ຄະນະຜູ້ແທນ ສສ ຫວຽດນາມ ເດີນທາງມາເຈລະຈາ ຮ່າງສົນທິສັນຍາ ວ່າດ້ວຍການຊ່ວຍເຫຼືອເຊິ່ງກັນ ແລະ ກັນ ທາງດ້ານກົດໝາຍໃນບັນຫາອາຍາ ລາວ-ຫວຽດນາມ ຢູ່ ສປປ ລາວ

    ໂດຍຕອບສະໜອງຕາມການເຊື້ອເຊີນຂອງອົງການໄອຍະການປະຊາຊົນສູງສຸດ ແຫ່ງ ສປປ ລາວ ໃນລະ ຫວ່າງ ວັນທີ 24 ຫາ 27 ກັນຍາ 2019 ນີ້ ທີ່ນະຄອນຫຼວງພະບາງ, ແຂວງຫຼວງພະບາງ ໄດ້ເປີດກອງປະຊຸມເຈລະຈາ ຮ່າງສົນທິສັນຍາ ຊ່ວຍ ເຫຼືອເຊິ່ງກັນ ແລະ ກັນ ທາງດ້ານກົດໝາຍໃນບັນຫາອາຍາ ລະຫວ່າງ ສປປ ລາວ-ສສ ຫວຽດນາມ ໃຫ້ກຽດຕາງໜ້າຄະນະຜູ້ ແທນ ແຫ່ງ ສປປ ລາວ ໂດຍ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ ປະ​ກອບ​​ດ້ວຍ​ບັນ​ດາ​ຜູ້​ຕາງ​ໜ້າທີ່​ມາ​ຈາກ​ ອົງການໄອຍະການປະຊາຊົນສູງສຸດ, ກະ​ຊວງ​ການ​ຕ່າງ​ປະ​ເທດ, ກະ​ຊວ​ງ​ຍຸ​ຕິ​ທຳ, ສານ​ປະ​ຊາ​​ຊົນ​ສູງ​ສຸດ ແລະ ກະຊວງປ້ອງກັນຄວາມສະຫງົບເຂົ້າຮ່ວມ. ຄະນະຜູ້ແທນ ສສ ຫວຽດນາມ ຊຶ່ງນຳໂດຍ ທ່ານ ເຈີ້ນກົງ ຟານ ຮອງຫົວໜ້າ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ພ້ອມດ້ວຍຄະນະ ມີຜູ້ເຂົ້າຮ່ວມທັງໝົດ 20 ທ່ານ.

    ການເຈລະຈາໃນຄັ້ງນີ້ ແມ່ນການ​ເຈ​ລະ​ຈາ​ຮອບ​ທຳ​ອິດ ໂດຍໄດ້ພ້ອມ​ກັນ​ແລກປ່ຽນຄຳຄິດຄຳເຫັນ ໃ​ສ່​ເນື້ອ​ໃນແຕ່ລະ ມາດຕາ ​ຂອງຮ່າງສົນທິສັນຍາວ່າດ້ວຍການຊ່ວຍເຫຼືອເຊິ່ງກັນ ແລະ ກັນ ທາງດ້ານກົດໝາຍ​ໃນບັນຫາ ອາຍາ ລາວ-ຫວຽດ ນາມ ແລະ  ມີ​ຄວາມ​ເປັນ​ເອ​ກະ​ພາບ​ເປັນ​ສ່ວນ​ຫຼາຍ ຊຶ່ງ​ເນື້ອ​ໃນ​ສົນ​ທິ​ສັນ​ຍາ​ທີ່​ຍັງ​ເຫຼືອ ຈະ​ໄດ້​ສຸມ​ໃສ່​ເຈ​ລະ​ຈາ​ໃນ​ສຳ​ເລັດ​ໃນ​ທ້າຍ​ປີ​ນີ້ ເພື່ອ​ເປັນ​ພື້ນ​ຖານ​ໃຫ້​ແກ່​ການ​ລົງ​ນາມ ໃນ​ປີ​ໜ້າ ແລະ ຈັດ​ຕັ້ງ​ປະ​ຕິ​ບັດ​ເຂົ້າ​ສູ່​ຊີ​ວິດ​ຕົວ​ຈິງ​ ຢ່າງ​ມີ​ປະ​ສິດ​ທິ​ຜົນ.

    ສົນ​ທິ​ສັນ​ຍາ​ດັ່ງ​ກ່າວ ຈະເປັນພື້ນຖານສໍາຄັນໃຫ້ແກ່ການຮ້ອງ​ຂໍ ແລະ ການພິຈາລະນາ ການຊ່ວຍເຫຼືອເຊິ່ງກັນ ແລະ ກັນ ທາງດ້ານກົດໝາຍ​ໃນບັນຫາ ອາຍາ, ຮັບ​ປະ​ກັນ​ໃຫ້ການ​ປະ​ກອບ​ຫຼັກ​ຖານ ກໍ​ຄື​ ການ​ດຳ​ເນີນ​ຄະ​ດີ​ອາ​ຍາ​ ຄົບ​ຖ້ວນ, ຮອບ​ດ້ານ, ພາ​ວະ​ວິ​ໄສ, ຕ້ານອາຊະຍາກໍາຂ້າມຊາດ, ຈຳກັດ, ສະກັດກັ້ນການກະທຳຜິດ, ປົກປ້ອງຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ມີ ຄວາມເປັນລະ ບຽບຮຽບຮ້ອຍ, ສ້າງເງື່ອນໄຂໃຫ້ປະຊາຊົນ ຂອງ​ສອງ​ປະ​ເທດ ລາວ ແລະ ຫວຽດນາມ ປະກອບສ່ວນເຂົ້າໃນການປົກປັກ ຮັກສາ ແລະ ພັດທະນາປະເທດຊາດຂອງ​ຕົນ ກ້າວຂຶ້ນຢ່າງບໍ່ຢຸດຢັ້ງ.

    ໃນໂອກາດທີ່ຄະນະຜູ້ແທນ ສສ ຫວຽດນາມ ມາເຮັດວຽກໃນຄັ້ງນີ້ ຄະນະຜູ້ແທນດັ່ງ​ກ່າວ ຍັງໄດ້ເຂົ້່າຢ້ຽມຂໍ່ານັບ ທ່ານ ຄຳສານ ສຸວົງ ຫົວໜ້າ ອົງການໄອຍະການປະຊາຊົນສູງສຸດ, ທ່ານ ຄຳຂັນ ຈັນທະວີ ເລຂາຄະນະບໍ​​ລິຫານ​ງານພັກແຂວງ, ເຈົ້າແຂວງຫຼວງພະບາງ, ທ່ຽວຊົມສະຖານທີ່ທ່ອງທ່ຽວທາງດ້ານປະຫວັດສາດ-ທຳມະຊາດຈຳນວນໜຶ່ງ ຢູ່ແຂວງຫຼວງພະບາງ ແລະ ໄດ້​ເດີນ​ທາງ​ກັບ​ຄືນ​ປະ​ເທດ ໃນເວລາ 19:10 ຂອງວັນທີ 27 ດ້ວຍ​ຄວາມ​ສະຫວັດ​ດີ​ພາບ.

by:ແສງພະຈັນ

03/10/2019

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ