ຄະນະຜູ້ແທນມະຫາວິທະຍາໄລ ກວາງຊີ ສປ ຈີນ ຢ້ຽມຢາມ ແລະ ເຮັດວຽກ ຢູ່ ສປປ ລາວ

           ໃນ​ລະ​ຫວ່າງ​ວັນ​ທີ 4-7 ທັນ​ວາ 2019 ນີ້; ຄະ​ນະ​ຜູ້​ແທນ​ມະ​ຫາ​ວິ​ທະ​ຍາ​ໄລ ​ກວາງ​ຊີ ສ​ປ ຈີນ; ຊຶ່ງ​ນຳ​ໂດຍ ທ່ານ ຈ້າວ ເຢ້ຢຸຍ ອະ​ທິ​ການ​ບໍ​ດີ ມະ​ຫາ​ວິ​ທະ​ຍະ​ໄລ ກວາງ​ຊີ ສ​ປ ຈີນ; ພ້ອມ​ດ້ວຍ​ຄະ​ນະ ໄດ້​ເດີນ​ທາງ​ມາ​ຢ້ຽມ​ຢາມ ແລະ ເຮັດ​ວຽກ ຢູ່ ສ​ປ​ປ ລາວ ຢ່າງ​ເປັນ​ທາງ​ການ. ໂດຍ​ການຕອບ​ສະ​ໜອງ​ຕາມ​ຄຳ​ເຊີນ​ຂອງ​ ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ປ​ປ ລາວ; ສະ​ບັບ​ ເລກ​ທີ 57/ກ​ຜ​ຮ, ວັນ​ທີ 26/08/2019 ແລະ ເລກ​ທີ 61/ກ​ຜ​ຮ, ວັນ​ທີ 04/09/2019.

            ໃນ​ໂອ​ກາດ​ທີ່ມາ​ຢ້ຽມ​ຢາມ ແລະ ເຮັດ​ວຽກ ຢູ່ ສ​ປ​ປ ລາວ ຄະ​ນະ​ຜູ້​ແທນ ກໍໄດ້​ເຂົ້າ​ຢ້ຽມເຂົ້າ​ຂໍ່​າ​ນັບ​ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ ​ຊຶ່ງໃນໂອກາດດັ່ງກ່າວ ທ່ານ ​ຮອງ​ຫົວ​ໜ້າ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸ​ດ ໄດ້ສະແດງຄວາມຍິນດີ​ໃຫ້​ການຕ້ອນຮັບ​ຢ່າງ​ຄວາມ​ອົບ​ອຸ່ນ ແລະ ຕີລາຄາສູງຕໍ່ກັບການມາຢ້ຽມຢາມ ​ແລະ ເຮັດ​ວຽກ​ຂອງ​ຄະ​ນະ​ຜູ້​ແທນ​ມະ​ຫາ​ວິ​ທະ​ຍາ​ໄລ​ກວາງ​ຊີ ສ​ປ​ຈີນ ຮ່ວມ​ກັບ ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສປປ ລາວ​ໃນ​ຄັ້ງ​ນີ້;

          ພາຍ​ຫຼັງ​ຢ້ຽມ​ຂ່ຳ​ນັບແລ້ວ​ກໍ່​ໄດ້​ມີ​ກອງ​ປະ​ຊຸມ​ພົບ​ປະສອງ​ຝ່າຍ ​ຄະ​ນະ​ຜູ້​ແທນ ອົງການໄອຍະການປະຊາຊົນສູງສຸດ ແຫ່ງ ສ​ປ​ປ ລາວ ຊຶ່ງ​ນໍ​າ​ໂດຍ ທ່ານ ສົມບູນ ລາດສະບົວສີ ຫົວໜ້າກົມຈັດຕັ້ງ-ພະນັກງານ ແລະ ຄະ​ນະ​ຜູ້​ແທນ​ມະ​ຫາ​ວິ​ທະ​ຍາ​ໄລ​ກວາງ​ຊີ ສ​ປ ຂຶ້ນ ຊຶ່ງ​ນຳ​ ທ່ານ ຈ້າວ ເຢ້ຢຸຍ ອະ​ທິ​ການ​ບໍ​ດີມະ​ຫາ​ວິ​ທະ​ຍະ​ໄລກວາງ​ຊີ ສປ ຈີນ ຊຶ່ງກອງ​ປະ​ຊຸມ​ດັ່ງ​ກ່າວໄດ້​ທົບ​ທວນຄືນການຈັດ​ຕັ້ງ​ປະ​ຕິ​ບັດບົດ​ບັນ​ທຶກ​ຄວາມ​ເຂົ້າ​ໃຈ​ ລະ​ຫວ່າງ ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ປ​ປ ລາວ ແລະ ມະ​ຫາ​ວິ​ທະ​ຍາ​ໄລກວາງ​ຊີ ສ​ປ ຈີນ ​ທີ່​ໄດ້​ລົງ​ນາມ​ກັນ ໃນ​ຄັ້ງ​ວັນ​ທີ 15 ພຶດ​ສະ​ພາ 2017 ທີ່​ ນະ​ຄອນ​ໜານ​ໜິງ ສ​ປ​ ຈີນ ແລະ ​ຍັງໄດ້ລົງ​ນາມ​ບົດ​ບັນ​ທຶກ​ຄວາມ​ເຂົ້າ​ໃຈສະ​ບັບ​ໃໝ່ ພ້ອມ​ທັງຮັບ​ຮອງ​ເອົາ​ແຜນ​ການ​ຮ່ວມ​ມື​ກໍ່​ສ້າງ​ພະ​ນັກ​ງານ​ໄອ​ຍະ​ການ​ປະ​ຊາ​ຊົນ ແຫ່ງ ສ​ປ​ປ ລາວ ຢູ່ ສ​ປ ຈີນ ​ສຳ​ລັບປີ 2019-2020 ຕື່ມ​ອີກ. ພ້ອມກັນນັ້ນ ຄະນະຜູ້ແທນມະຫາວິທະຍະໄລກວາງຊີ ສປ ຈີນ ຍັງໄດ້ໄປເຮັດວຽກກັບມະຫາວິທະຍາໄລແຫ່ງຊາດ ສ​ປ​ປ ລາວ ເພື່ອເພີ່ມທະວີການພົວພັນຮ່ວມມື​ທາງ​ດ້ານ​ການການກໍ່ສ້າງຊັບພະຍາກອນມະນຸດ ແລະ ທ່ຽວຊົມສະຖານທີ່ທ່ອງທ່ຽວທາງ​ດ້ານ​ວັດ​ທະ​ນະ​ທຳຈຳນວນໜຶ່ງ ທີ່ ນະຄອນຫຼວງວຽງຈັນ ສປປ ລາວ.

  

             ການ​ເດີນ​ທາງ​ມາ​ຢ້ຽມ​ຍາມ ແລະ ເຮັດ​ວຽກ​ຂອງ​ຄະ​ນະ​ຜູ້​ແທນ​ ມະ​ຫາ​ວິ​ທະ​ຍາ​ໄລກວາງ​​ຊີ ສ​ປ ຈີນ ໃນ​ຄັ້ງ​ນີ້ ໄດ້ປະກອບສ່ວນອັນສຳຄັນເຂົ້າໃນການເສີມສ້າງ​ການຂະຫຍາຍສາຍພົວພັນມິດຕະພາບອັນດີ​ງາມ ກໍ່​ຄື​ ການ​ຮ່ວມ​ມື້​ຢ່າງຮອບ​ດ້ານ ລະຫວ່າງ ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ລາວ - ຈີນ ເວົ້າ​ລວມ ການ​ພົວ​ພັນ​ຮ່ວມ​ມື ລະ​ຫວ່າງ ອົງການໄອຍະການປະຊາຊົນສູງ​ສຸດ ສປປ ລາວ ແລະ ມະຫາວິທະຍາໄລກວາງຊີ ​ສປ ຈີນ ເວົ້າ​ສະ​ເພາະ, ໃຫ້ໄດ້ຮັບການພັດທະນາສູ່ລວງເລິກ ​ແລະ ເກີດດອກ​ອອກ​ຜົນ​ຍິ່ງຂຶ້້ນຢ່າງບໍ່ຢຸດຢັ້ງ.

ໂດຍ: ຈະ​ເລີນ​ສິນ ສີ​ພັນ​ດອນ

by:ຈະເລີນສິນ

09/12/2019

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ