ກອງປະຊຸມປຶກສາຫາລືກ່ຽວກັບການສ້າງກົດໝາຍວ່າດ້ວຍການປົກຄອງ

         ກອງປະຊຸມປຶກສາຫາລືກ່ຽວກັບການສ້າງກົດໝາຍວ່າດ້ວຍການປົກຄອງ ໄດ້ໄຂຂຶ້ນໃນວັນທີ 23-24 ກໍລະກົດ 2019 ທີ່ ໂຮງແຮມເມືອງແທງ, ນະຄອນຫຼວງວຽງຈັນ ໂດຍພາຍໃຕ້ການເປັນປະທານ ຮ່ວມ ທ່ານ ໄຊຊະນະ ໂຄດພູທອນ ຮອງຫົວໜ້າອົງການ ໄອຍະການປະຊາຊົນສູງສຸດ ແລະ ທ່ານ ປອ. ທອງຈັນ ມະນີໄຊ ຮອງລັດຖະມົນຕີກະຊວງພາຍໃນ ໂດຍມີຜູ້ເຂົ້າຮ່ວມທີ່ມາຈາກສຳນັກງານປະທານປະເທດ, ຫ້ອງວ່າການສູນກາງພັກ, ສະພາແຫ່ງຊາດ, ສຳນັກງານນາຍົກລັດຖະມົນຕີ, ກະຊວງປ້ອງກັນຄວາມສະຫງົບ, ກະຊວງພາຍໃນ, ກະຊວງຊັບພະຍາກອນທຳມະຊາດ ແລະ ສິ່ງ ແວດລ້ອມ, ກະຊວງຍຸຕິທຳ, ກະຊວງການຕ່າງປະເທດ, ກະຊວງການເງິນ, ກະຊວງກະສິກໍາ ແລະ ປ່າໄມ້, ກະ ຊວງໂຍທາທິການ ແລະ ຂົນສົ່ງ,  ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ກະຊວງແຜນການ ແລະ ການລົງທຶນ, ກະຊວງອຸດສະຫະກໍາ ແລະ ການຄ້າ, ສານປະຊາຊົນສູງສຸດ, ສະພາວິທະຍາສາດສັງຄົມແຫ່ງຊາດ, ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ, ອົງການໄອຍະການປະຊາຊົນສູງສຸດ ຈໍານວນ 80 ທ່ານ.  

     ສປປ ລາວ ໄດ້ພັດທະນາລະບົບກົດໝາຍ, ລະບົບສານປະຊາຊົນ ກໍຄືອົງການໄອຍະການ ປະຊາຊົນ ໃນຊຸມຕົ້ນປີ 1980 ມາຮອດປະຈຸຸບັນ ພວກເຮົາ ກໍມີກົດໝາຍ 142 ສະບັບ. ໃນການສ້າງ ລະບົບກົດໝາຍ ກໍຄື ກົງຈັກຍຸຕິທຳຂຶ້ນນັ້ນ, ມັນໄດ້ຊ່ວຍໃຫ້ການປົກຄອງລັດ, ຄຸ້ມຄອງສັງຄົມດ້ວຍກົດໝາຍ ກໍຄື ການບໍລິຫານລັດໃນຂັ້ນສູນກາງ ແລະ ທ້ອງຖິ່ນ ເປັນລະບົບລະບຽບຖືກຕ້ອງຕາມຫຼັກການທີ່ກົດໝາຍໄດ້ກໍານົດໄວ້ ເຮັດໃຫ້ສັງຄົມ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດມີການຂະຫຍາຍຕົວຕໍ່ເນື່ອງ, ເຮັດໃຫ້ແກ້ໄຂຂໍ້ຂັດ ແຍ່ງທີ່ມີໃນສັງຄົມ ລາວ ມີຄວາມຮັບປະກັນຫລາຍຂຶ້ນ ເປັນກ້າວໆ. ພ້ອມກັນນັນການແກ້ໄຂຄະດີປົກຄອງແມ່ນ​ໄດ້ມອບ​ໃຫ້ອົງການກ່ຽວຂ້ອງເປັນຜູ້ແກ້ໄຂໂດຍມີອົງການໄອຍະການປະຊາຊົນ ເປັນຜູ້ຕິດຕາມກວດກາການປະຕິບັດກົດໝາຍ ໃຫ້ມີຄວາມຖືກຕ້ອງ ແລະ ເປັນເອກະພາບ ໃນຂອບເຂດທົ່ວປະເທດ.

        ນັບແຕ່ປີ 2012 ເປັນຕົ້ນມາ ສປປ ລາວ ໄດ້ສຸມໃສ່ການຄົ້ນຄວ້າສ້າງຕັ້ງສານປົກຄອງ ຫຼື ຄະນະສານປົກຄອງ ຊຶ່ງເປັນຄະນະສານໜຶ່ງຂອງສານປະຊາຊົນ ແລະ ກໍໄດ້ຮັບການຕົກລົງເຫັນດີກ່ຽວກັບການສ້າງຕັ້ງຂອງສະພາແຫ່ງຊາດ ແລະ ກໍໄດ້ຮ່າງມະຕິຂອງສະພາແຫ່ງຊາດ ຊຶ່ງປ່ຽນມາເປັນລັດຖະບັນຍັດຂອງປະທານປະເທດ ວ່າດ້ວຍການດໍາເນີນຄະດີປົກຄອງ ແລະ ເຊື່ອໝັ້ນວ່າ ຈະໄດ້ຮັບການຮັບຮອງ ແລະ ປະກາດໃຊ້ໃນໄວໄວນີ້.

       ກອງປະຊຸມໃນຄັ້ງນີ້ໄດ້ປຶກສາຫາລື ກ່ຽວກັບການສ້າງກົດໜາຍວ່າດ້ວຍການປົກຄອງ  ບົດຮຽນຈາກຊ່ຽວຊານ, ອາຈານທີ່ໄດ້ນຳສະເໜີກ່ຽວກັບການປົກຄອງດ້ວຍກົດໜາຍ, ກົດໜາຍປົກຄອງ, ກົດໜາຍວ່າດ້ວຍຂັ້ນຕອນການປົກຄອງ, ການແກ້ໄຂຄະດີປົກຄອງ ແລະ ບົດບາດຂອງໄອຍະການ ໂດຍສະເພາະ ບົດຮຽນ ຂອງ ຮາຊະອານາຈັກໄທ, ສສ ຫວຽດນາມ ແລະ ປະເທດເຢຍລະມັນ ເຊີ່ງການປັບປຸງກົດໜາຍປົກຄອງ, ການແກ້ໄຂຄະດີປົກຄອງ ກໍຄື ເພື່ອສ້າງສານປົກຄອງ ຢູ ສປປ ລາວ  ເຊີ່ງມັນໄດ້ຕິດພັນໂດຍກົງກັບການປັບປຸງປູລະນະການປົກຄອງ ຢູ່ ສປປ ລາວ ໃຫ້ມີຄວາມເຂັ້ມແຂງ ຄວາມເປັນເອກະພາບກ່ຽວກັບຄວາມຈໍາເປັນ ແລະ ຂັ້ນຕອນໃນການສ້າງກົດໜາຍວ່າດ້ວຍການປົກຄອງ ເປັນພື້ນຖານຄວາມຮູ້ ແລະ ເປັນຂໍ້ມູນໃນການຄົ້ນ    ຄ້ວາການສ້າງກົດໜາຍວ່າດ້ວຍການປົກຄອງ ຫຼື ປະມວນກົດໜາຍປົກຄອງ ຂອງ ສປປ ລາວ  ເພື່ອນຳເອົາກົດໜາຍດັ່ງກ່າວໄປຈັດຕັ້ງປະຕິບັດເຂົ້າສູ່ວຽກງານຕົວຈິງໃນຕໍ່ໜ້າຢ່າງມີປະສິດທິຜົນ.

     ກອງປະຊຸມໄດ້ຄົ້ນຄ້ວາ ແລະ ປະກອບຄໍາເຫັນຢ່າງກວ້າງຂວາງ ໄດ້ແລກປ່ຽນບົດຮຽນໃໜ່ຫລາຍອັນຈາກຜູ້ຊ່ຽວຊານໃຫ້ມີຄວາມຮູ້ ແລະ ເຂົ້າໃຈຢ່າງຖືກຕ້ອງ ແລະ ເລີກເຊີງ ເວົ້າສະເພາະ ກໍຄື ການຍົກລະດັບຄວາມຮູ້ຂອງພະນັກງານຂອງອົງການຈັດຕັ້ງທຸກພາກສ່ວນເພື່ອນໍາເອົາໄປພັດທະນາກົດໜາຍປົກຄອງໃຫ້ເປັນລະບົບຄົບຊຸດ ແລະ ມີປະສິດທິພາບໃນຕໍ່ໜ້າ.

by:SACK

25/07/2019

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ