ການພົວພັນຮ່ວມມືລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ-ສ. ກູບາ

     ໃນລະຫວ່າງວັນທີ 28 ຫາ 30 ພຶດສະພາ 2019 ຄະນະຜູ້ແທນຂັ້ນສູງ ອົງການໄອຍະການສູງສຸດ ແຫ່ງ ສາທາລະນະລັດ ກູບາ ຊຶ່ງນໍາໂດຍ ທ່ານ ນາງ ຢາມີລາ ພີນາ ໂອຈີດາ ກໍາມະການສູນກາງພັກກອມມູນິດ, ຫົວໜ້າອົງການໄອຍະການສູງສຸດ ແຫ່ງ ສ ກູບາ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ ສາທາລະນະລັດປະຊາທິປະໄຕປະຊາຊົນລາວ.

     ການຢ້ຽມຢາມ ແລະ ເຮັດວຽກຢ່າງເປັນທາງການໃນຄັ້ງນີ້ ແມ່ນເພື່ອພົບປະແລກປ່ຽນບົດຮຽນຊຶ່ງກັນ ແລະ ກັນ ແລະ ປຶກສາຫາລືກ່ຽວກັບການຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ອົງການໄອຍະການສູງສຸດ ແຫ່ງ ສ ກູບາ ໃນປີ 2019 ແລະ 2020 ພາຍໃຕ້ບົດບັນທຶກຄວມເຂົ້າໃຈທີ່ໄດ້ລົງນາມຮ່ວມກັນໃນເດືອນ ມີນາ 2018 ທີີ່ ນະຄອນຫຼວງຮາວານນາ ເປັນຕົ້ນ ການຢ້ຽມຢາມລະຫວ່າງ 2 ຄະນະຜູ້ແທນອົງການໄອຍະການສູງສຸດ ລາວ-ກູບາ ເພືີ່ອແລກປ່ຽນບົດຮຽນນໍາກັນ ໃນການພັດທະນາວຽກງານໄອຍະການ ໂດຍສະເພາະ ດ້ານການຈັດຕັ້ງ, ການບໍາລຸງສ້າງພະນັກງານໄອຍະການ ແລະ ການຮ່ວມມືທາງດ້ານກົດໝາຍ; ການເຂົ້າຮ່ວມກອງປະຊຸມວິທະຍາສາດກົດໝາຍອາຍາສາກົນ ຄັ້ງທີ 15 ໃນປີ 2020 ແລະ ກອງປະຊຸມກ່ຽວກັບນິຕິທໍາ, ກົດໝາຍ ແລະ ສັງຄົມຄັ້ງທີ 3 ແລະ ການເຂົ້າຮ່ວມໂຕະເວທີປຶກສາຫາລືການນໍາໃຊ້ເຕັກໂນໂລຊີໃໝ່ຂອງກຸ່ມໃຊ້ຄວາມຮຸນແຮງຂອງເດັກ, ການສະກັ້ນ ແລະ ການແກ້ໄຂການກໍ່ອາຊະຍາກໍາ ແລະ ບັນຫາອື່ນຈໍານວນໜຶ່ງ.

     ໃນວາລະການຢ້ຽມຢາມ ສປປ ລາວ ຂອງຄະນະຜູ້ແທນອົງການໄອຍະການສູງສຸດ ແຫ່ງ ສ.ກູບາ, ໃນຕອນບ່າຍວັນທີ 28 ພຶດສະພາ 2019 ເວລາ 14:30 ໂມງ ຢູ່ທີ່ໂຮງແຮມ ລາວພລາຊາ, ທ່ານ ຄຳສານ ສຸວົງ  ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ທ່ານ ນາງ ຢາມີລາ ພີນາ ໂອຈີດາ ກໍາມະການສູນກາງພັກກອມມູນິດ, ຫົວໜ້າອົງການໄອຍະການສູງສຸດ ແຫ່ງ ສ ກູບາ, ໄດ້ພົບປະແລກປ່ຽນບົດຮຽນຊຶ່ງກັນ ແລະ ກັນ, ຊຶ່ງທັງສອງຝ່າຍໄດ້ລາຍງານສະພາບການພົວພັນຮ່ວມມື ແລະ ການເຄື່ອນໄຫວວຽກງານຂອງອົງການໄອຍະການປະຊາຊົນໃນໄລຍະຜ່ານມາ. ຈາກນັ້ນ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ສ.ກູບາ ໄດ້ລົງນາມເຊັນບົດບັນທຶກຮ່ວມກັນ ເພື່ອເປັນບ່ອນອີງໃນການສືບຕໍ່ເສີມຂະຫຍາຍສາຍພົວພັນຮ່ວມມືລະຫວ່າງສອງອົງການໄອຍະການປະຊາຊົນ.

     ຈາກນັ້ນ ໃນຕອນເຊົ້າຂອງວັນທີ 29 ພຶດສະພາ 2019 ຢູ່ທີ່ຫ້ອງປະຊຸມ ອົງການໄອຍະການປະຊາຊົນສູງສຸດ ໄດ້ຈັດໃຫ້ມີກອງປະຊຸມສໍາມະນາກ່ຽວກັບວຽກງານໄອຍະການ ສ.ກູບາ ແລະ ວຽກງານໄອຍະການ ສປປ ລາວ. ພິເສດໃນຕອນບ່າຍຂອງວັນດຽວກັນ ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສ.ກູບາ ກໍໄດ້ເຂົ້າຢ້ຽມຢາມຂໍ່ານັບ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ.

by:ແສງພະຈັນ

12/06/2019

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ