ ​ແລະ ຫັນ​ການ​ຮ່ວມ​ມື​ໃຫ້​ເຂົ້າສູ່​ລົງ​ເລິກ​ເປັນ​ເທື່ອ​ລະ​ກ້າວ ​ໃຫ້​ປະກົດ​ຜົນ​ເປັນ​ຈິງ​ຕາມ​ແນວທາງ​ນະ​ໂຍບາຍ​ຂອງ​ສອງ​ພັກ, ສອງ​ລັດ ສປປ ລາວ-ສສ ຫວຽດນາມ  ​ເວົ້າ​ລວມ, ​ເວົ້າສະ​ເພາະ ​ແມ່ນ​ທິດ​ທາງ​ແຜນການ​ເສີມ​ຂະຫຍາຍ​ສາຍ​ພົວພັນ​ຮ່ວມ​ມື ກັບ​ຕ່າງປະ​ເທດ​ເພື່ອນ​ຍຸດ​ທະ​ສາດ​ຂອງ​ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ກັບ ອົງການ​ໄອ​ຍະ​ການ​ປະຊາຊົນ ​ແຂວງ​ດຽນບຽນ ​ແຫ່ງ ສສ ຫວຽດນາມ ​ໃຫ້​ແໜ້ນ​ແຟ້ນຍິ່ງ​ຂຶ້ນກວ່າ​ເກົ່າ.

   ໃນຕອນ​ເຊົ້າຂອງ​ວັນ​ທີ່ 5 ມີນາ 2019 ຢູ່ທີ່​ ຫ້ອງ​ປະຊຸມ​ຂອງ​ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ​ໄດ້​ຈັດ​ກອງ​ປະຊຸ​ມ ພົບ​ປະ​ແລກປ່ຽນ​ບົດຮຽນ ລະຫວ່າງ ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ​ແລະ ອົງການ​ໄອ​ຍະ​ການ​ປະຊາຊົນ ​ແຂວງ​ດຽນບຽນ ​ແຫ່ງ ສສ ຫວຽດນາມ.

   ຝ່າຍ​ແຂວງ​ຫຼວງ​ພະ​ບາງ ​ນຳ​ໂດຍ ທ່ານ ບຸນ​ເລື່ອມ ມະນີ​ວົງ ກຳມະການ​ພັກ​ແຂວງ ຫົວໜ້າ​ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ຝ່າຍ​ຫວຽດນາມ​ ນຳ​ໂດຍ​ທ່ານ ຟານ​ວັນ​ກີ້ ​ເລຂາ​ຄະນະ​ພັກ ຫົວໜ້າ​ອົງການ​ໄອ​ຍະ​ການ​ປະຊາຊົນ ​ແຂວງ​ດຽນບຽນ ​ແຫ່ງ ສສ ຫວຽດນາມ ພ້ອມ​ດ້ວຍ​ຜູ້​ແທນ​ທັງ​ສອງ​ຝ່າຍ ການ​ພົບ​ປະຄັ້ງນີ້​ ທັງ​ສອງ​ຝ່າຍ​ໄດ້​ຕີ​ລາຄາສູງ​ກ່ຽວ​ກັບ​ສາຍ​ພົວພັນ​ຮ່ວມ​ມື​ຢ່າງ​ສະ​ນິດ​ແໜ້ນ ລະຫວ່າງ ສອງ​ປະ​ເທດ ລາວ-ຫວຽດນາມ ​ເວົ້າລວມ ​ເວົ້າສະ​ເພາະ​ແມ່ນ ອົງການ​ໄອ​ຍະ​ການ​ປະຊາຊົນ​ຂອງ​ສອງ​ແຂວງ​ກໍ​ຄື ​ແຂວງ​ຫຼວງ​ພະ​ບາງ ​ແລະ ​ແຂວງ​ດຽນບຽນ ພ້ອມ​ນີ້​ ທັງ​ສອງ​ຝ່າຍ​ໄດ້​ລາຍ​ງານ​ສະພາບ​ການຈັດຕັ້ງປະຕິບັດ​ຕາມ​ພາລະ​ບົດບາດ, ສິດ ​ແລະ ໜ້າ​ທີ່​ຕົ້ນຕໍ​ຂອງ​ອົງການ​ໄອ​ຍະ​ການ​ປະຊາຊົນ​ທັງ​ສອງ​​ແຂວງ ທີ່​ໄດ້​ປະຕິບັດ​ກັນ​ມາ​ ເຊັ່ນ: ການ​ປະຕິບັດ​ຕາມ​ພາລະ​ບົດບາດ ​ແລະ ການ​ຕິດຕາມ​ກວດກາ​ປະຕິບັດ​ກົດໝາຍ​ຂອງ​ພາກສ່ວນ​ກ່ຽວຂ້ອງ, ການ​ແກ້​ໄຂ​ຄະດີ​ຕ່າງໆ ​ກໍ​ຄື​ການ​ພົວພັນ​ຮ່ວມ​ມື​ແລກປ່ຽນ​ບົດຮຽນ ກັບ ອົງການ​ໄອ​ຍະ​ການ​ປະຊາຊົນ​ສອງ​ແຂວງ​ໃນ​ໄລຍະ​ຜ່ານ​ມາ ​ເຊິ່ງ​ໃນ​ໄລຍະ​ຜ່ານ​ມານັ້ນກໍ່​ໄດ້​ມີ​ການ​ພັດ​ປ່ຽນ​ກັນ​ເປັນ​ເຈົ້າພາບ ​ໃນ​ການ​ຈັດ​ກອງ​ປະຊຸມ​ທາງ ດ້ານ​ການ​ແລກປ່ຽນ​ບົດຮຽນນຳ​ກັນ​ປົກກະຕິ​ 2 ປີ​ຕໍ່ໜຶ່ງຄັ້ງ ​ໂອກາດ​ດັ່ງກ່າວ​ນີ້​ທັງ​ສອງ​ຝ່າຍ​ໄດ້​ຍົກ​ເອົາ​ບາງ​ບັນຫາ​ທີ່​ສຳຄັນ​ຂຶ້ນ​ມາ​ເພື່ອ​ແລກປ່ຽນ​ບົດຮຽນ​ຮ່ວມ​ກັນ ​ໃນ​ນັ້ນ​ແມ່ນ​ບັນຫາ​ການ​ສັ່ງ​ຟ້ອງ​ຜູ້​ກະທຳ​ຜິດຂຶ້ນ​ສານ  ​ແລະ ການ​ແກ້​ໄຂ​ອາ​ຊະຍາກຳ​ຕາມ​ຊາຍ​ແດນ, ຄະດີ​ຄົນ​ຫວຽດນາມ​ມາ​ກະທຳ​ຜິດຢູ່​ແຂວງ​ຫຼວງ​ພະ​ບາງ, ຄົນ​ລາວ​ໄປ​ກະທຳ​ຜິດ​ຢູ່​ແຂວງ​ດຽນບຽນ ບັນຫາ​ວຽກ​ງານ​ຍຸຕິ​ທຳ​ທາງ​ອາຍາ, ການ​ແລກປ່ຽນ​ຂໍ້​ມູນ​ຂ່າວສານ​ຕ່າງໆ ກໍ່​ຄືວຽກ​ງານ​ອື່ນໆ ​ທີ່​ກ່ຽວຂ້ອງ​  ມາ​ແລກປ່ຽນ​ນຳ​ກັນ ​ເພື່ອ​ເຮັດການ​ພົວພັນ​ຮ່ວມ​ມື​ວຽກ​ງານ​ດ້ານ​ຕ່າງໆ​ ຂອງ​ສອງ​ແຂວງ​ໃຫ້​ມີ​ຄວາມ​ໜັກ​ແໜ້ນ ​ເຂັ້ມ​ແຂງ​ຖືກ​ຕາມ​ທິດຊີ້​ນຳ ​ຂອງ​ອົງການ​ໄອ​ຍະ​ການ​ປະຊາຊົນ​ສູງ​ສຸດ ຂອງ​ສອງ​ປະ​ເທດ.

   ຈາກ​ການ​ປະ​ເມີນ​ຜົນສຳ​ເລັດ​ໃນ​ໄລຍະ​ຜ່ານ​ມາ​ທັງ​ສອງ​ຝ່າຍ​ໄດ້​ລົງ​ນາມ​ໃນ​ບົດ​ບັນທຶກ​ກອງ​ປະຊຸມ​ເຊິ່ງ​ໄດ້​ມີ​ການ​ຕົກລົງ​ບາງ​ບັນຫາ​ຢູ່​ໃນ​ບົດ​ບັນທຶກ​ດັ່ງ​ກ່າວ ​ເຊັ່ນ:

  1. ສືບ​ຕໍ່​ການ​ຮ່ວມ​ມື​ມິດຕະພາບ ລະຫວ່າງ ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ​ແລະ ອົງການ​ໄອ​ຍະ​ການ​ປະຊາຊົນ ​ແຂວງ​ດຽນບຽນ ​ແຫ່ງ ສສ ຫວຽດນາມ ປະຕິບັດ​ຕາມ​ບົດ​ບັນທຶກ​ກອງ​ປະຊຸມ​ພົບ​ປະ ລະຫວ່າງ ສອງ​ອົງການ​ພວກ​ເຮົາ​ທີ່​ມີ​ຊາຍ​ແດນ​ຮ່ວມ​ກັນ​ໃຫ້​ເຂັ້ມ​ງວດ ​ແລະ ​ ເພີ່ມທະວີ​ກົນ​ໄກ​ການ​ແລກປ່ຽນ​ຂໍ້​ມູນ​ຂ່າວສານ​ຢ່າງ​ເປັນ​ປົກກະຕິ ​ແລະ ທັນ​ເວລາ.
  2. ​ເພີ່​ມທະວີ​ການ​ປະສານ​ສົມທົບ​ໃນ​ການ​ສະກັດ​ກັ້ນ ​ແລະ ຕ້ານ​ອາ​ຊະ​ຍາ​ກຳ ​ໂດຍ​ສະ​ເພາະ​ແມ່ນ​ອາ​ຊະ​ຍາ​ກຳ​ຂ້າມ​ຊາຍ​ແດນ, ການ​ຂົນ​ສົ່ງ​ຢາ​ເສບ​ຕິດ ​ແລະ ການ​ຄ້າ​ມະນຸດ.
  3. ​ເມື່ອ​ໄດ້​ຮັບ​ຄວາມ​ຮຽກຮ້ອງ​ໃນ​ການ​ຊ່ວຍ​ເຫຼືອ​ຍຸຕິ​ທຳ​ທາງ​ອາຍາ ອົງການ​ໄອ​ຍະ​ການ​ປະຊາຊົນ​ສອງ ​ແຂວງ​ຕ້ອງ​ໄດ້​ປະຕິບັດ​ຢ່າງ​ຮີບ​ດ່ວນ ​ແລະ ​ແຈ້ງ​ຜົນ​ການ​ແກ້​ໄຂ​ກັນຊາ​ບ ​ໃຫ້​ຖືກຕ້ອງ​ຕາມ​ກຳນົດ​ເວລາ, ​ເພື່ອ​ປ້ອງ​ກັນ​ທຸກ​ອາ​ຊະ​ຍາ​ກຳ​ທາງ​ອາຍາ ປະກອບສ່ວນ​ເຂົ້າ​ໃນ​ການ​ປົກ​ປັກ​ຮັກສາ​ຄວາມ​ສະຫງົບ, ຄວາມ​ເປັນ​ລະບຽບ​ຮຽບຮ້ອຍ​ຢູ່​ເຂດ​ຊາຍ​ແດນ.
  4. ຜົນ​ຂອງ​ກອງ​ປະຊຸມ​ພົບ​ປະ ​ໃນ​ຄັ້ງນີ້ ອົງການ​ໄອ​ຍະ​ການ​ປະຊາຊົນ​ສອງ​ແຂວງ ຫຼວງ​ພະ​ບາງ ແຫ່ງ ສປປ ລາວ ​ແລະ ​ແຂວງ​ດຽນບຽນ ​ແຫ່ງ ສສ ຫວຽດນາມ ລາຍ​ງານ​ໃຫ້​ອົງການ​ໄອ​ຍະ​ການ​ປະຊາຊົນສູງ​ສຸດ ສອງ​ປະ​ເທດ​ຮັບ​ຊາບ ​ເພື່ອ​ມີ​ທິດ​ຊີ້​ນຳ ​ແລະ ຈັດຕັ້ງປະຕິບັດ.

      ໃນ​ການ​ຢ້ຽມຢາມ ​ແລະ ​ເຮັດ​ວຽກ ກັບ​ອົງການ​ໄອ​ຍະ​ການ​ປະຊາຊົນ​ແຂວງ ຫຼວງ​ພະ​ບາງ ທັງ​ສອງ​ຝ່າຍ​ຄະນະ​ຜູ້​ແທນ​ກໍ່​ໄດ້​ແລກປ່ຽນ​ບົດຮຽນ​ເຊິ່ງກັນ ​ແລະ ກັນ, ​ໄດ້​ຮັບ​ຜົນສຳ​ເລັດ​ຕາມ​ຈຸດປະສົງ ​ແລະ ​ເປົ້າ ໝາຍ​ຢ່າງ​ຈົບງາມ.

by:

10/06/2019

ປະຕິທິນ

Jun-2019
S M T W T F S
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ