25 ປີ ແຫ່ງການສ້າງຕັ້ງອົງການໄອຍະການປະຊາຊົນ

ສະພາບແວດລ້ອມ, ຄວາມຈໍາເປັນ, ທາດແທ້ ແລະ ພາລະບົດບາດຂອງອົງການໄອຍະການປະຊາຊົນ ກ. ສະພາບແວດລ້ອມ ແລະ ຄວາມຈໍາເປັນພາວະວິໄສໃນການສ້າງຕັ້ງອົງການໄອຍະການປະຊາຊົນ: ວັດຖຸປະສົງທີ່ພັກປະຊາຊົນປະຕິວັດລາວໄດ້ນຳພາຕໍ່ສູ້ປົດປ່ອຍຊາດແມ່ນເພື່ອເຮັດໃຫ້ປະຊາຊົນບັນດາເຜົ່າ ”ມີຄວາມຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີປອງດອງ ມີປະຊາທິປະໄຕ, ຍຸຕິທຳ ແລະ ສີວິໄລ. ການປ່ຽນແປງໃໝ່ຢ່າງຮອບດ້ານ ແລະ ມີຫຼັກການຂອງພັກໃນປີ 1986 ໄດ້ເລັ່ງທວງບູລະນະລັດສັງຄົມນິຍົມໃຫ້ມີຄວາມຄ່ອງຕົວ ແລະ ສັກສິດໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍລັດຖະທຳມະນູນ ແລະ ກົດໝາຍເພື່ອເຮັດໃຫ້ລັດກາຍເປັນລັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ”. ມະຕິຂອງກອງປະຊຸມຄົບຄະນະຄັ້ງທີ 10 ສະໄໝທີ IV ຂອງພັກໄດ້ຊີ້ນໍາ “ ຕ້ອງປະຕິບັດຢ່າງຖືກຕ້ອງພາລະບົດບາດ,ໜ້າທີ່ຂອງສະພາປະຊາຊົນ, ສະພາລັດຖະມົນຕີ ແລະ ບັນດາອົງການປົກປ້ອງກົດໝາຍເຊັ່ນ: ຕໍາຫຼວດ, ສານ, ໄອຍະການ,ພ້ອມກັນນັ້ນຕ້ອງບຸລະນະຮ່າງລັດຖະທຳມະນຸນ ແລະ ຄົ້ນຄວ້າອອກກົດໝາຍ, ກະກຽມສ້າງຮ່າງຄາດຄະເນກ່ຽວກັບການປະຕິຮູບທາງດ້ານບໍລິຫານຢ່າງເລິກເຊິ່ງກວ້າງຂວາງເພື່ອໃຫ້ສອດຄ່ອງກັບຄວາມຮຽກຮ້ອງຕ້ອງການລະດັບຄາດໝາຍໃນການພັດທະນາເສດຖະກິດ". ວຽກງານໄອຍະການເປັນວຽກງານໜຶ່ງທີ່ສຳຄັນ, ປະກອບເຂົ້າໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມເພື່ອປົກປັກຮັກສາຜົນປະໂຫຽດຂອງລັດ, ສັງຄົມ, ສິດ ແລະ ຜົນປະໂຫຽດອັນຊອບທຳຂອງພົນລະເມືອງ, ຮັບປະກັນໃຫ້ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຍຸຕິທຳ. ກອງປະຊຸມສະໄໝສາມັນຂອງສະພາປະຊາຊົນສູງສຸດຊຸດທີ II ໃນວັນທີ 23 ພະຈິກ ປີ 1989 ໄດ້ຮັບຮອງເອົາກົດໝາຍວ່າດ້ວຍອົງການໄອຍະການປະຊາຊົນແຫ່ງ ສ ປ ປ ລາວສະບັບທຳອິດ ແລະ ປະກາດໃຊ້ໂດຍດຳລັດຂອງປະທານປະເທດເລກທີ 05 ວັນທີ 9 ມັງກອນປີ 1990 ເປັນຂີດໝາຍປະຫວັດສາດສຳຄັນຂອງອົງການໄອຍະການປະຊາຊົນໄດ້ເຕີບໃຫ່ຍຂະຫຍາຍຕົວມາຮອດ ປະຈຸບັນພໍດີ 25 ປີ ( 09/01/ 1990 -09 /01/ 2015). ຂ. ທາດແທ້, ມູນເຊື້ອ, ພາລະບົດບາດ, ສິດ ແລະ ໜ້າທີ່ ຂອງອົງການໄອຍະການປະຊາຊົນ. ໃນມາດຕາ 9 ກົດໝາຍວ່າດ້ວຍອົງການໄອຍະການປະຊາຊົນສະບັບປັບປຸງປີ 2009 ໄດ້ກຳນົດໄວ້ວ່າ: ອົງການໄອຍະການປະຊາຊົນແມ່ນອົງການຕິດຕາມກວດກາລັດ, ມີພາລະບົດບາດຕິດຕາມກວດກາການເຄົາລົບ ແລະ ປະຕິບັດກົດໝາຍຂອງບັນດາກະຊວງ, ອົງ ການ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ອົງການປົກຄອງທ້ອງຖິ່ນ, ວິສາຫະກິດ, ພົນລະເມືອງເພື່ອໃຫ້ມີຄວາມຖືກຕ້ອງ ແລະ ເປັນເອກະພາບ ແລະ ສັ່ງຟ້ອງຜູ້ຖືກຫາຂຶ້ນສານຕາມກົດໝາຍ. ທາດແທ້ ແລະ ມູນເຊື້ອ ຂອງອົງການໄອຍະການປະຊາຊົນ. 1. ທາດແທ້. ທາດແທ້ປະຕິວັດ: ສະແດງອອກທັດສະນະຫຼັກໝັ້ນຊົນຊັ້ນ, ຄວາມຈົ່ງຮັກພັກດີຕໍ່ພັກ, ຕໍ່ປະຊາຊົນ ແລະ ອຸດົມການສັງຄົມນິຍົມຢ່າງໜັກແໜ້ນ, ສະເໝີຕົ້ນສະເໝີປາຍ, ປະຕິບັດໜ້າທີ່ດ້ວຍຄວາມຕື່ນຕົວ ແລະ ຄວາມຮັບຜິດຊອບສູງ. ທາດແທ້ປະຊາຊົນ: ຮັບໃຊ້ປະຊາຊົນລາວບັນດາເຜົ່າໂດຍຊື່ສັດບໍລິສຸດ ແລະ ຍຸຕິທຳ, ເວລາໃດກໍ່ຖືຕົນເອງຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ທາດແທ້ຈັນຍາບັນ, ຈັນຍາທຳຂອງນັກກົດໝາຍ: ການປະຕິບັດໜ້າທີ່ຕາມລັດຖະທຳມະນູນ ແລະ ກົດໝາຍຢຶດໝັ້ນຫຼັກການ “ຮອບດ້ານ, ຄົບຖ້ວນ ແລະ ພາວະວິໄສ”. 2. ມູນເຊື້ອ. ຈົ່ງຮັກພັກດີຕໍ່ພັກ, ຕໍ່ປະເທດຊາດ ແລະ ປະຊາຊົນ. ຝຶກຝົນຫຼໍ່ຫຼອມ ແລະ ພັດທະນາຕົນເອງນັບມື້ນັບເຕີບໃຫຍ່ຂະຫຍາຍຕົວເປັນກ້າວໆ. ມີລະບຽບແບບແຜນ ແລະ ວິທີເຮັດວຽກຕົວຈິງ, ຮອບດ້ານ, ຄົບຖ້ວນ ແລະ ພາວະວິໄສ. ມີຄວາມສາມັກຄີເປັນເອກະພາບພາຍໃນ, ສາມັກຄີກັບປະຊາຊົນບັນດາເຜົ່າ, ຮັບໃຊ້ປະຊາຊົນຈິງໃຈ ແລະ ທ່ຽງທຳ. ມີການພົວພັນຮ່ວມມືກັບຕ່າງປະເທດໂດຍສະເພາະແມ່ນປະເທດເພື່ອນມິດຍຸດທະສາດຄື:ອົງການໄອຍະການປະຊາຊົນ ສ ສຫວຽດນາມ ແລະ ສ ປ ຈີນ ກໍ່ຄືບັນດາປະເທດໃກ້ຄຽງ ແລະ ອົງການຈັດຕັ້ງສາກົນອື່ນໆ. ພາລະບົດບາດ, ສິດໜ້າທີ່ລວມຂອງອົງການໄອຍະການປະຊາຊົນ: ຕິດຕາມກວດກາການເຄົາລົບ ແລະ ການປະຕິບັດກົດໝາຍໃຫ້ຖືກຕ້ອງ ແລະ ເປັນເອກະພາບຂອງບັນດາກະຊວງ, ອົງການ , ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ອົງການປົກຄອງທ້ອງຖິ່ນ, ວິສາຫະກິດ ແລະ ພົນລະເມືອງ. ການຕິດຕາມນີ້ເອີ້ນວ່າການຕິດຕາມກວດກາທົ່ວໄປ.ຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນ. ດຳເນີນການສືບສວນ-ສອບສວນຄະດີໃດໜຶ່ງເປັນບາງສ່ວນ ຫຼື ທັງໝົດຕາມທີ່ກົດໝາຍກຳນົດໄວ້. ສັ່ງຟ້ອງຜູ່ຖືກຫາຂຶ້ນສານ. ຕິດຕາມກວດກາການປະຕິບັດກົດໝາຍໃນການດຳເນີນຄະດີຢູ່ສານ. ຕິດຕາມກວດກາການປະຕິບັດຄຳສັ່ງ, ຄຳຊີ້ຂາດ, ຄຳຕັດສິນ, ຄຳພິພາກສາຂອງສານທີ່ໃຊ້ໄດ້ເດັດຂາດແລ້ວ. ຕິດຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ ແລະ ສະຖານທີ່ປະຕິບັດມາດຕະການບັງຄັບອື່ນໆຂອງສານ. ຕິດຕາມກວດກາການຄົ້ນຄວ້າ, ການສະເໜີ ແລະ ການຈັດຕັ້ງປະຕິບັດການໃຫ້ອະໄພຍະໂທດຕາມລັດຖະດຳລັດຂອງປະທານປະເທດ. ປະສານສົມທົບກັບອົງການສືບສວນ-ສອບສວນ ແລະ ອົງການອື່ນໆ ທີ່ກ່ຽວຂ້ອງ ດຳເນີນການສະກັດກັ້ນ, ຕ້ານອາຊະຍາກຳ ຫຼື ການກະທຳຜິດ ແລະ ການລະເມີດກົດໝາຍອື່ນພ້ອມທັງລົບລ້າງບັນດາສາເຫດ ແລະ ເງື່ອນໄຂທີ່ພາໃຫ້ການກະທຳຜິດເກີດຂຶ້ນ. ຮື້ຟື້ນຄະດີຕາມກົດໝາຍໃນກໍລະນີມີຫຼັກຖານໃໝ່. ປະຕິບັດສິດ ແລະ ໜ້າທີ່ອື່ນຕາມກົດໝາຍໄດ້ກຳນົດໄວ້. II. 25 ປີແຫ່ງການເຕີບໃຫຍ່ຂະຫຍາຍຕົວ ແລະ ໝາກຜົນທີ່ອົງການໄອຍະການປະຊາຊົນຍາດມາໄດ້. 25 ປີແຫ່ງການເຕີບໃຫຍ່ຂະຫຍາຍຕົວຂອງອົງການໄອຍະການປະຊາຊົນໄດ້ຜ່ານ 3ໄລຍະດັ່ງນີ້: ໄລຍະທີໜຶ່ງແມ່ນແຕ່ປີ 1990-2003 ເຄື່ອນໄຫວ ແລະ ປະຕິບັດພາລະບົດບາດ, ສິດ ແລະ ໜ້າທີ່ພາຍໃຕ້ກົດໝາຍອົງການໄອຍະການປະຊາຊົນສະບັບທຳອິດ, ໄລຍະທີສອງແມ່ນແຕ່ປີ 2003-2009 ໄດ້ເຄື່ອນໄຫວ ແລະ ປະຕິບັດພາລະບົດບາດ, ສິດ ແລະ ໜ້າທີ່ພາຍໃຕ້ກົດໝາຍວ່າດ້ວຍອົງການໄອຍະການປະຊາຊົນສະບັບປັບປຸງ ປີ 2003; ໄລຍະທີສາມແມ່ນແຕ່ປີ 2009 ເຖິງປະຈຸບັນແມ່ນ ເຄື່ອນ ໄຫວ ຕາມພາລະບົດບາດ, ສິດ ແລະ ໜ້າທີ່ພາຍໃຕ້ກົດໝາຍວ່າດ້ວຍອົງ ການໄອຍະການປະຊາຊົນສະບັບປັບປຸງປີ 2009 ເຊິ່ງຜ່ານແຕ່ລະໄລຍະດັ່ງກ່າວເຮັດໃຫ້ອົງການໄອຍະການປະຊາຊົນແຫ່ງ ສ ປປລາວໄດ້ຮັບການ ພັດທະນາຢ່າງຮອບດ້ານ ແລະ ເຕີບໃຫຍ່ຂະຫຍາຍຕົວຂຶ້ນເປັນກ້າວໆດັ່ງນີ້: ໃນດ້ານລະບົບການຈັດຕັ້ງ. ໄລຍະແຕ່ປີ 1990- 2003 ລະບົບການຈັດຕັ້ງຂອງອົງການໄອຍະການປະຊາຊົນ ແຫ່ງ ສ ປ ປ ລາວປະກອບ ດ້ວຍ: ອົງການໄອຍະການປະຊາຊົນສູງສຸດ; ອົງການໄອຍະ ການປະຊາຊົນແຂວງ, ນະຄອນຫຼວງ; ອົງການໄອຍະການ ປະຊາຊົນເມືອງ; ອົງການໄອຍະການທະຫານ. ໄລຍະແຕ່ປີ 2003-2009 ລະບົບກົງຈັກການຈັດຕັ້ງຂອງອົງການໄອຍະການປະຊາຊົນ ແຫ່ງ ສ ປ ປ ລາວໄດ້ມີການສ້າງຕັ້ງອົງການໄອຍະການປະຊາຊົນຂັ້ນອຸທອນຢູ່ສາມພາກ: ພາກເໜືອ, ພາກກາງ ແລະ ພາກໃຕ້ເພື່ອໃຫ້ມີຄວາມສອດຄ່ອງກັບການຫັນປ່ຽນຈາກການດຳເນີນຄະດີຈາກສອງຂັ້ນມາເປັນສາມຂັ້ນ (ຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ). ໄລຍະແຕ່ປີ 2009 ເຖິງປະຈຸບັນລະບົບກົງຈັກການຈັດຕັ້ງອົງການໄອຍະການປະຊາຊົນແຫ່ງ ສ ປ ປ ລາວໄດ້ມີການປ່ຽນໄດ້ໂຮມເອົາບັນດາອົງການໄອຍະການປະຊາຊົນເມືອງມາສ້າງຕັ້ງອົງການໄອຍະການປະຊາຊົນເຂດ 39 ເຂດໃນທົ່ວປະເທດ ແລະ ປັບປຸງອົງການໄອຍະການປະຊາຊົນຂັ້ນອຸທອນຢູ່ສາມພາກເປັນອົງການໄອຍະການປະຊາຊົນພາກມີສິດຕິດຕາມກວດກາການດຳເນີນຄະດີເປັນຂັ້ນລົບລ້າງບັນດາຄະດີທີ່ເປັນຂັ້ນຕົ້ນຢູ່ເຂດ ແລະ ເປັນຂັ້ນອຸທອນຢູ່ແຂວງເຊິ່ງປະຈຸບັນລະບົບການຈັດຕັ້ງຂອງອົງການໄອຍະການປະຊາຊົນແຫ່ງ ສ ປ ປ ລາວລວມມີ: ອົງການໄອຍະການປະຊາຊົນສູງສຸດ; ອົງການໄອຍະການປະຊາຊົນພາກ, ອົງການໄອຍະ ການປະຊາຊົນແຂວງ, ນະຄອນຫຼວງ, ອົງການໄອຍະການປະຊາຊົນເຂດ, ອົງການໄອຍະການທະຫານ. ການພັດທະນາກົງຈັກການຈັດຕັ້ງຂອງອົງການໄອຍະການປະຊາຊົນແຕ່ລະຂັ້ນ. ກົງຈັກການຈັດຕັ້ງຂອງອົງການໄອຍະການປະຊາຊົນແຕ່ລະຂັ້ນກໍ່ໄດ້ຮັບການປັບປຸງໃນແຕ່ລະໄລຍະຄືຢູ່ຂັ້ນສູນກາງກົງຈັກການຈັດຕັ້ງປີ 1990 ປະກອບມີພຽງສອງກົມ: ກົມບໍລິຫານແລະກົມວິຊາການມາຮອດປະຈຸບັນໄດ້ມີຫ້ອງການ, 7 ກົມ ແລະ ສະຖາບັນຄົ້ນຄວ້າ ແລະ ຝຶກອົບຮົມໄອຍະການ; ອົງການໄອຍະການປະຊາຊົນທ້ອງຖິ່ນ (ອົງການໄອຍະການພາກ, ແຂວງ, ນະຄອນຫຼວງ ແລະ ເຂດ) ປະກອບດ້ວຍບັນດາພະແນກ, ຂະແໜງ, ໜ່ວຍງານຕາມພາລະບົດບາດ, ສິດ ແລະ ໜ້າທີ່ຂອງອົງການໄອຍະການປະຊາຊົນແຕ່ລະຂັ້ນທີ່ກົດໝາຍກຳນົດໄວ້. ກົງຈັກການຈັດຕັ້ງຂອງອົງການໄອຍະການທະຫານໄດ້ສ້າງຕັ້ງ ແລະ ປັບປຸງໃຫ້ເຕີບໃຫຍ່ຂະຫຍາຍຕົວຂຶ້ນເປັນກ້າວໆມາຮອດປີ 2014 ອົງການໄອຍະການທະຫານໃນທົ່ວປະເທດລວມມີ 38 ກົມກອງ, ອົງການໄອຍະການທະຫານຂັ້ນສູງປະກອບດ້ວຍຫ້ອງ, ພະແນກ ແລະ ຂະແໜງ. ການພັດທະນາບຸກຄະລະກອນ. ການພັດທະນາຖັນແຖວພະນັກງານຂອງອົງການໄອຍະການປະຊາຊົນໃນໄລຍະ 25 ປີຜ່ານມາໄດ້ມີການຂະຫຍາຍຕົວທາງດ້ານຈຳນວນ ແລະ ຄຸນນະພາບຊຶ່ງສະແດງອອກໃນແຕ່ລະໄລຍະດັ່ງນີ້: ໃນປີ 1990 ພະນັກງານອົງການໄອຍະການປະຊາຊົນມີພຽງ 330 ຄົນ ໃນນັ້ນຢູ່ຂັ້ນສູນກາງ 18 ຄົນ, ຢູ່ຂັ້ນທ້ອງຖິ່ນ 312 ຄົນ; ຮອດປີ 2010 ທົ່ວລະບົບອົງການໄອຍະການປະຊາຊົນມີພະນັກງານທັງມົດ 957 ຄົນ, ຍິງ 231 ຄົນ, ທຽບກັບປີ 1990 ເພີ່ມ ເກືອບ 3 ເທົ່າ ຕົວ; ໃນນັ້ນອົງການໄອຍະການປະຊາຊົນສູງສຸດ 110 ຄົນ, ຍິງ 36 ຄົນ, ອົງການໄອຍະການປະຊາຊົນພາກ 3 ພາກ ມີ 84 ຄົນ,ຍິງ 26 ຄົນ, ອົງການໄອຍະການປະຊາຊົນແຂວງ ແລະ ເຂດ 664 ຄົນ, ຍິງ 165 ຄົນ. ມາ​ຮອດ ​​​ປີ 2014 ພະນັກງານທີ່​ສັງກັດ​ຢູ່​ອົງການ​ໄອ​ຍະ​ການ​ປະຊາຊົນ​ໃນ​ທົ່ວ​ປະ​ເທດ​ມີ​ຈຳນວນ​ ທັງ​ໝົດ 1.​​584 ຄົນ, ຍິງ 531 ຄົນ​ ເພີ່ມ​ຂຶ້ນ 66 % ທຽບ​ໃສ່​ປີ 2009 ໃນ​ນີ້​ຮຽນ​ຈົບ​ກົດໝາຍ​ຊັ້ນ​ສູງ​ຂຶ້ນ​ເມືອກ​ວມ 71,27 %. ສັງກັດ​ຢູ່ ອົງການ​ໄອ​ຍະ​ການ​ປະຊາຊົນ​ສູງ​ສຸດ 217 ຄົນ, ຍິງ 83 ຄົນ, ກວມ 13,69 % ສັງ​ກັດ​ຢູ່​ອົງ ການ​ໄອ​ຍະ​ການ​ປະຊາຊົນພາກ 97 ຄົນ, ຍິງ 32ກວມ 6,12%, ສັງ​ກັດຢູ່​ອົງການໄອຍະ​ການ​ປະຊາຊົນ​ແຂວງ,ນະຄອນຫຼວງ 510 ຄົນ, ຍິງ 202 ຄົນ, ກວມ 32,19 % ແລະ ສັງ​ກັດ​ຢູ່ອົງການ​ໄອ​ຍະ​ການ​ປະຊາຊົນ​ເຂດ 760 ຄົນ, ຍິງ 214 ຄົນ, ກວມ 47,97 %ພ້ອມກັນນັ້ນອົງການໄອຍະການທະຫານກໍ່ໄດ້ຮັບການພັດທະນາດ້ານບຸກຄະລະກອນທັງຈຳນວນແລະຄຸນນະພາບສະແດງອອກປີ 1993 ອົງການໄອຍະການທະຫານຂັ້ນສູງມີພຽງແຕ່ 10ຄົນຈາກນັ້ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງກົງຈັກການຈັດ ຕັ້ງຂອງອົງການໄອຍະການທະຫານໃນທົ່ວປະເທດ (ຂັ້ນກອງພົນ, ກອງພັນໃຫຍ່,ກອງບັນຊາການທະຫານນະຄອນຫຼວງ,ແຂວງ)ຈຳນວນ ພະນັກງານໄອຍະການທະຫານໃນທົ່ວປະເທດໄດ້ເພີ່ມຂຶ້ນຮອດ 118 ຄົນໃນປີ 2003, ໃນນັ້ນມີປະລິນຍາຕິ 37 ຄົນ, ຊັ້ນສູງ 28 ຄົນ, ຊັ້ນກາງ 22 ຄົນ, ບໍາລຸງ 31 ຄົນ,ຈໍານວນພະນັກງານທັງໝົດເພີ່ມຂຶ້ນ 10 ເທົ່າຕົວ, ມາຮອດປີ 2009 ພະນັກງານໄອຍະການທະຫານມີ 163 ຄົນ, ທຽບໃສ່ປີ 2003 ເພີ່ມຂຶ້ນ38%;ໃນນັ້ນມີວິຊາການກົດໝາຍໃນແຕ່ລະດັບຄື: ປະລິນຍາ ຕີ 64 ຄົນ, ຊັ້ນສູງ 38 ຄົນ, ຊັ້ນ ກາງ 23 ຄົນ, ຊັ້ນຕົ້ນ 5 ຄົນ, ບໍາລຸງ3ຄົນ.ໃນປະຈຸບັນອົງການໄອຍະການທະຫານທົ່ວປະເທດ ມີ ຈຳນວນພະນັກງານທັງໝົດ 232 ຄົນ, ຍິງ 22 ຄົນ, ທຽບໃສປີ 2009 ເພີ່ມ 61% ໃນນັ້ນມີລະດັບປະລິນຍາໂທ 3 ຄົນ, ປະລິນຍາຕີ 134 ຄົນ, ຊັ້ນສູງ21 ຄົນ, ຊັ້ນກາງ 32 ຄົນ, ຊັ້ນຕົ້ນ 18 ຄົນ, ບໍາລຸງ 19 ຄົນ, ບໍ່ມີຊັ້ນວິຊາການພຽງແຕ່ 5 ຄົນ.III. ຜົນງານທີ່ພົ້ນເດັ່ນຂອງອົງການໄອຍະການປະຊາຊົນຍາດມາໄດ້ໃນໄລຍະຜ່ານມາ. 1. ການຕິດຕາມກວດກາການປະຕິບັດກົດໝາຍ. ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍອົງການໄອຍະການປະຊາຊົນ, ອົງການໄອຍະການປະຊາຊົນແຕ່ລະຂັ້ນໄດ້ເອົາໃຈໃສ່ປະຕິບັດໜ້າທີ່ຂອງຕົນໃນການຕິດຕາມກວດກາກາການປະຕິບັດກົດໝາຍເຊັ່ນ: ການຕິດຕາມກວດກາທົ່ວໄປ, ການຕິດຕາມການປະຕິບັດກົດໝາຍຂອງອົງການສືບສວນ - ສອບສວນ, ການສັ່ງຟ້ອງຄະດີຂຶ້ນສານ, ການຕິດຕາມກວດກາການປະຕິບັດກົດໝາຍໃນການດຳເນີນຄະດີຢູ່ສານ, ການຕິດຕາມກວດກາການປະຕິບັດກົດໝາຍໃນການປະຕິ ບັດຄຳຕັດສິນຂອງສານ, ການຕິດ ຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດ ສ້າງ ແລະ ສາມາດສະຫຼູບ ສັງລວມຕົວເລກສະຖິຕິໄລຍະສົກປີ 2013-2014 ທຽບໃສ່ສົກປີ 2010-2011 ຄືດັ່ງນີ້: ຄະດີອາຍາຂັ້ນອຸທອນໃນທົ່ວປະເທດໃນສົກປີ 2013-2014 ລວມມີ 380 ເລື່ອງ, ທຽບກັບສົກປີ 2010-2011 ເພີ່ມ 19,87%, ແກ້ໄຂໄດ້ 378 ເລື່ອງເທົ່າກັບ 99,74% ຖະແຫຼງຂຶ້ນສານ 320 ເລື່ອງ, ສານເອົາຕາມ 311 ເລື່ອງເທົ່າກັບ 97,17% ຄະດີ ແພ່ງຂັ້ນອຸທອນ ສົກປີ 2013-2014 ມີ 634 ເລ່ື່ອງ; ແກ້ໄຂໄດ້ 592 ເລື່ອງເທົ່າກັບ 93,37%. ຄະດີອາຍາຂັ້ນຕົ້ນທົ່ວປະເທດໃນສົກປີ 2013-2014 ລວມມີ 6.325 ເລື່ອງ, ທຽບກັບສົກປີ 2010-2011 ເພີ່ມ 21%ໄດ້ຄົ້ນ ຄວ້າແກ້ໄຂ 5.972 ເລື່ອງເທົ່າກັບ 94,92%, ໄດ້ຖະແຫຼງຂຶ້ນສານ 3.194 ເລື່ອງ ໃນນັ້ນສານເອົາຕາມ 3.186 ເລື່ອງເທົ່າກັບ 99,75%, ຄະດີແພ່ງຂັ້ນຕົ້ນ ມີ 253 ເລ່ື່ອງ, ແກ້ໄຂໄດ້ 244 ເລື່ອງເທົ່າກັບ 96,4% ຄະດີອາຍາຂັ້ນລົບລ້າງໃນທົ່ວປະເທດລວມມີ 121 ເລື່ອງ, ແກ້ໄຂໄດ້ 102 ເລື່ອງເທົ່າກັບ 84,30%, ຄະດີແພ່ງຂັ້ນລົບລ້າງມີ 306 ເລ່ື່ອງ, ແກ້ໄຂໄດ້ 299 ເລື່ອງເທົ່າກັບ 97,71%. ຄະດີແພ່ງຂັ້ນຮື້ຟື້ນໃນທົ່ວປະເທດ ລວມມີ 115 ເລື່ອງ, ແກ້ໄຂໄດ້ 38 ເລື່ອງເທົ່າກັບ 33,04 % ທຽບກັບສົກປີ 2010-2011 ລຸດລົງ 28,44 %. ຜົນງານທີ່ກ່າວມາຂ້າງເທິງນັ້ນໄດ້ຊີ້ໃຫ້ເຫັນຄວາມພະຍາຍາມສູ້ຊົນຂອງຄະນະພັກ, ຄະນະນຳຂອງອົງການໄອຍະການປະຊາຊົນທຸກຂັ້ນກໍ່ຄືພະນັກງານລັດຖະກອນທຸກຄົນທີ່ໄດ້ສຸມທຸກສະຕິປັນຍາ, ເຫື່ອແຮງເຂົ້າໃນການປະຕິບັດພາລະບົດບາດ, ສິດ ແລະ ໜ້າທີ່ດ້ວຍຄວາມຮັບຜິດ ຊອບສູງ, ຮັບໃຊ້ຊາດ, ຮັບໃຊ້ປະຊາຊົນດ້ວຍຄວາມຈົ່ງຮັກພັກດີ, ທັງເປັນການສ່ອງແສງເຖິງຄຸນນະພາບໃນການຄົ້ນ ຄ້ວາພິຈາລະນາຄະດີຂອງພະນັກງານໄອຍະການປະຊາຊົນທີ່ນັບມື້ນັບໄດ້ຮັບການພັດທະນາສູງຂຶ້ນ. ການຕິດຕາມກວດກາຂອງອົງການໄອຍະການທະຫານໃນທົ່ວປະເທດໃນໄລຍະແຕ່1993 ມາເຖິງປີ 2014 ກໍ່ໄດ້ຮັບຜົນສຳເລັດດັ່ງນີ້: ໂຄສະນາເຜີຍແຜ່ກົດໝາຍ 527ຄັ້ງ, ມີຜູ້ເຂົ້າຮັບຟັງ 55,707 ເທື່ອຄົນ, ຍິງ2,901 ຄົນ ຮັບ ແລະ ແກ້ໄຂຄຳຮ້ອງໄດ້ 300 ສະບັບ, ແກ້ໄຂສໍານວນຄະດີທັງໝົດ 1,131 ເລື່ອງ, ຖະແຫຼງສັ່ງຟ້ອງໃຫ້ສານ 712 ເລື່ອງ, ອອກຄໍາສັ່ງຊັດມ້ຽນຄະດີ 171 ເລື່ອງ, ແກ້ໄຂແບບບໍລິຫານ 411 ເລື່ອງ, ໂຈະການດໍາເນີນຄະດີ 44 ເລຶ່ອງປ່ອຍຕົວນັກໂທດພົ້ນໂທດ 403 ຄົນ, ອະໄພຍະໂທດຜ່ອນໂທດ 115 ຄົນ, ອະໄພຍະໂທດປ່ອຍຕົວ 13 ຄົນ, ຖະແຫຼງປ່ອຍຕົວນັກໂທດກ່ອນກໍານົດ 8 ຄົນ, ອອກຄຳສັງປ່ອຍຕົວຜູ່ ຖືກຫາ 97 ຄົນ. 2. ດ້ານການສ້າງນິຕິກຳ. ກົດໝາຍວ່າດ້ວຍອົງການໄອຍະການປະຊາຊົນສະບັບເລກທີ 31 /ສປສ, ລົງວັນທີ 23 ທັນວາ ປີ 1989 ແລະ ປະກາດໃຊ້ໂດຍລັດ ຖະດໍາລັດຂອງປະທານປະເທດເລກທີ 05 ລົງວັນທີ 9 ມັງກອນ ປີ 1990 ແລະ ໄດ້ປັບປຸງຄັ້ງທີ 1 ໃນປີ 2003 ແລະ ຄັ້ງທີ 2 ໃນປີ 2009. ກົດໝາຍອາຍາສະບັບເລກທີ 29/ສປສ, ລົງວັນທີ 23/12/1989 ແລະ ປະກາດໃຊ້ຕາມລັດຖະດຳລັດປະທານປະເທດສະບັບເລກທີ 04/ປທປທ, ລົງວັນທີ 9 ມັງກອນ 1990; ປັບປຸງຄືນປີ 2005. ກົດໝາຍວ່າດ້ວຍການດຳເນີນຄະດີອາຍາສະບັບເລກທີ 30/ສປສ, ລົງວັນທີ 23/12/1989 ແລະ ປະກາດໃຊ້ຕາມລັດຖະດຳລັດປະທານປະເທດສະບັບເລກທີ 07/ປທປທ, ລົງວັນທີ 9 ມັງກອນ 1990 ປັບປຸງຄືນ ປີ 2012. ກົດໝາຍວ່າດ້ວຍຢາເສບຕິດສະບັບເລກທີ 10/ສພຊ, ລົງວັນທີ 25/12/2007 ແລະ ປະກາດ​ໃຊ້ຕາມລັດຖະດຳລັດປະທານປະເທດສະບັບເລກທີ 08 /ປປທ, ລົງວັນທີ 25 ທັນວາ ປີ2007. ປັບປຸງມາດຕາ 146 ກົດໝາຍອາຍາ ແລະ ມາດຕາ 75, 76 ຂອງກົດໝາຍຢາເສບຕິດສະບັບເລກທີ 22/ສພຊ, ລົງວັນທີ 11 ທັນ ວາ 2012. ກົດໝາຍວ່າດ້ວຍອົງການໄອຍະການທະຫານສະບັບເລກທີ 37/ສພຊ, ລົງວັນທີ 16/ ທັນວາ/ 2013. ນອກຈາກນັ້ນຍັງໄດ້ສ້າງແລະປັບປຸງບັນດານິຕິກໍາລຸ່ມກົດໝາຍເປັນບ່ອນອີງໃຫ້ແກ່ການເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ຂອງອົງການໄອຍະການປະຊາຊົນ ແລະ ອົງການໄອຍະການທະຫານຫຼາຍສິບສະບັບ. 3. ດ້ານການພົວພັນຕ່າງປະເທດ. ໂດຍປະຕິບັດແນວທາງການຕ່າງປະເທດຂອງພັກ ແລະ ລັດ ອົງການໄອຍະການປະຊາຊົນຂັ້ນຕ່າງໆໄດ້ເປັນເຈົ້າການເຄື່ອນໄຫວພົວພັນຮ່ວມມືກັບບັນດາປະເທດ ແລະ ອົງການຈັດຕັ້ງສາກົນ, ເປັນຕົ້ນແມ່ນປະເທດເພື່ອນມິດຍຸດທະສາດ: ອົງການໄອຍະການປະຊາຊົນ ສ ສ ຫວຽດນາມ ແລະ ສ ປ ຈີນນັບມື້ນັບແໜ້ນແຟ້ນ ແລະ ມີປະສິດທິຜົນຕົວຈິງ. ການພົວພັນກັບອົງການໄອຍະການບັນດາປະເທດສະມາຊິກອາຊຽນກໍ່ໄດ້ມີການເປີດກວ້າງພົວພັນຮ່ວມມືກັນປົກກະຕິລະຫວ່າງປະເທດ ທີ່ມີຊາຍແດນຕິດຈອດກັນເຊັ່ນ: ອົງການໄອຍະການສູງສຸດແຫ່ງລາຊະອານາຈັກໄທ, ອົງການໄອຍະການສູງສຸດແຫ່ງລາຊະອານາຈັກກຳປູເຈຍບົນພື້ນຖານບົດບັນທຶກຄວາມຊົງຈຳທີ່ທັງສອງຝ່າຍໄດ້ເຊັນນຳກັນ. ໄດ້ເຂົ້າຮ່ວມການປະຕິບັດສົນທິສັນຍາສາກົນທີ່ລາວເປັນພາຄີໃນດ້ານວຽກງານໄອຍະການເປັນຕົ້ນແມ່ນການເຂົ້າຮ່ວມກອງປະຊຸມໄອຍະການຈີນ-ອາຊຽນ, ການປະກອບຄຳເຫັນເຂົ້າໃນຮ່າງສັນຍາສາກົນຕ່າງໆທີ່ລາວມີພັນທະໃນການປະຕິບັດ. ນອກນັ້ນໄດ້ປະຕິບັດການຮ່ວມມືກັບອົງການຈັດຕັ້ງສາກົນຕ່າງໆເຊັ່ນ: UNDP, UNICEF, JICA, UNODC, KOICA ບົນພື້ນຖານແຜນການຂອງໂຄງການທີ່ໄດ້ເຊັນກັນໃນແຕ່ລະໄລຍະລະຫວ່າງອົງການໄອຍະການປະຊາຊົນແຫ່ງ ສ ປ ປ ລາວກັບບັນດາອົງການຈັດຕັ້ງສາກົນຕ່າງໆ. 4. ການ​ພັດທະນາ​ພື້ນຖານ​ໂຄງ​ລ່າງ. ໃນຊຸມປີຜ່ານມາພັກ ແລະ ລັດໄດ້ເອົາໃຈໃສ່ຕໍ່ການພັດທະນາພື້ນຖານວັດຖຸເຕັກນິກຢ່າງມີຈຸດສຸມດັ່ງນີ້: ລົງທຶນກໍ່ສ້າງຫ້ອງການເຮັດວຽກຂອງອົງການໄອຍະການປະຊາຊົນສຸງສຸດ, ອົງການໄອຍະການປະຊາຊົນພາກ, ອົງການໄອຍະການປະຊາຊົນແຂວງ, ນະຄອນຫຼວງແລະ ອົງການໄອຍະການປະຊາຊົນເຂດມາຮອດປະຈຸບັນຫ້ອງການອົງການໄອຍະການປະຊາຊົນສຸງສຸດ, ອົງການໄອຍະການປະຊາຊົນ 3 ພາກໄດ້ມີຫ້ອງການເຮັດວຽກຖາວອນ; ອົງການໄອຍະການປະຊາຊົນແຂວງ 16 ແຂວງແລະ ນະຄອນຫຼວງວຽງຈັນມີຫ້ອງການເຮັດວຽກຖາວອນກວມ 94,4 % ຍັງແຕ່ອົງການໄອຍະການປະຊາຊົນແຂວງໄຊສົມບູນທີ່ສ້າງຕັ້ງຂຶ້ນໃໝ່ທີ່ຍັງບໍ່ທັນມີຫ້ອງການເຮັດວຽກຖາວອນອົງການໄອຍະການປະຊາຊົນເຂດ 39 ເຂດໄດ້ມີຫ້ອງການເຮັດວຽກແບບຖາວອນແລ້ວ 11 ເຂດ, ພວມກໍ່ສ້າງ 18 ເຂດ, ຍັງ 10 ເຂດພ້ອມກັນນັ້ນຍັງໄດ້ເອົາໃຈໃສ່ການປະກອບພາຫະນະ,ອຸປະກອນຮັບໃຊ້ການເຄື່ອນໄຫວຂອງອົງການໄອຍະການປະຊາຊົນແຕ່ລະຂັ້ນຕາມຄວາມສາມາດຕົວຈິງຂອງງົບປະມານຂອງລັດໃນແຕ່ລະປີ. 5. ການກໍ່ສ້າງພັກ. ໂດຍຮັບຮູ້ການນຳພາຂອງພັກມີບົດບາດຕັດສິນໃນທຸກຂົງເຂດວຽກງານ. ສະນັ້ນໃນຊຸມປີຜ່ານມາຄະນະພັກຂອງອົງການໄອຍະ ການປະຊາຊົນໄດ້ເອົາໃຈໃສ່ສ້າງ ແລະ ປັບປຸງຕົນເອງຢ່າງເປັນປະຈຳເຊິ່ງເລີ່ມຈາກເປັນຈຸພັກກ້າວມາເປັນໜ່ວຍພັກ ແລະ ມາຮອດປະຈຸ ບັນ ເປັນອົງຄະນະພັກແລະໄດ້ດຳເນີນກອງປະຊຸມໃຫຍ່ຂັ້ນຂອງຕົນຜ່ານມາໄດ້ສາມສະໄໝຄື: ຄັ້ງທີ I ປີ 1995, ຄັ້ງທີ II ປີ 2007 ແລະ ຄັ້ງທີ IIIປີ 2012 ແລະມີ 10 ໜ່ວຍພັກຂຶ້ນໂດຍກົງກັບອົງຄະນະພັກອົງການໄອຍະການປະຊາຊົນສູງສຸດ, ມີສະມາ ຊິກພັກທັງໝົດ 113 ສະຫາຍ, ຍິງ 37 ສະຫາຍ, ທຽບໃສ່ປີ 1990 ເພີ່ມຂຶ້ນ 10 ເທົ່າຕົວ. ຕະຫຼອດໄລຍະຜ່ານມາອົງຄະນະພັກອົງການໄອຍະການປະຊາຊົນສູງສຸດໄດ້ເອົາໃຈໃສ່ກໍ່ສ້າງພັກໂດຍຖືເອົາຄຸນນະພາບເປັນຕົ້ນຕໍຄຽງຄຸ່ກັບການຂະຫຍາຍດ້ານຈຳນວນເປັນສຳຄັນ ແລະ ສຸມໃສ່ການກໍ່ສ້າງສະມາຊິກພັກ ແລະ ໜ່ວຍພັກແຂງ-ຮູ້ນຳພາຮອບດ້ານເປັນເປົ້າໝາຍສູ້ຊົນມີແຜນການ ແລະ ການປະເມີນຜົນກວດກາຕີລາຄາເປັນປົກກະຕິໃນທຸກໆ ປີ. ໃນປີ 2014 ມີສະມາຊິກພັກເຂັ້ມແຂງຮູ້ນຳພາຮອບດ້ານ 83 ສະຫາຍ, ແຂງ 20 ສະຫາຍ, ບໍ່ມີສະມາຊິກອ່ອນ. ມີໜ່ວຍພັກແຂງ-ຮູ້ນຳພາຮອບດ້ານ 1 ໜ່ວຍ, ແຂງດ້ານ ໃດດ້ານ ໜຶ່ງ 9 ໜ່ວຍ. ຄຽງຄູ່ກັບຈຸດ​ດີ ​ແລະຜົນສຳເລັດທີ່ຍາດມາໄດ້ຂ້າງເທິງນັ້ນຍັງມີຂໍ້ຄົງຄ້າງດັ່ງລຸ່ມນີ້: ການ​ ສຶກສາ​ອົບຮົມ​ການ​ເມືອງ - ​ແນວ​ຄິດ​ຍັງ​ບໍ່​ທັນເຮັດໄດ້ຢ່າງເລິກເຊິ່ງແລະຕໍ່ເນື່ອງຍ້ອນແນວນັ້ນສະຕິຕໍ່ການຈັດຕັ້ງ, ຄຸນທາດການ ເມືອງ, ຄຸນສົມບັດສິນທຳປະຕິວັດ, ຈັນຍາບັນ ແລະ ຈັນຍາທໍາຂອງ​ສະມາຊິກພັກພະນັກງານໄອ​ຍະ​ການປະຊາຊົນຈຳນວນໜຶ່ງຍັງບໍ່ທັນໜັກແໜ້ນ. ກົງຈັກ​ການຈັດ​ຕັ້ງ​ ໃນລະບົບອົງການໄອຍະການປະຊາຊົນແຕ່ສູນກາງລົງທ້ອງຖິ່ນໄດ້​ຮັບ​ການ​ປັບປຸງ​​ແຕ່ບໍ່ທັນເປັນລະບົບຄົບຊຸດ ແລະ ເຂັ້ມແຂງໜັກແໜ້ນຖັນແຖວບຸກຄະລາກອນທາງດ້ານຈຳນວນ ແລະ ນນະພາບຍັງບໍ່ທັນຕອບສະໜອງໄດ້ຕາມຄວາມຮຽກຮ້ອງການຂອງໜ້າທີ່ການເມືອງໃນໄລຍະໃໝ່ ເປັນຕົ້ນແມ່ນພະນັກງານໄອຍະການທີ່ມີຄວາມຮູ້-ຄວາມ ສາມາດ ແລະ ບົດຮຽນປະສົບປະການຍັງມີຈໍາກັດ. ການ​ຕິດຕາມ​ກວດກາ​ການ​ເຄົາລົບ ແລະ ການປະຕິບັດ ​ກົດໝາຍ​ຍັງບໍ່ທັນໄດ້ດີເທົ່າທີ່ຄວນໂດຍສະ​ເພາະແມ່ນ​ຄຸນນະພາບການ​ຕິດ ຕາມ​ກວດກາ ແລະ ການສັ່ງຟ້ອງຜູ່ຖືກຫາຂຶ້ນສານຍັງບໍ່ໄດ້ຍົກສູງເທົ່າທີ່ຄວນ. ການ​ພັດທະນາ​ພື້ນຖານ​ໂຄ ​ງລ່າງ ແລະ ສິ່ງເອື້ອອຳນວຍຄວາມສະດວກໃຫ້ແກ່ການເຄື່ອນໄຫວຂອງອົງການໄອຍະການປະຊາຊົນແຕ່ລະຂັ້ນໂດຍ ​ສະ​ເພາະ​ແມ່ນ​ອົງການ​ໄອ​ຍະ​ການ​ປະຊາຊົນ​ເຂດຍັງມີຄວາມຫຍຸ້ງຍາກ​ຫຼາຍດ້ານ. ບົດບາດ ແລະ ຄວາມສາມາດນຳພາຂອງພັກບໍ່ທັນເຊີດຊູເທົ່າທີ່ຄວນ, ສະມາຊິກພັກຈຳນວນໜຶ່ງຂາດຄວາມເປັນແບບຢ່າງນຳໜ້າ, ການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານບໍ່ທັນບັນລຸຕາມແຜນການຄາດໝາຍວາງໄວ້. ການ​ພົວພັນ-ຮ່ວມມືກັບ ​ຕ່າງປະ​ເທດ​ປະສິດທິຜົນບໍ່ທັນສູງ. 6. ບັນດາວຽກຈຸດສຸມຕໍ່ໜ້າ ບັນດາວຽກຈຸດສຸມທີ່ຈະຕ້ອງໄດ້ເອົາໃຈໃສ່ປະຕິບັດໃນຕໍ່ໜ້າມີດັ່ງນີ້: ເພີ່ມທະວີການສຶກສາອົບຮົມການເມືອງ, ນໍາພາແນວຄິດຂອງພະນັກງານ​ໄອ​ຍະ​ການປະຊາຊົນທົ່ວປະເທດ​ໃຫ້ມີ​ແນວ​ຄິດ ແລະ ອຸດົມ​ ການ​ທີ່​ໜັກ​ແໜ້ນເຊີດຊູ​ນ້ຳ​ໃຈ​ຮັກ​ຊາດ, ຮັກ​ລະບອບ​ໃໝ່, ​ເຊື່ອໝັ້ນ​ຕໍ່ການ​ນຳພາ​ຂອງ​ພັກ ​ແລະ ອຸດົມ​ການ​​ສັງຄົມນິຍົມ. ປັບປຸງແລະບູລະນະກົງຈັກການຈັດຕັ້ງລະບົບອົງການໄອຍະການປະຊາຊົນຢ່າງເປັນລະບົບຄົບຊຸດເທື່ອລະກ້າວແນ່ໃສ່ຕອບສະໜອງ ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່,ໃນນັ້ນສຸມໃສ່ປັບປຸງອົງການໄອຍະການປະຊາຊົນແຂວງ, ນະຄອນຫຼວງ ແລະ ເຂດໃຫ້ເຂັ້ມແຂງ ແລະ ໜັກແໜ້ນ. ເອົາໃຈໃສ່ພັດທະນາຖັນແຖວບຸກຄະລາ​ກອນທາງຈໍານວນ ແລະ ຄຸນນະພາບໃນນັ້ນຖືຄຸນນະພາບເປັນຕົ້ນຕໍຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ໃຫ້ມີປະສິດທິຜົນ. ຍົກສູງຂີດຄວາມສາມາດໃນການຕິດຕາມກວດກາການເຄົາລົບ ແລະ ປະຕິບັດກົດໝາຍໃນຂອບເຂດທົ່ວປະເທດ ແລະ ການສັ່ງຟ້ອງຜູ່ຖືກຫາຂຶ້ນສານ ບົນພື້ນຖານ. ຮັບປະກັນຄື: ຖືກຕ້ອງ, ຍຸດຕິທຳ, ໂປງໃສແລະຮັບປະກັນເວລາເດັດດ່ຽວແກ້ໄຂບັນດາປະກົດການຫຍໍ້ທໍ້ໃນລະບົບອົງການໄອຍະການປະຊາຊົນຢ່າງເຂັ້ມງວດ, ເດັດຂາດ ແລະ ທັນການ. ເອົາໃຈໃສ່ພັດທະນາພື້ນຖານວັດຖຸ-ເຕັກນິກຂອງລະບົບອົງການໄອຍະການປະຊາຊົນເຂດແລະແຂວງເປັນຈຸດສຸມ. ເອົາໃຈໃສ່ພົວພັນການຮ່ວມມືກັບຕ່າງປະເທດ, ໂດຍສະເພາະແມ່ນການຮ່ວມມືກັບອົງການໄອຍະ ການປະຊາຊົນປະເທດເພື່ອນມິດຍຸດ ທະສາດ (ສ. ສ ຫວຽດນາມ ແລະ ສ ປ ຈີນ) ຕາມທິດຫັນໄປສູ່ລວງເລິກ ແລະມີປະສິດທິຜົນກວ່າເກົ່າ. ເພີ່ມທະວີການນຳພາຂອງພັກ, ສືບຕໍ່ກໍ່ສ້າງໜ່ວຍພັກເຂັ້ມແຂງ - ຮູ້ນຳພາຮອບດ້ານໃຫ້ບັນລຸແຜນການທີ່ວາງໄວ້.

2016-01-28

ປະຕິທິນ

Apr-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ