ກອງປະຊຸມຄັ້ງປະຖົມມະເລີກຄະນະຊີ້ນຳໂຄງການ “ສົ່ງເສີມການພັດທະນາ ແລະ ສ້າງຄວາມເຂັ້ມແຂງທີ່ປົກຄອງດ້ວຍກົດໝາຍໃນຂົງເຂດຍຸຕິທຳ ຂອງ ສປປ ລາວ”

     ໃນວັນທີ 11 ມີຖຸນາ 2019 ທີ່ ນະຄອນຫລວງວຽງຈັນ ໄດ້ເປີດກອງປະຊຸມຄັ້ງປະຖົມມະເລີກຄະນະຊີ້ນຳໂຄງການ “ສົ່ງເສີມການພັດທະນາ ແລະ ສ້າງຄວາມເຂັ້ມແຂງທີ່ປົກຄອງດ້ວຍກົດໝາຍໃນຂົງເຂດຍຸຕິທຳ ຂອງ ສປປ ລາວ” ໂດຍພາຍໃຕ້ການເປັນປະທານຮ່ວມຂອງ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ, ທ່ານ ບຸນສະຫວາດ ບຸບຜາ ຮອງລັດຖະມົນຕີ ກະຊວງ ຍຸຕິທຳ, ທ່ານ ຮສ. ປອ. ສົມສີ ຍໍພັນໄຊ  ຮອງອະທິບໍດີມະຫາວິທະຍາໄລແຫ່ງຊາດ, ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ ທັງເປັນຄະນະຊີ້ນຳໂຄງການ, ມີຜູ້ຊ່ຽວຊານທີ່ມາຈາກປະເທດຍີ່ປຸ່ນ ແລະ ປະຈຳຢູ່ ສປປ ລາວ, ນັກຄົ້ນຄວ້າທີ່ມາຈາກກະຊວງຍຸຕິທຳ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ, ກະຊວງປ້ອງກັນຄວາມສະຫງົບ ແລະ ສະພາທະນາຍຄວາມ ເຂົ້າຮ່ວມຢ່າງພ້ອມພຽງ ເພື່ອທົບທວນຄືນການຈັດຕັ້ງປະຕິບັດແຜນການຂອງໂຄງການໃນໜຶ່ງປີທຳອິດ ແລະ ວາງແຜນການ 6 ເດືອນຕໍ່ໜ້າ.

    ໂຄງການ “ສົ່ງເສີມການພັດທະນາ ແລະ ສ້າງຄວາມເຂັ້ມແຂງທີ່ປົກຄອງດ້ວຍກົດໝາຍໃນຂົງເຂດຍຸຕິທຳ ຂອງ ສປປ ລາວ” ແມ່ນໂຄງການລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ຍີ່ປຸ່ນ ໂດຍໄດ້ລົງນານໃນເດືອນ ກໍລະກົດ 2018, ມີກຳນົດເວລາຈັດຕັ້ງປະຕິບັດ 5 ປີ ຊຶ່ງຈະສິ້ນສຸດລົງໃນປີ 2023 ໂດຍມີຈຸດປະສົງຊ່ວຍລັດຖະບານ ແຫ່ງ ສປປ ລາວ ໃນການສົ່ງເສີມພັດທະນາ ແລະ ການສ້າງຄວາມເຂັ້ມແຂງລັດ ທີ່ປົກຄອງດ້ວຍກົດໝາຍໃນຂົງເຂດຍຸຕິທຳຂອງ ສປປ ລາວ.

     ເມື່ອໂຄງການ ການພັດທະນາ ແລະ ສ້າງຄວມເຂັ້ມແຂງ ລັດທີ່ປົກຄອງດ້ວຍກົດໝາຍໃນຂົງເຂດຍຸຕິ ຂອງ ສປປ ລາວ ຈະໄດ້ຮັບການສົ່ງເສີມຢ່າງມີປະສິດທິຜົນ; ປະມວນກົດໝາຍແພ່ງ ຈະໄດ້ຮັບການເຜີຍແຜ່, ນຳໃຊ້ເຂົ້າໃນຊີວິດ ສັງຄົມ ຂອງພົນລະເມືອງລາວ ຢ່າງມີປະສິດທິຜົນ; ກົດໝາຍ, ນິຕິກຳຈຳນວນໜຶ່ງທີ່ຈຳເປັນໃຫ້ແກ່ການປະຕິບັດປະມວນກົດໝາຍແພ່ງ ຈະໄດ້ຮັບການພັດທະນາ;

      ປື້ມຄູ່ມືໃນຂົງເຂດກົດໝາຍ ຈະໄດ້ນຳໃຊ້ເປັນຕຳລາສິດສອນ, ເຜີຍແຜ່ໃນສະຖາບັນການສຶກສາ, ອົງການຕ່າງໆໃນຂົງເຂດຍຸຕິທຳ ກໍຄືສັງຄົມຢ່າງກວ້າງຂວາງ. ອັນທີ່ສຳຄັນທີ່ສຸດນັ້ນ, ບັນດາທ່ານເຂົ້າຮ່ວມໂຄງການໄປໝູນໃຊ້ເຂົ້າໃນການປະຕິບັດໜ້າທີ່ວຽກງານທີ່ຕົນໄດ້ຮັບມອບໝາຍ ມີຜົນສຳເລັດ ພ້ອມທັງຖ່າຍທອດບົດຮຽນດັ່ງກ່າວໃຫ້ຜູ້ອື່ນເປັນຢ່າງດີ. ກອງປະຊຸມໄດ້ດຳເນີນເປັນເວລາເຄິ່ງວັນ ແລະ ໄດ້ປິດລົງຢ່າງຈົບງາມ.

by:ຈະເລີນສິນ

11/06/2019

ປະຕິທິນ

Jun-2019
S M T W T F S
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ