ມອບ-ຮັບໂຄງການກໍ່ສ້າງຫ້ອງການໄອຍະການປະຊາຊົນເຂດ IV ນະຄອນຫຼວງວຽງຈັນ

        ໃນຕອນເຊົ້າວັນທີ 02 ກໍລະກົດ 2019 ທີ່ ຫ້ອງການອົງການໄອຍະການປະຊາຊົນ ເຂດ IV ນະຄອນຫຼວງ ໄດ້ຈັດພິທີມອບ-ຮັບໂຄງການກໍ່ສ້າງສໍານັກງານຫ້ອງການ ອົງການໄອຍະການປະຊາຊົນ ເຂດ IV (ຫຼັງໃໝ່) ທີ່ເມືອງ ຫາດຊາຍຟອງ, ນະຄອນຫຼວງວຽງຈັນ ຂື້ນຢ່າງເປັນທາງການ ໂດຍການເປັນກຽດເຂົ້າຮ່ວມ ຂອງ ທ່ານ ສົມບູນ ລາດສະບົວສີ ຫົວໜ້າກົມຈັດຕັ້ງ-ພະນັກງານ ຕາງໜ້າໃຫ້ແກ່ຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ ມີທ່ານ ຮອງເຈົ້າເມືອງ ຫາດຊາຍຟອງ, ບັນດາທ່ານຫົວໜ້າກົມ-ຮອງກົມຈາກອົງການໄອຍະການປະຊາຊົນສູງສຸດ, ຫົວໜ້າອົງການໄອຍະການນະຄອນຫຼວງ-ອົງການໄອຍະການປະຊາຊົນເຂດ, ຜູ້ຕາງໜ້າຂະແໜງການຕ່າງໆ ແລະ ບໍລິສັດ ຮັບເໜົາກໍ່ສ້າງພ້ອມດ້ວຍແຂກຖືກເຊີນເຂົ້າຮ່ວມທັງໝົດ 50 ກວ່າຄົນ.

     ໂຄງການກໍ່ສ້າງອົງການໄອຍະການປະຊາຊົນເຂດ IV ນະຄອນຫຼວງວຽງຈັນ ເປັນໂຄງການລົງທືນຂອງລັດ ຊຶ່ງແມ່ນ ອົງການໄອຍະການປະຊາຊົນສູງສຸດ ເປັນເຈົ້າຂອງໂຄງການ ໂດຍແມ່ນກົມແຜນການຮ່ວມມືກັບຕ່າງປະເທດ ເປັນຜູ້ຈັດຕັ້ງປະຕິບັດ ໂດຍມີ ບໍລິສັດ ດາວເໜືອພັດທະນາຄົບວົງຈອນຈໍາກັດຜູ້ດຽວເປັນຜູ້ຮັບເໜົາກໍ່ສ້າງຕາມສັນຍາຮັບ    ເໜົາກໍ່ສ້າງ ສະບັບເລກທີ 022/ກຜຮ ລົງວັນທີ 08/06/2018.

      ໃນພິທີດັ່ງກ່າວ ທ່ານ ພູວົງ ບຸນທະລາດ ຕາງໜ້າໂຄງການ ບໍລິສັດ ດາວເໜືອ ພັດທະນາຄົບວົງຈອນ ຈໍາກັດຜູ້ດຽວ ໄດ້ກ່າວມອບ ແລະ ລາຍງານສະພາບລວມກ່ຽວກັບການກໍ່ສ້າງໂຄງການຊຶ່ງເປັນອາຄານ 02 ຊັ້ນ ມີຂະໜາດລວງຍາວ 37 ແມັດ, ລວວງກວ້າງ 18 ແມັດ, ລວງສູງ 16 ແມັດ, ຕິດຕັ້ງພັດລົມ, ແອເຢັນ ແລະ ໂຕະ, ຕັ້ງ, ຕູ້, ໂດຍແມ່ນໃຊ້ແຫ່ງທຶນງົບປະມານຂອງລັດມູນຄ່າຂອງການກໍ່ສ້າງລວມເປັນເງິນທັງໝົດແມ່ນ 4.560.000.000 ກວ່າກີບ (ສີ່ຕື້ຫ້າຮ້ອຍຫົກສິບລ້ານກີບ). ໄດ້ເລີ່ມຕົ້ນລົງມືກໍ່ສາ້ງແຕ່ວັນທີ 02 ກໍລະກົດ 2018 ຫາ ວັນທີ 21 ມິຖຸນາ 2019 ເປັນມື້ສໍາເລັດ. ໂຄງການດັ່ງກ່າວແມ່ນໄດ້ກໍ່ສ້າງຖືກຕ້ອງຕາມການອອກແບບ, ວັດສະດຸ, ອຸປະກອນການກໍ່ສ້າງຕາມທີ່ໄດ້ກໍານົດໄວ້ໃນສັນຍາ. ໂຄງການກໍ່ສ້າງຫ້ອງການຫຼັງນີ້ເປັນໂຄງການກໍ່ສ້າງໜື່ງທີ່ມີຄວາມສໍາຄັນເພາະເປັນການພັດທະນາພື້ນຖານໂຄງລ່າງໃຫ້ແກ່ອົງການໄອຍະການປະຊາຊົນນໍາໃຊ້ເຂົ້າໃນການເຄື່ອນໄຫວປະຕິບັດພາລະບົດບາດສິດ ແລະ ໜ້າທີ່ຂອງຕົນ ໃນການຕິດຕາມກວດກາການເຄົາລົບ ແລະ ປະຕິບັດກົດໝາຍ ແລະ ການສັ່ງຟ້ອງຜູ້ຖືກຫາຂື້ນສານຕາມທີ່ກົດ    ໝາຍໄດ້ກໍານົດໄວ້.

      ໃນຕອນທ້າຍ ທ່ານ ສົມບູນ ລາດສະບົວສີ  ໄດ້ຍົກໃຫ້ເຫັນໂຄງການດັ່ງກ່າວໃນຈັດຕັ້ງປະຕິບັດໂຄງການກໍ່ສ້າງສໍານັກງານອົງການໄອຍະການປະຊາຊົນໃນຂອບເຂດທົ່ວປະເທດໃຫ້ມີບ່ອນເຮັດວຽກຖາວອນ ແລະ ພ້ອມທັງຍັງຮຽກຮ້ອງມາຍັງພະນັກງານພ້ອມກັນປົກປັກຮັກສາບູລະນະ ແລະ ນໍາໃຊ້ຫ້ອງການດັ່ງກ່າວເຂົ້າໃນການເຄື່ອນໄຫວປະຕິບັດພາລະບົດບາດ, ສິດໜ້າທີ່ຂອງຕົນໃຫ້ມີປະສິດທິພາບ, ປະສິດທິຜົນ, ໃນນາມຕາງໜ້າຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ ຂໍສະແດງຄວາມຂອບໃຈມາຍັງທຸກພາກສ່ວນທີ່ກ່ຽວຂ້ອງທີ່ໄດ້ໃຫ້ການຮ່ວມມື ແລະ ຂໍສະແດງຄວາມຊົມເຊີຍມາຍັງ ບໍລິສັດ ດາວເໜືອ ພັດທະນາຄົບວົງຈອນຈໍາກັດຜູ້ດຽວ ທີ່ໄດ້ຈັດຕັ້ງປະຕິບັດໂຄງການດັ່ງກ່າວສໍາເລັດ ແລະ ໄດ້ມອບ-ຮັບຢ່າງເປັນທາງການ.

by:SACK

09/07/2019

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ