ມະຫາວິທະຍາໄລສ້າງຄູກວາງຊີ, ສປ ຈີນ ຢ້ຽມຢາມ ແລະ ເຮັດວຽກ ຢູ່ ສປປ ລາວ

       ໂດຍ​ຕອບ​ສະ​ໜອງ​ຕາມ​ຄຳ​ເຊີນ​ຂອງ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ປ​ປ ລາວ ໃນ​ລະ​ຫວ່າງ​ວັນ​ທີ 16-18 ທັນ​ວາ 2019 ນີ້ ຄະ​ນະ​ຜູ້​ແທນ​ມະຫາວິທະຍາໄລສ້າງຄູກວາງຊີ ສປ ຈີນຊຶ່ງ​ນຳ​ໂດຍ ທ່ານ ເຕິ້ງ ຈຸນ ເລຂາຄະນະບໍລິຫານງານພັກ ອະທິບໍດີ ມະຫາວິທະຍາໄລສ້າງຄູ ກວາງຊີ, ສ​ປ ຈີນ ພ້ອມ​ດ້ວຍ​ຄະ​ນະ ໄດ້​ເດີນ​ທາງ​ມາ​ຢ້ຽມ​ຢາມ ແລະ ເຮັດ​ວຽກ ຢູ່ ສ​ປ​ປ ລາວ ຢ່າງ​ເປັນ​ທາງ​ການ.

     ໃນ​ວາ​ລະ​ຢູ່​ຢ້ຽມ​ຢາມ ແລະ ເຮັດ​ວຽກ ຢູ່ ສ​ປ​ປ ລາວ ຄະ​ນະ​ຜູ້​ແທນ ໄດ້​ເຂົ້າ​ຢ້ຽມ​ຄຳ​ນັບ​ ທ່ານ ໄຊ​ຊະ​ນະ ໂຄດ​ພູ​ທອນ ຮອງຫົວໜ້າອົງການໄອຍະການປະຊາຊົນສູງສຸດ ​ຊຶ່ງໃນໂອກາດດັ່ງກ່າວ ທ່ານ ໄດ້ສະແດງຄວາມຍິນດີຕ້ອນ ຮັບ ແລະ ຕີລາຄາສູງ ຕໍ່ການຢ້ຽມຢາມ ​ແລະ ເຮັດ​ວຽກ​ຢູ່ ສປປ ລາວ ຂອງ ຄະ​ນະ​ຜູ້​ແທນ​ໃນ​ຄັ້ງ​ນີ້; ໄດ້ພົບປະ​ກັບ​ຄະ​ນະ​ຜູ້​ແທນອົງການໄອຍະການປະຊາຊົນສູງສຸດ ຊຶ່ງ​ນໍ​າ​ໂດຍ ທ່ານ ສົມບູນ ລາດສະບົວສີ ຫົວໜ້າກົມຈັດຕັ້ງ-ພະນັກ ງານ ໂດຍໄດ້​ລົງ​ນາມ ບົດ​ບັນ​ທຶກການ​ພົບ​ປະ​ ລະ​ຫວ່າງ ຄະ​ນະ​ຜູ້​ແທນ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ສ​ປ​ປ ລາວ ແລະ ​ຄະ​ນະ​ຜູ້​ແທນມະ​ຫາ​ວິ​ທະ​ຍາ​ໄລ​ສ້າງ​ຄູກວາງ​ຊີ, ສ​ປ ຈີນ ກ່ຽວ​ກັບ​ການ​ກໍ່​ສ້າງ​ພະ​ນັກ​ງານ​ໄອ​ຍະ​ການ​ປະ​ຊາ​ຊົນ ສ​ປ​ປ ລາວ ຢູ່ ສ​ປ ຈີນ ໄລ​ຍະ​ສັ້ນ, ໄລ​ຍະ​ຍາວ, ການ​ຄົ້ນ​ຄວ້າ​ວິ​ທະ​ຍາ​ສາດ,  ​ການ​ກໍ່​ສ້າງ​ພື້​ນ​ຖານ​ໂຄງ​ລ່າງ ເພື່ອ​ຊ່ວຍ​ພັດ​ທະ​ນາ​ອົງ​ການ​ໄອ​ຍະ​ການ​ປະ​ຊາ​ຊົນ ແຫ່ງ ສ​ປ​ປ ລາວ ​ໃຫ້​ມີ​ຄວາມ​ເຂັ້ມ​ແຂງ​ ແລະ ທັນ​ສະ​ໄໝ​ ເທື່ອ​ລະ​ກ້າວ, ສາ​ມາດ​ເຊື່ອມ​ໂຢງ​ເຂົ້າ​ກັບ​ສາ​ກົນ ແລະ ພາກ​ພື້ນ ໄດ້​ຢ່າງ​ມີ​ປະ​ສິດ​ທິ​ຜົນ. ພ້ອມ​ກັນ​ນັ້ນ ຄະ​ນະ​ຜູ້​ແທນ ຍັງ​ໄດ້​ທ່ຽວ​ຊົມ​ສະ​ຖານ​ທີ່​ທ່ອງ​ທ່ຽວ​ຈຳ​ນວນ​ໜຶ່ງ ຢ​ູ່​ນະ​ຄອນ​ຫຼວງວຽ​ງ​ຈັນ ແລະ ໄດ້​ເດີນ​ທາງ​ກັບ​ຄືນ​ປະ​ເທດ​ໃນ​ຕອນ​ເຊົ້າ​ຂອງວັນ​ທີ 18 ທັນ​ວາ 2019 ດ້ວຍ​ຄວາມ​ສະ​ຫວັດ​ດີ​ພາບ.

     ການ​ເດີນ​ທາງ​ມາ​ຢ້ຽມ ແລະ ເຮັດ​ຽກ​ຂອງ​ຄະ​ນະ​ຜູ້​ແທນ​ມະ​ຫາ​ວິ​ທະ​ຍາ​ໄລສ້າງ​ຄູ​ກວາງ​​ຊີ, ສ​ປ ຈີນ ໃນ​ຄັ້ງ​ນີ້ ໄດ້ປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນດີ ກໍ​ຄື ການ​ຮ່ວມ​ມື​ຮອບດ້ານ ລະ ຫວ່າງ ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ລາວ-ຈີນ ເວົ້າລວມ ແລະ ການ​ພົວ​ພັນ​ຮ່ວມ​ມື ລະ​ຫວ່າງ ອົງ ການໄອຍະການປະຊາຊົນສູງ​ສຸດ ສປປ ລາວ ແລະ ມະຫາວິທະຍາໄລສ້າງ​ຄູກວາງຊີ, ​ສປ ຈີນ ເວົ້າສະເພາະ ໃຫ້ໄດ້ຮັບ ການພັດທະນາສູ່ລວງເລິກ ​ແລະ ເກີດດອກ​ອອກ​ຜົນ​ຍິ່ງຂຶ້້ນ ຢ່າງບໍ່ຢຸດຢັ້ງ.

by:SACK

17/12/2019

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ