ອົງການໄອຍະການປະຊາຊົນສູງສຸດ ເຜີຍແຜ່ປື້ມຄູ່ມືການສົ່ງຜູ້ຮ້າຍຂ້າມແດນ

       ບັນຫາອາຊະຍາກຳຂ້າມຊາດ ຍັງ​ສືບຕໍ່​ເປັນ​ໄພ​ຂົ່ມຂູ່​ຢ່າງ​ຮ້າຍ​ແຮງ​ຕໍ່​ຄວາມ​ສະຫງົບ​ຂອງຊາດ, ທັງ​​ເປັ​ນບັນຫາ​ທີ່​ເຊື່ອມ​​ໂຍງ​ກັບປະ​ເທດ​ເພື່ອ​ນມິດ ປະ​ເທດ​ໃກ້​ຄຽງ ​ໃ​ນພາກພື້ນ ແລະ ​ໃນ​ໂລກ. ສະນັ້ນ ການ​ແກ້​ໄຂ​ບັນຫາອາຊະຍາກຳຂ້າມຊາດ ຈຶ່ງ​ຮຽກຮ້ອງ​ໃຫ້​ມີ​ການປະສານ​ສົມທົບ​ຮ່ວມ​ໄມ້​ຮ່ວມ​ມື​ກັ​ນ ລະຫວ່າງ​ຊາດ ​ຖ້າ​ຫາກບັນດາ​ປະ​ເທດ​ ບໍ່​ໃຫ້ກາ​ນຮ່ວມ​ມື ແລະ ຊ່ວຍ​ເຫຼືອ​ກັ​ນຢ່າງ​ໃກ້ຊິດ ຜົນສຳ​ເລັດ ​ໃ​ນການ​ແກ້​ໄຂ​ບັນຫາ​ດັ່ງກ່າວ ກໍບໍ່​ອາດ​ເກີດຂຶ້​ນໄດ້.

     ໂດຍເຫັນໄດ້ຄວາມສໍາຄັນຂອງວຽກງານຕ້ານອາຊະຍາກໍາຂ້າມຊາດ ແລະ ເພືື່ອເປັນການຈັດຕັ້ງປະຕິບັດສົນທິສັນຍາ ແລະ ກົດໝາຍວ່າດ້ວຍການສົ່ງຜູ້ຮ້າຍຂ້າມແດນ ຄະນະນໍາອົງການໄອຍະການປະຊາຊົນສູງສຸດ, ກະຊວງປ້ອງກັນຄວາມສະ ຫງົບ, ສານປະຊາຊົນສູງສຸດ, ກະຊວງການຕ່າງປະເທດ ແລະ ມະຫາວິທະຍາໄລແຫ່ງຊາດ ຈຶ່ງໄດ້ຕົກລົງແຕ່ງຕັ້ງຄະນະຄົ້ນຄວ້າ ຂຽນປື້ມ ຄູ່ມືການສົ່ງຜູ້ຮ້າຍຂ້າມແດນຂຶ້ນ ໂດຍໄດ້ເລີ່ມຈັດຕັ້ງປະຕິບັດຕົວຈິງ ມາແຕ່ເດືອນກຸມພາ 2017 ເປັນຕົ້ນມາ ຊຶ່ງມາຮອດທ້າຍ ປີ 2018 ໄດ້ສໍາເລັດບໍລິບູນ.

    ເພື່ອສືບຕໍ່ປະຕິບັດຕາມແຜນການເຄື່ອນໄຫວທີ່ວາງໄວ້ ຄະນະນໍາອົງການໄອຍະການປະຊາຊົນສູງສຸດໃນຖານະເປັນ ອົງ ການໃຈກາງປະສານງານວຽກງານສົ່ງຜູ້ຮ້າຍຂ້າມແດນ ຈຶ່ງຕົກລົງຈັດກອງປະຊຸມເຜີຍແຜ່ປື້ມຄູ່ມືການສົ່ງຜູ້ຮ້າຍຂ້າມແດນຂຶ້ນ ໃນວັນທີ 21 ພະ​ຈິກ 2019 ທີ່ໂຮງ​ແຮມ​ລັດ​ສະ​ໝີ, ນະ​ຄອນ​ຫຼວງວຽງ​ຈັນ ໂດຍພາຍໃຕ້ການເປັນປະທານຮ່ວມຂອງ ທ່ານ ບຸນ​ຍັງ ຈັນ​ດາ​ລະ​ສານ  ຮອງຫົວໜ້າອົງການໄອຍະການປະຊາຊົນສູງສຸດ ແລະ ທ່ານ ສົມ​ຫວັງ ທຳ​ມະ​ສິດ ຮອງ​ລັດ​ຖະ​ມົນ​ຕີ​ກະ​ຊວງ​ປ້ອງ​ກັນ​ຄວາມ​ສະ​ຫງົບ ຊື່ງມີພະນັກງານຂັ້ນການນໍາ, ຂັ້ນຂະແໜງ ແລະ ພະນັກງານວິຊາການທີ່ມາຈາກອົງການໄອຍະການປະ ຊາຊົນ ແລະ  ອົງການສືບສວນ-ສອບສວນ ທີ່​ມາ​ຈາກກະ​ຊວງ​ປ້ອງ​ກັນ​ຄວາມ​ສະ​ຫງົບ, ກອງ​ບັນ​ຊາ​ການປ້ອງ​ກັນ​ຄວາມ​ສະ​ຫງົບ ນະ​ຄອນ​ຫຼວງວຽງ​ຈັນ, ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ, ອົງ​ການ​ໄອ​ຍະ​ການ​ປະ​ຊາ​ຊົນ​ພາກ​ກາງ, ອົງ​ການ​ໄອ​ຍະ​ການ​ປະ​ຊາ​ຊົນ​ ນະ​ຄອນ​ຫຼວງວຽງ​ຈັນ, ອົງ​ການ​ໄອ​ຍະ​ການ​ປະ​ຊາ​ຊົນ​ ເຂດ ໃນນະ​ຄອນ​ຫຼວງວຽງ​ຈັນ ເຂົ້າຮ່ວມ ຢ່າງພ້ອມພຽງ.

    ປື້ມດັ່ງກ່າວ ມີສາມພາກ, ແບບພິມ ແລະ ກໍລະນີສຶກສາຈໍານວນໜຶ່ງ ຊຶ່ງຈະເປັນພື້ນຖານສໍາຄັນໃຫ້ແກ່ການພິຈາລະ ນາການສົ່ງຜູ້ຮ້າຍຂ້າມແດນ, ນຳເອົາອາຊະຍາກອນທີ່ເອົາຕົວຫຼົບໜີໄປຕ່າງປະເທດ ມາດຳເນີນຄະດີຕາມຂະບວນຍຸຕິທຳ, ຕ້ານ ອາຊະຍາກໍາຂ້າມຊາດ, ຈຳກັດ, ສະກັດກັ້ນການກະທຳຜິດ, ປົກປ້ອງຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດ ອັນຊອບທຳຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ສ້າງເງື່ອນໄຂໃຫ້ປະ ຊາຊົນລາວບັນດາເຜົ່າ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ ກ້າວຂຶ້ນ ຢ່າງບໍ່ຢຸດຢັ້ງ.

by:SACK

21/11/2019

ປະຕິທິນ

Dec-2019
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ