ຄະນະຜູ້ແທນອົງການໄອຍະການປະຊາຊົນເຂດປົກຄອງຕົນເອງ ເຜົ່າຈ້ວາງກວາງຊີ ສປ ຈີນ ເດີນທາງມາຢ້ຽມຢາມ ແລະ ເຮັດວຽກຢູ່ ອົງການໄອຍະການປະຊາຊົນ ແຫ່ງ ສປປລາວ

          ໃນຕອນເຊົ້າຂອງວັນທີ 26 ມີຖຸນາ 2019, ທີ່ ຫ້ອງຮັບແຂກ ອົງການໄອຍະການປະຊາຊົນສູງສຸດ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງຄະນະຜູ້ແທນອົງການໄອຍະການປະຊາຊົນເຂດປົກຄອງຕົນເອງ ເຜົ່າຈ້ວາງກວາງຊີ ສປ ຈີນ.  ຊື່ງນໍາໂດຍ ທ່ານ     ເໝິ້ງ ຢ້າວຈຸ່ນ ຮອງຫົວໜ້າອົງການໄອຍະການປະຊາຊົນ ເຂດປົກຄອງຕົນເອງ ເຜົ່າຈ້ວາງກວາງຊີ. ໃນໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ໄດ້ສະແດງຄວາມຍ້ອງຍໍຊົມເຊີຍ ແລະ ຍີນດີຕ້ອນຮັບ  ທ່ານ ເໝິ້ງ ຢ້າວຈຸ່ນ ພ້ອມດ້ວຍຄະນະທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ກໍເພື່ອເປັນການເສີມຂະຫຍາຍສາຍພົວພັນຮ່ວມມືຮອບດ້ານ ລະຫວ່າງສອງພັກ-ລັດ ແລະ ປະຊາຊົນລາວ-ຈີນ, ຈີນ-ລາວ ໂດຍ ການແລກປ່ຽນການຢ້ຽມຢາມເຮັດວຽກທາງການ, ການຝຶກອົບຮົມ, ການສຳມະນາ ແລະ ອື່ນໆ ໃຫ້ແຕກດອກອອກຜົນຍິ່ງຂື້ນ.

       ຈາກນັ້ນ, ກໍໄດ້ມີ ກອງປະຊຸມພົບປະສອງຝ່າຍ ຕາງໜ້າໃຫ້ຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ ທ່ານ ສົມບູນ ລາດສະບົວສີ  ຫົວໜ້າກົມຈັດຕັ້ງ-ພະນັກງານອົງການໄອຍະການປະຊາຊົນສູງສຸດ ແລະ ຕາງໜ້າໃຫ້ຄະນະຜູ້ແທນ ອົງການໄອຍະການປະຊາຊົນ ເຂດປົກຄອງຕົນເອງ ເຜົ່າຈ້ວາງກວາງຊີ ສປ ຈີນ ທ່ານ ເໝິ້ງ ຢ້າວຈຸ່ນ ຮອງຫົວໜ້າອົງການໄອຍະການປະຊາຊົນ ເຂດປົກຄອງຕົນເອງ ເຜົ່າຈ້ວາງກວາງຊີ ສປ ຈີນ ມີບັນດາ ທ່ານ ຮອງກົມ, ຮອງສະຖາບັນຄົ້ນຄ້ວາ ແລະ ຝຶກອົບຮົມວຽກງານໄອຍະການ ແລະ ຫົວໜ້າພະແນກ,  ເຂົ້າຮ່ວມຈໍານວນທັງໜົດ 12 ທ່ານ.

       ການມາຢ້ຽມຢາມພົບປະ ກອງປະຊຸມປຶກສາຫາລືຄັ້ງນີ້ ທັງສອງຝ່າຍ ແມ່ນໄດ້ພົບປະແລກປ່ຽນບົດຮຽນກ່ຽວກັບການຮ່ວມມືກັນ ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນ ເຂດປົກຄອງຕົນເອງ ເຜົ່າຈ້ວາງກວາງຊີ  ແຫ່ງ ສປ ຈີນ.  ເພື່ອເປັນການຮ່ວມມື້ກັນ ແລະ ປະຕິບັດເນື້ອໃນຂອງບົດບັນທຶກຊ່ວຍຈໍາ ທີ່ຜ່ານມາ. ໂດຍສະເພາະ ການປືກສາຫາລື ການຈັດຕັ້ງປະຕິບັດບົດບັນທຶກຊ່ວຍຈໍາ ຂອງ ອົງການໄອຍະການປະຊາຊົນສູງສຸດ ທັງສອງປະເທດ ກ່ຽວກັບການຝຶກອົບຮົມໃຫ້ແກ່ພະນັກງານຫຼັກແຫຼ່ງ ຂອງ ອົງການໄອຍະການປະຊາຊົນ ສປປ ລາວ  ສົກປີ 2019 ທີ່ສະຖາບັນຝຶກອົບຮົມວຽກວຽກງານໄອຍະການແຫ່ງຊາດ ສປ ຈີນ ສາຂາ ກວາງຊີ  ໂດຍເນັ້ນໃສ່ການປຶກສາຫາລືແລກປ່ຽນຄໍາເຫັນກ່ຽວກັບວຽກງານກໍ່ສ້າງ-ບຳລຸງພະນັກງານໄອຍະການ ສປປ ລາວ ຢູ່ ສປ ຈີນ ດັ່ງນີ້: ໜື່ງ: ກ່ຽວກັບຫົວຂໍ້ໃນການຝືກອົບຮົມ ສຶບຕໍ່ກ່ຽວກັບການຈັດຊຸດຝຶກອົບຮົມຄື: ການດຳເນີນຄະດີແພ່ງ, ຄະດີອາຍາ ເຊັ່ນ: ຄະດີຢາເສບຕິດ, ການຄ້າມະນຸດ, ການຕ້ານ ແລະ ສໍ້ລາດບັງຫລວງ, ການຟອກເງີນ ແລະ ຄະດີອາຍາອື່ນໆ ການຕິດຕາມກວດກາຄ້າຍຄຸມຂັງ-ດັດສ້າງ, ການແກ້ໄຂຄະດີປົກຄອງ ແລະ ການຕິດຕາມກວດກາການປະຕິບັດຄໍາຕັດສີນຂອງສານ;  ສອງ: ກ່ຽວກັບເປົ້າໜາຍການຝຶກອົບຮົມ ແນ່ໃສ່ພະນັກງານນໍາພາ-ຄຸ້ມຄອງຂອງການໄອຍະການປະຊາຊົນຂັ້ນຕ່າງໆ ສ້າງເປັນພະນັກງານສືບທອດປ່ຽນແທນ ແລະ ມີຄວາມຮູ້ຄວາມສາມາດທາງດ້ານວິຊາການ;  ສາມ: ກ່ຽວກັບຄ່າໃຊ້ຈ່າຍຕ່າງໆ ໃນໄລຍະການຝຶກອົບຮົມຂອງນັກສຳມະນາກອນອົງການໄອຍະການປະຊາຊົນ ສປປ ລາວ ຢູ່ ສປ ຈີນ.

     ການມາພົບປະແລກບົດຮຽນການຮ່ວມມືໃນຄັ້ງນີ້ ກໍເພື່ອຍົກສູງວຽກງານໄອຍະການປະຊາຊົນ ແລະ ສາຍພົວພັນລະຫວ່າງອົງການໄອຍະການປະຊາຊົນສູງສຸດ ແລະ ອົງການໄອຍະການປະຊາຊົນ ເຂດປົກຄອງຕົນເອງ ເຜົ່າຈ້ວາງກວາງຊີ ສປ ຈີນ ໃຫ້ມີສາຍພົວພັນມິດຕະພາບ, ຄວາມສາມັກຄີ ແລະ ຮ່ວມມືຮອບດ້ານຕະຫລອດໄປ.

     ຫຼັງຈາກປິດກອງປະຊຸມພົບປະແລ້ວ ໃນວັນດຽວກັນນັ້ນ ຄະນະຜູ້ແທນອົງການໄອຍະການປະຊາຊົນເຂດປົກຄອງຕົນເອງເຜົ່າຈ້ວາງກວາງຊີ ກໍ່ໄດ້ໄປຢ້ຽມຢາມສະຖານບັນຄົ້ນຄວ້າ ແລະ ຝຶກອົບຮົມວຽກງານໄອຍະການ ໂດຍການຕ້ອນຮັບຂອງ ທ່ານ ຄໍາໄຜ່ ກຸມຄົນພັກດີ ຮອງຫົວໜ້າສະຖາບັນຄົ້ນຄວ້າ ແລະ ຝຶກອົບຮົມວຽກງານໄອຍະການ ແຫ່ງ ສປປ ລາວ.

by:SACK

27/06/2019

ປະຕິທິນ

Jul-2019
S M T W T F S
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ