ກອງປະຊຸມອົງການໄອຍະການປະຊາຊົນບັນດາແຂວງທີ່ມີຊາຍແດນຕິດຈອດກັນ ລາວ-ຫວຽດນາມ ຄັ້ງທີ VI

       ກອງປະຊຸມອົງການໄອຍະການປະຊາຊົນບັນດາແຂວງທີ່ມີຊາຍແດນຕິດຈອດກັນ ລາວ-ຫວຽດນາມ ຄັ້ງທີ VI ໄດ້ ໄຂຂຶ້ນໃນວັນທີ 14 ສິງຫາ 2019 ທີ່ນະຄອນປາກເຊ, ແຂວງ ຈຳປາສັກ, ສາທາລະນະລັດ ປະຊາທິປະໄຕ ປະຊາຊົນ ລາວ ພາຍໃຕ້ຫົວຂໍ້ “ເພີ່ມທະວີການຮ່ວມມືໃນການປະຕິບັດບັນດາການຮ້ອງຂໍການຊ່ວຍເຫຼືອເຊິ່ງກັນ ແລະ ກັນທາງດ້ານຍຸຕິທຳ ໃນບັນຫາອາຍາ ເພື່ອຕ້ານອາຊະຍາກຳຂ້າມຊາດຢ່າງມີປະສິດທິຜົນ

        ກອງປະຊຸມໄດ້ດໍາເນີນໂດຍພາຍໃຕ້ການເປັນປະທານຮ່ວມຂອງ ສະຫາຍ ຄຳສານ ສຸວົງ ກຳມະການສູນກາງພັກປະຊາຊົນປະຕິວັດລາວ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ສະຫາຍ ເລມິງ ຈີ ກໍາມະການສູນກາງພັກຄອມມູນິດຫວຽດນາມ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ , ມີ ສະຫາຍ  ປອ. ບຸນຖອງ ດີວິໄຊ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈໍາປາສັກ, ​ມີບັນດາ ສະຫາຍ ​ຄະ​ນະ​ຜູ້​ແທນ ອົງການໄອຍະການປະຊາຊົນ ແຫ່ງ ສປປ ລາວ ຊຶ່ງ​ປະ​ກອບ​ດ້ວຍ​ຄະ​ນະ ​ທີ່​ ມາ​ຈາກ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ, ອົງການໄອຍະການປະຊາຊົນພາກເໜືອ, ​ພາກກາງ ແລະ ພາກໃຕ້, ອົງການໄອຍະການປະຊາຊົນ 10  ແຂວງ ທີ່ມີຊາຍແດນຕິດຈອດກັນ ກັບ ສສ ຫວຽດນາມ, ອົງການໄອຍະການປະຊາຊົນຊົນນະຄອນຫຼວງວຽງຈັນ, ອົງການ ໄອຍະການປະຊາຊົນ ແຂວງ ຈຳປາສັກ, ອົງການໄອຍະການທະຫານຂັ້ນສູງ, ອົງການໄອຍະການທະຫານພາກເໜືອ, ​ພາກກາງ ແລະ ພາກໃຕ້, ແລະ ຄະນະຜູ້ແທນອົງການໄອຍະການປະຊາຊົນ ແຫ່ງ ສສ ຫວຽດນາມ ຊຶ່ງ​ປະ​ກອບ​ດ້ວຍ​ຄະ​ນະທີ່​ມາ​ຈາກອົງການໄອຍະການປະຊາຊົນສູງສຸດ, ອົງການໄອຍະການປະຊາຊົນ 10 ແຂວງທີ່ມີຊາຍແດນຕິດຈອດ ກັນ ກັບ ສປປ ລາວ,  ອົງການໄອຍະການປະຊາຊົນ ນະຄອນຮ່າໂນ້ຍ, ໂຮຈີມິງ,​ ດານັງ, ອົງການໄອຍະການທະຫານຂັ້ນສູງ, ອົງການໄອຍະການທະຫານກອງ ພົນທີ 2, ກອງພົນທີ 4, ກອງພົນທີ 5 ແລະ ທະຫານຊາຍແດນ ຈຳ​ນວນ 67 ສະ​ຫາຍເຂົ້າ​ຮ່ວມ.

        ກອງປະຊຸມໄດ້ສະຫຼຸບຕີລາຄາຜົນຂອງການຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມອົງການໄອຍະການປະຊາຊົນບັນດາ ແຂວງ ທີ່ມີຊາຍແດນຕິດຈອດກັນ ຄັ້ງທີ V ໃນວັນທີ 18 ກໍລະກົດ 2017 ທີ່ນະຄອນ ໂຮຍອານ,​ ແຂວງກວາງນາມ, ສາທາລະນະລັດ ສັງຄົມນິຍົມຫວຽດນາມ ໂດຍ ຊີ້ໃຫ້ເຫັນຜົນສໍາເລັດ, ຄວາມຫຍຸ້ງຍາກ, ສາເຫດ, ບົດຮຽນທີ່ຖອດຖອນໄດ້ ໃນການປະຕິບັດຄໍາຮ້ອງຂໍການຮ່ວມມືທາງດ້ານຍຸຕິທຳໃນບັນຫາອາຍາທີ່ຜ່ານມາ ກໍ​ຄື ການ​ຮ່ວມ​ມືກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດຄຳ​ຮ້ອງ​ຂໍການ​ຊ່ວຍ​ເຫຼືອ​ຊຶ່ງ​ກັນ ແລະ ກັນ ​ທາງ​ດ້ານ​ຍຸ​ຕິ​ທຳ​ໃນ​ບັນ​ຫາ​ອາ​ຍາ ເພື່ອ​ຕ້ານ​ອາ​ຊະ​ຍາ​ກຳ​ຂ້າມ​ຊາດ​ ໂດຍ​ສະ​ເພາະ ອາ​ຊະ​ຍາ​ກຳ​ຢາ​ເສບ​ຕິດ ຢ່າງ​ມີ​ປະ​ສິດ​ທິ​ຜົນ ລະຫວ່າງ ອົງການໄອຍະການປະຊາຊົນຂອງສອງປະເທດ.

      ກອງ​ປະຊຸມ​ ​ໄດ້​ດຳ​ເນີນ ພາຍ​ໃຕ້​ບັນຍາກາດທີ່ເຕັມໄປດ້ວຍຄວາມສະໜິດ​ສະ​ໜົມ​ຖານສະຫາຍ​ອ້າຍ-ນ້ອງ, ຄົ້ນ ຄວ້າ, ປຶກສາຫາລື ຢ່າງກົງໄປກົງມາ, ດ້ວຍເນື້ອໃນສຳຄັນ ​ແລະ ​ໄດ້​ປະສົບ​ຜົນສຳ​ເລັດຢ່າງ​ຈົບງາມ ໂດຍໄດ້ລົງ​ນາມ​ໃນ​ບົດ​ບັນ​ທຶກກອງ​ປະ​ຊຸມ ຊຶ່ງ​ເຫັນ​ວ່າ ຫົວຂໍ້ ແລະ ເນື້ອໃນກອງປະຊຸມ ແມ່ນ ສອດຄ່ອງກັບຄວາມຮຽກຮ້ອງ ຕ້ອງການໃນການ ຮ່ວມມື ລະຫວ່າງ ສອງຝ່າຍໃນສະພາບການປັດຈຸບັນ ກໍຄື ສະເພາະໜ້າ-ຍາວນານ ໃນການຕ້ານອາຊະຍາກຳຂ້າມຊາດ; ຕີລາຄາສູງຜົນສໍາເລັດຂອງການຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມອົງການໄອຍະການປະຊາຊົນບັນດາແຂວງທີ່ມີຊາຍແດນຕິດຈອດກັນ ຄັ້ງທີ V ໃນວັນທີ 18 ກໍລະກົດ 2017 ທີ່ນະຄອນ ໂຮຍອານ,​ ແຂວງກວາງນາມ, ສສ ຫວຽດ ນາມ;  ເຫັນໄດ້ຄວາມສຳຄັນຂອງກອງປະຊຸມອົງການໄອຍະການປະຊາຊົນບັນດາແຂວງທີ່ມີຊາຍແດນຕິດຈອດກັນ ລາວ-ຫວຽດ ນາມ; ສືບຕໍ່ຮ່ວມມືກັນຂອງສອງອົງການໄອຍະການປະຊາຊົນຂອງສອງປະເທດໃນຂັ້ນສູນກາງ ແລະ ທ້ອງຖິ່ນໃນດ້ານຕ່າງໆ;   ເພີ່ມທະວີການປະສານສົມທົບໃນການຕ້ານ ແລະ ສະກັດກັ້ນອາຊະຍາກໍາຂ້າມຊາດ ໂດຍຜ່ານກົນໄກການຮ່ວມມື ເຊິ່ງກັນ ແລະ ກັນ ທາງດ້ານຍຸຕິທຳໃນບັນຫາອາຍາ;  ເອົາໃຈໃສ່ເພີ່ມທະວີໃນການຈັດຕັ້ງປະຕິບັດຄໍາແນະນໍາກ່ຽວ​ກັບ​ການ​ຮ່ວມ​ມື​ທາງ​ດ້ານ​ຍຸ​ຕິ​ທຳ​ໃນ​ບັນ​ຫາ​ອາ​ຍາຂອງຫົວໜ້າອົງການໄອຍະການປະຊາຊົນສູງສຸດ ແຫ່ງ ​ປ​ປ ລາວ ກໍ​ຄື ຂອງ ສສ ຫວຽດນາມ;  ສືບຕໍ່ປະສານສົມທົບຈັດຕັ້ງປະຕິບັດສົນທິສັນຍາວ່າດ້ວຍການຮ່ວມມືທາງດ້ານຍຸຕິທຳກ່ຽວກັບ ບັນຫາທາງ ແພ່ງ ແລະ ທາງອາຍາປີ 1998 ດ້ວຍຄວາມຮັບຜິດຊອບ; ສ້າງສົນທິສັນຍາວ່າດ້ວຍການຊ່ວຍເຫຼືອເຊິ່ງກັນ ແລະ ກັນທາງ ດ້ານກົດໝາຍໃນບັນຫາອາຍາສະບັບໃໝ່ ລະຫວ່າງ ສອງປະເທດໃຫ້ສໍາເລັດ.

    ກອງ​ປະ​ຊຸມ​ດັ່ງ​ກ່າວ ໄດ້​ອັດ​ລົງ​ໃນ​ຕອນບ່າຍ​ຂອງວັນ​ດຽວ​ກັນ ດ້ວຍ​ຜົນ​ສຳ​ເລັດ​ອັນ​ຈົບ​ງາມ ຊຶ່ງໄດ້​ປະ​ກອບ​ສ່ວນ​ສຳ​ຄັນ​ເຂົ້າ​ໃນເພີ່ມ​ພູນ​ຄູນ​ສ້າງ ແລະ ເສີມ​ຂະ​ຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດ​ນາມ, ຫວຽດ​ນາມ-ລາວ ເວົ້າ​ລວມ, ການພົວພັນ ແລະ ຮ່ວມມື ລະຫວ່າງ ອົງການໄອຍະການປະຊາຊົນ ແຫ່ງ ສປປ ລາວ ແລະ ອົງການໄອຍະການປະຊາ ຊົນ ແຫ່ງ ສສ ຫວຽດນາມ ເວົ້າ​ສະ​ເພາະ ໃຫ້ໄດ້ຮັບການພັດທະນາສູ່ລວງເລິກ ​ແລະ ເກີດດອກ​ອອກ​ຜົນ​ຍິ່ງຂຶ້້ນຢ່າງບໍ່ຢຸດ ຢັ້ງ.

 

by:SACK

14/08/2019

ປະຕິທິນ

Aug-2019
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ