ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ເຂົ້າຢ້ຽມຄຳນັບປະທານປະເທດ ແລະ ປະທານ ສະພາ ແຫ່ງຊາດ ສປປ ລາວ

       ໂດຍ​ຕອບ​ສະ​ໜອງ​ຕາມ​ຄຳ​ເຊີນ​ຂອງ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ປ​ປ ລາວ ໃນ​ລະ​ຫວ່າງ​ວັນ​ທີ 7-9 ມັງ​ກອນ 2020 ນີ້ ຄະ​ນະ​ຜູ້​ແທນຂັ້ນ​ສູງ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ສ ຫວຽດ​ນາມ ຊຶ່ງ​ນຳ​ໂດຍ ສະ ຫາຍ ເລ ມິງ ຈີ ກໍາມະການສູນກາງພັກຄອມມູນິດ ຫວຽດນາມ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດ ນາມ ພ້ອມ​ດ້ວຍ​ຄະ​ນະ ໄດ້ເດີນ​ທາງ ມາຢ້ຽມຢາມ ແລະ ເຮັດວຽກ ຢູ່ນະຄອນຫຼວງວຽງຈັນ, ສປປ ລາວ ຢ່າງ​ເປັນ​ທາງ​ການ.

    ໃນ​ວາ​ລະ​ຢູ່​ຢ້ຽມ​ຢາມ ແລະ ເຮັດ​ວຽກ ຢູ່ ສ​ປ​ປ ລາວ ຄະ​ນະ​ຜູ້​ແທນໄດ້​ເຂົ້າ​ຢ້ຽມ​ຄຳ​ນັບ​ ທ່ານ ປະ​ທານ ​ປະ​ເທດ ​ແຫ່ງ ສາ​ທາ​ລະ​ນະ​ລັດ ​ປະ​ຊາ​ທິ​ປະ​ໄຕ ​ປະ​ຊາ​ຊົນ​ລາວ, ປະ​ທານ​ ສະ​ພາ ​ແຫ່ງ ​ຊາດ ຕາ​ມ​ລຳ​ດັບ ພ້ອມ​ທັງ ໄດ້​ລາຍ​ງານ​ໃຫ້ ທ່ານ​ປະ​ທານ ​ປະ​ເທດ ​ແຫ່ງ ສ​ປ​ປ ລາວ ​ແລະ ປະ​ທານ​ ສະ​ແຫ່ງ​ຊາດ​ ຊາບ ​ກ່ຽວ​ກັບ​ຈຸດ​ປະ​ສົງ​ຂອງ​ການ​ຢ້ຽມ​ຢາມ ແລະ ເຮັດ​ວຽກ ຢູ່ ສ​ປ​ປ ລາວ ໃນ​ຄັ້ງ​ນີ້  ໂດຍ​ຈະໄດ້​ພົບ​ປະ, ຮ່ວມ​ເຮັດ​ວຽກ​ກັບ​ຄະ​ນະ​ຜູ້​ແທນ​ຂັ້ນ​ສູງ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ປ​ປ ລາວ.

       ຊຶ່ງ​ນຳ​ໂດຍ ທ່ານ ​ຄຳ​ສານ ສຸ​ວົງ ກຳ​ມະ​ການ​ສູນ​ກາງ​ພັກ ​ປະ​ຊາ​ຊົນ ​ປະ​ຕິ​ວັດ ລາວ, ຫົວ​ໜ້າ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ປ​ປ ລາວ, ພິທີລົງນາມສົນທິສັນຍາວ່າດ້ວຍການຊ່ວຍເຫຼືອ ເຊິ່ງກັນ ແລະ ກັນທາງ ດ້ານກົດໝາຍ ໃນບັນຫາອາຍາ ລະ​ຫວ່າງ ສ​ປ​ປ ລາວ ແລະ ສ​ສ ຫວຽດນາມ ແລະ ເປັນກຽດເຂົ້າຮ່ວມພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງອົງການໄອຍະການປະຊາຊົນ ແຫ່ງ ສປປ ລາວ ຄົບຮອບ 30 ປີ.

     ສອງ​ຝ່າຍ ຕີ​ລາ​ຄາ​ສູງ ແລະ ເຊື່ອໜັ້ນວ່າ ການເດີນ​ທາງ​ມາ​ຢ້ຽມ​ຢາມ ແລະ ເຮັດ​ວຽກ​ຂອງ​ຄະ​ນະ​ຜູ້​ແທນ​ຂັ້ນ​ສູງ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ສ ຫວຽດ​ນາມ ຢູ່ ສ​ປ​ປ ລາວ ໃນ​ຄັ້ງ​ນີ້ ຈະ​ປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ​ເສີມ​ຂະ​ຫຍາຍ​ສາຍ​ພົວ​ພັນ​ມິດ​ຕະ​ພາບ​ອັນ​ຍິ່ງ​ໃຫຍ່, ຄວາມສາມັກຄີພິເສດ ແລະ ຮ່ວມມືຮອບດ້ານ ຂອງ ສອງພັກ, ສອງລັດ ແລະ ປະຊາຊົນສອງຊາດ ເວົ້າລວມ, ເວົ້າສະເພາະ ແມ່ນການພົວພັນ ຮ່ວມມື ລະຫວ່າງ ອົງການໄອຍະ ການປະຊາຊົນ ແຫ່ງ ສ​ປ​ປ ລາວ ແລະ ອົງການໄອຍະການປະຊາຊົນ ແຫ່ງ ສ​ສ ຫວຽດ​ນາມ ໄດ້ຮັບການເສີມ​ຂະ​ຫຍາຍ ໃຫ້​ມີ​ຄວາມແໜ້ນແຟ້ນ ແລະ ສູ່ລວງເລີກຢ່າງບໍ່ຢຸດຢັ້ງ.

by:SACK

07/01/2020

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ