ຄະນະຜູ້ແທນ ອົງການໄອຍະການປະຊາຊົນ ແຂວງຫຼວງພະບາງ ແຫ່ງ ສປປ ລາວ ຢ້ຽມຢາມ ແລະ ເຮັດວຽກຮ່ວມກັບ ອົງການໄອຍະການປະຊາຊົນ ແຂວງເຊີນລາ ແຫ່ງ ສສ ຫວຽດນາມ

   ເພື່ອ​ເປັນການ​ຈັດຕັ້ງປະຕິບັດ​ບົດ​ບັນທຶກ​ຊ່ວຍ​ຈຳ ລະຫວ່າງ ອົງການ​ໄອ​ຍະ​ການ​ປະຊາຊົນ​ແຂວງ​ຫຼວງ​ພະ​ບາງ ​ແຫ່ງ ສປປ ລາວ ​ແລະ ອົງການ​ໄອ​ຍະ​ການ​ປະຊາຊົນ ​ແຂວງ​ເຊີນ​ລາ ​ແຫ່ງ ສສ ຫວຽດນາມ , ຕອບ​ສະ ໜອງ​ຕາມ​ການ​ເຊື້ອ​ເຊີນ​ຂອງ ສະຫາຍ ຫງວຽນ​ດີ່ງດືກ ກຳມະການ​ພັກ​ແຂ​ວງ ຫົວໜ້າ​ອົງການ​ໄອ​ຍະ​ການ​ປະຊາຊົນ​ແຂວງ​ເຊີນ​ລາ ​ແຫ່ງ ສສ ຫວຽດນາມ ຄະນະ​ຜູ້​ແທນ​ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ນຳ​ໂດຍ ສະຫາຍ ບຸນ​ເລື່ອມ ມະນີ​ວົງ ກຳມະການ​ພັກ​ແຂວງ ຫົວໜ້າ​ອົງການ​ໄອ​ຍະ​ການ​ປະຊາຊົນ​ແຂວງ ພ້ອມ​ດ້ວຍ​ຄະນະ​ໄດ້​ເດີນທາງ​ໄປ​ຢ້ຽມຢາມ ​ແລະ ​ເຮັດ​ວຽກ ຢ່າງ​ເປັນ​ທາງ​ການ ກັບ ​ອົງການ​ໄອ​ຍະ​ການ​ປະຊາຊົນ ​ແຂວງ​​ເຊີນ​ລາ ​ແຫ່ງ ສສ ຫວຽດນາມ ​ໃນລະຫວ່າງ ວັນ​ທີ 01 ຫາ 05 ​ເມສາ 2019.

   ການ​ຢ້ຽມຢາມ ຂອງ ຄະນະຜູ້​ແທນ​ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ​ໃນ​ຄັ້ງນີ້: ​ແມ່ນ​ເພື່ອ​ເສີມ​ຂະຫຍາຍ​ສາຍ​ພົວພັນ​ທີ່​ເປັນ​ມູນ​ເຊື້ອ​ບົນ​ຈິດ​ໃຈ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ, ໝັ້ນຄົງ ຍາວ​ນານ​ຕາມ​ບົດ​ບັນທຶກ​ຊ່ວຍ​ຈຳ​ທີ່​ສອງ​ແຂວງ​ໄດ້​ລົງ​ນາມ​ຮ່ວມ​ກັນ​ໃນ​ວັນ​ທີ 21 ​ເມສາ 2008 ຢູ່​ທີ່​ອົງການ​ໄອ​ຍະ​ການ​ປະຊາຊົນ​ແຂວງ​ເຊີນ​ລາ ​ແຫ່ງ ສສ ຫວຽດນາມ. ການ​ຮ່ວມມື ​ແລະ ການ​ແລກປ່ຽນ​ບົດຮຽນ​ເຊິ່ງກັນ ​ແລະ ກັນ ລະຫວ່າງ ອົງການໄອ​ຍະ​ການ​ປະຊາຊົນ​ແຂວງ​ຫຼວງ​ພະ​ບາງ ​ແຫ່​ງ ສປປ ລາວ ​ແລະ ອົງການ​ໄອ​ຍະ​ການ​ປະຊາຊົນ​ແຂວງ​ເຊີນ​ລາ ​ແຫ່ງ ສສ ຫວຽດນາມ ​ໃຫ້​ນັບ​ມື້​ນັບ​ເຕີບ​ໃຫ່ຍຂະຫຍາຍຕົວ ​ແລະ ຫັນ​ການ​ຮ່ວມ​ມື​ໃຫ້​ເຂົ້າສູ່​ລົງ​ເລິກ.​ ​ ອົງການໄອ​ຍະ​ການ​ປະຊາຊົນ​ແຂວງ​ຫຼວງ​ພະ​ບາງ  ​ແຫ່ງ ສປປ ລາວ ​ແລະ ອົງການ​ໄອ​ຍະ​ການ​ປະຊາຊົນ​ແຂວງ​ເຊີນ​ລາ ​ແຫ່ງ ສສ ຫວຽດນາມ ​ໄດ້​ເລີ່​ມພົວພັນ​ເຊິ່ງກັນ ​ແລະ ກັນ ​ແຕ່​ປີ 2008 ​ເປັນຕົ້ນມາ, ​ໃນ​ເວລາ​ນັ້ນສອງ​ອົງການ​ໄດ້​ເລີ່​ມມີ​ການ​ແລກປ່ຽນ​ຄະນະ​ຜູ້​ແທນ​ເຊິ່ງກັນ ​ແລະ ກັນ​ເປັນຄັ້ງທຳ​ອິດ, ຈາກ​ນັ້ນທັງ​ສອງ​ອົງການ​ກໍ່​ໄດ້​ມີ​ການ​ແລກປ່ຽນ​ກັນ​ນັບ​ມື້​ນັບ​ຂະຫຍາຍຕົວ​ຂື້ນ​ເລື້ອຍໆ ​ໃນຕອນ​ເຊົ້າຂອງ​ວັນ​ທີ່ 2 ​ເມສາ 2019 ທີ່ຢູ່​ຫ້ອງ​ປະຊຸມ​ຂອງ​ອົງການ​ໄອ​ຍະ​ການ​ປະຊາຊົນແຂວງ​​ເຊີນ​ລາໄດ້​ຈັດ​ກອງ​ປະຊຸ​ມ ພົບ​ປະ​ແລກປ່ຽນ​ບົດຮຽນ ລະຫວ່າງ ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ​ແລະ ອົງການ​ໄອ​ຍະ​ການ​ປະຊາຊົນ ​ແຂວງ​​ເຊີນ​ລາ ​ແຫ່ງ ສສ ຫວຽດນາມ.

   ຝ່າຍ​ຫວຽດນາມ​​ນຳ​ໂດຍ​ສະຫາຍ ຫງວຽນ​ດີ່ງດືກ ​ກຳມະການ​ພັກ​ແຂວງ ຫົວໜ້າ​ອົງການ​ໄອ​ຍະ​ການ​ປະຊາຊົນ ​ແຂວງ​​ເຊີນ​ລາ, ຝ່າຍ​ແຂວງ​ຫຼວງ​ພະ​ບາງ​​ນຳ​​ໂດຍສະຫາຍ ບຸນ​ເລື່ອມ ມະນີ​ວົງ ກຳມະການ​ພັກ​ແຂວງ ຫົວໜ້າ​ອົງການ​ໄອ​ຍະ​ການ​ປະຊາຊົນ ​ແຂວງ​ຫຼວງ​ພະ​ບາງ ພ້ອມ​ດ້ວຍ​ຜູ້​ແທນ​ທັງ​ສອງ​ຝ່າຍ ການ​ພົບ​ປະຄັ້ງນີ້​ທັງ​ສອງ​ຝ່າຍ​ໄດ້​ຕີ​ລາຄາສູງ​ ​ແລະ ລາຍ​ງານ​ໃຫ້​ກັນຊາ​ບກ່ຽວ​ກັບການ​ພັດທະນາ​ເສດຖະກິດ-ສັງຄົມ, ການ​ເຄື່ອນ​ໄຫວ​ວຽກ​ງານ​ຂອງອົງການ​ໄອ​ຍະ​ການ​ປະຊາຊົນ ສອງ​ແຂວງ, ການ​ພົວພັນ​ຮ່ວມ​ມື​ຊ່ວຍ​ເຫຼືອ​ເຊິ່ງກັນ ​ແລະ ກັນ ​ວຽກ​ງານ​ຍຸຕິ​ທຳ​ທາງ​ອາຍາ, ບັນຫາ​ອາດຊະຍາ​ກຳ​ຕາມ​ຊາຍ​ແດນ, ການ​ຈັບ​ຕົວ, ການ​ສືບສວນ-ສອບ​ສວນ, ການ​ເກັບ​ກຳ​ຂໍ້​ມູນ​ຫຼັກ​ຖານ ​ໃນ​ການ​ດຳ​ເນີນ​ຄະດີ​ອາຍາ ​ໂດຍ​ສະ​ເພາະ​ແມ່ນ​ບັນຫາ​ການ​ຄ້າ​ມະນຸດ, ການ​ລັກລອບ​ຂົນ​ສົ່ງຢາ​ເສບ​​ຕິດຕາມ​ເຂດ​ຊາຍ​ແດນ, ການ​ຕັ້ງຖິ່ນ​ຖາ​ນພູມລຳ​ເນົາ ​ແລະ ການ​ເຂົ້າອອກ​ເມືອງ​ໂດຍ​ບໍ່​ຖືກຕ້ອງ​ຕາມ​ກົດໝາຍ ​ແລະ ບັນຫາ​ອື່ນໆ.

   ຈາກ​ການ​ປະ​ເມີນ​ຜົນສຳ​ເລັດ​ໃນ​ໄລຍະ​ຜ່ານ​ມາ​ທັງ​ສອງ​ຝ່າຍ​ໄດ້​​ລົງ​ນາມ​ໃນ​ບົດ​ບັນທຶກ​ກອງ​ປະຊຸມຮ່ວມ​ກັນ​ເຊິ່ງ​ໄດ້​ມີ​ການ​ຕົກລົງ​ບາງ​ບັນຫາ​ດັ່ງ​ນີ້:

  1. ສອງ​ຝ່າຍ​ເຫັນ​ດີ​ແລກປ່ຽນ​ຂໍ້​ມູນ​ຂ່າວສານ ​ແລະ ສະໜອງ​ຂໍ້​ມູນ​ກ່ຽວ​ກັບ​ກົດໝາຍ, ນິຕິ​ກຳ ​ແລະ ວາລະສານ ທີ່​ຕິດ​ພັນ​ກັບ​ວຽກ​ງານ​ໄອ​ຍະ​ການ ​ເພື່ອ​ເປັນ​ພື້ນຖານ​ໃຫ້​ແກ່​ການ​ຮ່ວມ​ມື, ການຄົ້ນຄວ້າ ​ແລະ ນຳ​ໃຊ້​ເຂົ້າ ​ໃນ​ການ​ປະຕິບັດ​ໜ້າ​ທີ່​ວິຊາ​ສະ​ເພາະ​ໃຫ້​ນັບ​ມື້​ດີ​ຂື້ນ​.
  2. ການຄົ້ນຄວ້າ​ບັນດາ​ວິທີ​ຕ້ານ​ສະກັດ​ກັ້ນອາ​ຊະ​ຍາ​ກຳ​​ເຊັ່ນ: ການຄ້າຂາຍ​ເຖື່ອນ, ຄ້າ​ມະນຸດ, ຊື້​ຂາຍ ​ແລະ ​ ການ​ຂົນ​ສົ່ງ​ຢາ​ເສບ​ຕິດ ທີ່​ມີ​ການຈັດຕັ້ງຜ່ານ​ຊາຍ​ແດນ. ​
  3. ​ເພີ້​ມທະວີ​ວຽກ​ງານ​ເສນາ​ທິການໃຫ້​ຄະນະ​ພັກ, ອຳນາດ​ການ​ປົກຄອງ​ທ້ອງ​ຖິ່ນ ​ໃນ​ການ​ແກ້​ໄຂ​ບັນຫາ​ຄວາມ​ສະຫງົບ​ເຂດ​ຊາຍ​ແດນ, ປະກອບສ່ວນ​ເຂົ້າ​ໃນການ​ສ້າງສາຊາຍ​ແດນ​ໃຫ້​ເປັນການ​ສັນຕິພາບ,​ ມິດຕະພາບ, ມີ​ຄວາມ​ສະຫງົບ ​ແລະ ມີ​ການ​ພັດທະນາ.

      ໃນ​ການ​ຢ້ຽມຢາມ​ ແລະ ​ເຮັດ​ວຽກ ກັບ​ອົງການ​ໄອ​ຍະ​ການ​ປະຊາຊົນ​ແຂວງ​ເຊີນ​ລາ ​ແຫ່ງ ສສ ຫວຽດນາມ ​ໃນ​ຄັ້ງນີ້​ໄດ້​ຮັບ​ການ​ຕ້ອນຮັບຢ່າງ​ອົບ​ອຸ່ນ​ຈາກສະຫາຍ ຫງວຽນ​ດີ່ງດືກ ກຳມະການ​ພັກ​ແຂວງ ຫົວໜ້າ​ອົງການ​ໄອ​ຍະ​ການ​ປະຊາຊົນ​ແຂວງ​ເຊີນ​ລາ ທັງ​ສອງ​ຝ່າຍ ຄະນະ​ຜູ້​ແທນ​ກໍ່​ໄດ້​ແລກປ່ຽນ​ບົດຮຽນ​ເຊິ່ງກັນ ​ແລ​ະ ກັນ ​ແລະ ​ໄດ້​ຢ້ຽມຢາມ​ບັນດາ​ເມືອງ​ພື້ນຖານ​ການ​ຜະລິດ​ຈຳນວນ​ນື່ງ​ໂດຍ ​ໄດ້​ຮັບ​ຜົນສຳ​ເລັດ​ຕາມຈຸດປະສົງ ​ແລະ ​ເປົ້າໝາຍ​ຢ່າງ​ຈົບງາມ.

by:

10/06/2019

ປະຕິທິນ

Jun-2019
S M T W T F S
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ