ສປປ ລາວ ແລະ ສສ ຫວຽດນາມ ລົງນາມ ສົນທິສັນຍາ ວ່າດ້ວຍ ການຊ່ວຍເຫຼືອ ເຊິ່ງກັນ ແລະ ກັນ ທາງດ້ານກົດໝາຍໃນບັນຫາອາຍາ

    ໂດຍປະຕິບັດຕາມ​ການມອບ​ໝາຍ​ຂອງ​ລັດ​ຖະ​ບານ ໃຫ້​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດເປັນ​ໃຈ​ກາງ​ໃນ​ການ​ຄົ້ນ​ຄວ້າສົນທິສັນຍາວ່າດ້ວຍການຊ່ວຍເຫຼືອເຊິ່ງກັນ ແລະ ກັນທາງດ້ານກົດໝາຍໃນບັນຫາອາຍາ ລະຫວ່າງ ສປປ ລາວ ແລະ ສສ ຫວຽດນາມ, ​ການ​ຕົກ​ລົງ​ຂອງ​ກ່ຽວ​ກັບ​ການ​ເຈ​ລະ​ຈາຮ່າງສົນ​ທິ​ສັນ​ຍາ​ ຕາມລັດຖະດໍາລັດຂອງ ປະທານປະເທດ ແຫ່ງ ສປປ ລາວ ສະບັບເລກທີ 173/ປປທ, ລົງວັນທີ 01 ມີນາ 2019 ແລະ ການລົງ​ນາມສົນ​ທິ​ສັນ​ຍາດັ່ງກ່າວ ຕາມລັດຖະດໍາລັດຂອງ ປະທານ ປະເທດ ແຫ່ງ ສປປ ລາວ ສະບັບເລກທີ 025/ປປທ, ລົງວັນທີ 06 ມັງ​ກອນ 2020.

        ທ່ານ ​ຄຳ​ສານ ສຸ​ວົງ ກຳ​ມະ​ການ​ສູນ​ກາງ​ພັກ ​ປະ​ຊາ​ຊົນ​ປະ​ຕິ​ວັດ ລາວ, ຫົວ​ໜ້າ​ອົງ​ການ​ໄອ​ຍະ​ການ​ປະ​ຊາ​ຊົນ​ສູງ​ສຸດ ແຫ່ງ ສ​ປ​ປ ລາວ, ​ຕາງ​ໜ້າ ລັດ​ຖະ​ບານ ແຫ່ງ ສ​າ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ ລາວ ແລະ ສະ​ຫາຍ ເລ ມິງ ຈິ, ​ຕາງ​ໜ້າ​ລັດ​ຖະ​ບານ ແຫ່ງ ສາ​ທາ​ລະ​ນະ​ລັດ ສັງ​ຄົມ​ນິ​ຍົມ ຫວຽດ​ນາມ ໄດ້​ພ້ອມ​ກັນລົງນາມສົນທິສັນ ຍາວ່າດ້ວຍ ການຊ່ວຍເຫຼືອ ເຊິ່ງກັນ ແລະ ກັນທາງດ້ານ ກົດໝາຍ ໃນບັນຫາອາຍາ ລະ​ຫວ່າງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ ລາວ ແລະ ສາ​ທາ​ລະ​ນະ​ລັດ ສັງ​ຄົມ​ນິ​ຍົມ ​ຫວຽດ​ນາມ ທີ່ນະຄອນຫຼວງວຽງຈັນ,  ສປປ ລາວ.

        ສົນທິສັນຍາ​ສະ​ບັບ​ນີ້  ເປັນ​ສົນ​ທິ​ສັນ​ຍາສະ​ບັບ​ໃໝ່ ທີ່​ສ້າງ​ຂຶ້ນ ເພື່ອ​ປ່ຽນ​ແທນສົນທິສັນຍາ​ວ່າ​ດ້ວຍການ​ຮ່ວມ​ມື​ຍຸຕິ​ທຳ​ກ່ຽວກັບ​ບັນຫາ​ທາງແພ່ງ ​ແລະ ອາຍາ​ ລະຫວ່າງ ສປປ ລາວ ແລະ ສສ ຫວຽດນາມ ສະ​ບັບປີ 1998 ຊຶ່ງໄດ້ຜ່ານການຄົ້ນຄວ້າ, ເຈ​ລະ​ຈາ​ສອງ​ຮອບ ​ຢູ່ສ​ປ​ປ ລາວ ແລະ ສ​ສ ຫວຽດ​ນາມ ໂດຍມີ​ຄວາມ​ເປັນ​ເອ​ກະ​ພາບ​ກັນ​ທາງ​ດ້ານຫຼັກ​ການ​ ແລະ ​ເຫັນ​ວ່າ ມີ​ຄວາມສອດຄ່ອງ ກັບ​ສົນ​ທິ​ສັນ​ຍາ​​ໃນ​ຂົງ​ເຂດ​ຍຸ​ຕິ​ທຳ ທີ່ ສ​ປ​ປ ລາວ ເປັນ​ພາ​ຄີ ກໍ​ຄື ລັດ​ຖະ​ທຳ​ມະ​ນູນ ແລະ ກົດ​ໝາຍ​ຂອງປະ​ເທດ​ເຮົາ.

        ການລົງ​ນາມ​ສົນທິສັນຍາ​ສະ​ບັບ​ນີ້ ຈະ​ເປັນພື້ນຖານສໍາຄັນໃຫ້ແກ່ການພິຈາລະນາການຊ່ວຍເຫຼືອ ເຊິ່ງກັນ ແລະ ກັນ ທາງດ້ານກົດໝາຍ​ໃນບັນຫາອາຍາ, ຮັບ​ປະ​ກັນ​ໃຫ້ການ​ປະ​ກອບ​ຫຼັກ​ຖານ ກໍ​ຄື​ ການ​ດຳ​ເນີນ​ຄະ​ດີ​ອາ​ຍາ​ຄົບ​ຖ້ວນ, ຮອບ​ດ້ານ, ພາ​ວະ​ວິ​ໄສ, ຕ້ານອາຊະຍາກໍາຂ້າມຊາດ, ຈຳກັດ, ສະກັດກັ້ນການກະທຳຜິດ, ປົກປ້ອງຜົນປະໂຫຍດ ຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທຳຂອງພົນລະເມືອງ ຂອງ​ສອງ​ປະ​ເທດ ລາວ ແລະ ຫວຽດ​ນາມ ຢ່າງ​ມີ​ປະ​ສິດ​ທິ​ຜົນ; ປະ​ກອບ​ສ່ວນ​ສຳ​ຄັນ​ເຂົ້າ​ໃນ ການເພີ່ມ​ພູນ​ຄູນ​ສ້າງ ແລະ ເສີມ​ຂະ​ຫຍາຍສາຍພົວພັນມິດຕະພາບທີ່ຍິ່ງ ໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດ​ນາມ ເວົ້າ​ລວມ ແລະ ການພົວພັນຮ່ວມມື ລະຫວ່າງ ອົງການໄອຍະການປະຊາຊົນ ແຫ່ງ ສປປ ລາວ ແລະ ອົງການໄອຍະການປະຊາຊົນ ແຫ່ງ ສສ ຫວຽດນາມ ເວົ້າ​ສະ​ເພາະ ໃຫ້ໄດ້ຮັບການພັດທະນາສູ່ລວງເລິກ ​ແລະ ເກີດດອກ​ອອກ​ຜົນ​ຍິ່ງຂຶ້ນ ຢ່າງ​ບໍ່​ຢຸດຢັ້ງ.

by:SACK

08/01/2020

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ